Sansón otetlakuepiltij
15
San xuejkajtika ijkuak kitekiyaj trigo, Sansón kitlajpalosnekiya isiuau, niman kuikiliaya sen chivito. Ijkuak oajsik ijkin okijtoj:—Nikalakis ipan ikalijtik nosiuau para niktlajpalos.
—Nejua oniknemilij ika xok tikneki. Yejua ika onikmakak semej moamigos. Pero ikniu yejuan más konetl, más kualtsin xken yejua. Aman yejua xkuika ken yejua yeskia.
3 Kemaj Sansón okijlij:
—¡Aman tej, xnikpiyas tlajtlakojli tla itlaj xkuajli nikinchiuilis on filisteos!
4 Kemaj Sansón oyaj niman okajsik 300 yolkej ostotsitsimej. Kemaj okinsasaloj ojomemej ipan inkuitlapil, niman no okinsasalouilij sen okopijli* ipan inkuitlapil. 5 Kemaj okintlikuiltij on okopiltin niman okinmakau on ostotsitsimej ipan imintlatok on filisteos. Ijkon okitlatij on trigo yejuan yokisesentlalijkaj niman on yejuan xe kitekiyaj. No otlatlak on uvasyoj niman olivojkojyoj. 6 On filisteos opeu tlajtlanij akinon okichiu. Kemaj okimatkej ika Sansón, pampa imontaj de Timná okuilij isiuau, niman okimakak sen iamigo. Yejua ika Sansón intech nochimej onotlauelkixtij on filisteos. Kemaj, on filisteos oyajkej niman okitlatitoj isiuau Sansón iuan imontaj. 7 Kemaj, Sansón okijtoj:
—Pampa nemejuamej ijkon nemouikaj, aman ninotlajtolmaka ixpan toTEKO ika nejua xninoseuis hasta tlamis ninotlauelkixtis ika on tlen onennechchiuilijkej.
8 Niman sanoyej okinuijuijsok hasta okinomiyopojpostek miyekej tlakamej hasta okinmiktij. Kemaj onochantito ipan on tekajli yejuan onkaj ipan on teostotl ne Etam.
Sansón okinmiktij miyekej ika ikamachal poloko
9 On filisteos oualajkej niman onochachantijkej ipan iueyitlalpan Judá niman ajsitoyaj hasta ipan on kalpan itoka Lehi. 10 Niman on chanejkej ipan on iueyitlalpan Judá okintlajtoltijkej:
—¿Tline onenualajkej onentechuijsokikoj?
Niman yejuamej otlanankilijkej:
—Otiualajkej otikajsikoj Sansón para kitlaxtlauas on tlen otechchiuilij.
11 Ijkuak ijkin okakkej, 3 mil tlakamej yejuan kisaj itech itribu* Judá, oyajkej ipan on tekajli yejuan onkaj ipan on tetl de Etam niman okijlijkej Sansón:
—¿Tlen xtikmati ika on filisteos techtlankapiyaj? ¿Tline otitechkalaktij ipan in tlauejli?
Sansón okinnankilij:
—Nejua san onikinkuepiltij on tlen onechchiuilijkej.
12 Kemaj yejuamej okijlijkej:
—Tejuamej otiualajkej para timitsajsiskej niman timitstemakaskej intech on filisteos.
Niman Sansón okinnankilij:
—Xnechtlajtolmakakan ixpan toTEKO ika xsano nemejuamej nennechmiktiskej.
13 Niman yejuamej okijlijkej:
—Ka, xtimitsmiktiskej. San tiknekij timitsajsiskej niman timitstemakaskej intech on filisteos.
Kemaj okisalojkej ikan ome mekatl yenkuik niman okuajkixtijkej ijtik on teostokajli kampa niyantikatka.
14 Ijkuak oajsikej ipan on kalpan Lehi, on filisteos okiminnamikikoj uajtsajtsitiayaj ikan paktli, kenon yejuan yotetlankej. Pero iespíritu toTEKO ouajlaj ipan Sansón niman okimakak fuerza. Kemaj on mekamej yejuan ika uajsalijtiaya ipan imauan okinkojkoton ken itlaj mekatsitsimej yeskiaj de lino yejuan yotlatlakej. 15 Kemaj okontilan sen ikamachal poloko* yejuan ompaka tlajkaltoya nion xe kuajli uakiya, niman ika okinmiktij se mil tlakamej filisteos. 16 Kemaj Sansón okijtoj:
"Ikan ikamachal sen poloko
onikchiu se olochojlia ipan okse olochojli de on mikatsitsimej.
Ikan ikamachal on poloko* se mil tlakamej onikinmiktij ."
17 Kemaj, ijkuak ijkon yokijtoj, okitlajkaltiaj on kamachajli. Yejua ika ompa okitokayotijkej Ramat-lehib. 18 Niman pampa Sansón sanoyej amikiya, okinots toTEKO niman okijlij: “Otikchiu para ma nitetlani. Yejua ika, ¿Tline tinechkauilis nimikis ika amiktli niman ijkon ma ninokaua inmak tlakamej yejuan xmitsneltokaj?"
19 Kemaj Dios okitlapoj on amejli yejuan onkaj Lehi niman okuepon atl. Kemaj ijkuak Sansón oatlik, okipix yolchikaualistli niman fuerza. Yejua ika on amejli yejuan hasta aman onkaj ompa Lehi, okitokayotijkej En-hacoréc.
20 Sansón okinmandaroj ken juez on israelitas sempoajli xipan ipan on tiempo ijkuak on filisteos inmak kipiyayaj on región.