Jueces 16

Sansón niman on siuaauilnenki de Gaza

Se tonajli Sansón oyaj ipan on ueyikalpan Gaza. Ompa okitak sen siuaauilnenki niman okalak ichan para iuan onotekak. 2 Ijkuak on chanekej ipan on ueyikalpan Gaza okimatkej ika Sansón ompa nemi, okiyejyeualojkej on ueyikalpan, niman ocuidarojkej itsakuijlouan nochi on tlayoua. Yejuamej okinemilijkej kimiktiskej ijkuak tlanesis.

3 Pero Sansón san onokau iuan on siuaauilnenki hasta tlajkoiuan. Kemaj onokuiteu niman okiteuiuitlak itsakuijlou on ueyikalpan san se ueyi iuan nochi ikojyouan yejuan ipan salijtikatka. Kemaj, okechpanoj niman okiktik ikuapan sen tepetl yejuan onkaj ixpan on kalpan Hebrón.

Sansón niman Dalila

4 Más sakin*, Sansón okinek sen siuatl yejuan itoka katka Dalila, yejuan chantiya ipan on ixtlauatl Sorec. 5 Intlayekankauan on filisteos oyajkej okitatoj Dalila, niman okijlijkej:

—Xkajkayaua Sansón. Xtejtemouili kanon ualeua ika sanoyej kojtik niman kenijki uelis tiktlaniskej para ijki uelis tiksaloskej. Tla tikchiuas, tejuamej cada se timitsmakaskej 1 mil 100 plata tomin.

6 Kemaj Dalila okijlij Sansón:

—Nimitstlajtlanilia, xnechijli tline sanoyej tikojtik. ¿Kenijki ueliskia mitssaloskiaj para xuelis timotojtomas?

7 Niman Sansón okinankilij:

—Tla nechsasaloskiaj ikan chikome kuamekamej yejuan xe uakij itoka mimbre, yejuan kitekitiltiaj para kichijchiuaj arco, tla ijkon nikpolos nofuerza niman xok nikojtik yes. Ninokauas sano ijki kenon oksekimej tlakamej.

8-9 Kemaj intlayekankauan on filisteos, okiktilijkej Dalila chikome kuamekamej. Niman Dalila yokimiyanka sekimej tlakamej ipan ikalijtik. Niman ijkuak yokisasaloj Sansón ika on mimbre, ijkin otsajtsik:

—¡Sansón, on filisteos uajlauij para mitsajsiskej!

Kemaj Sansón okojkoton on kuamekamej yejuan tejuan xe tonaltlatla, niman on filisteos xouel okimatkej tline sanoyej kojtik. 10 Dalila okijlij:

—¡Otinechkajkayau! ¡Tejua san tinechkajkayajtikaj! Pero aman kemaj nimitstlajtlanilia, xnechchijli kenijki nikchiuas para nimitssalos.

11 Niman Sansón okijlij:

—Tla nechsaloskej ikan mekamej yenkuikej yejuan xe kaman kintekitiltiaj, nikpolos nofuerza. Ninokauas sano ijki ken oksekimej tlakamej.

12 Kemaj Dalila okominkuik on mekamej yenkuikej niman ika okisaloj. No ijki oksejpa yokinmiyanka keskimej tlakamej ipan ikalijtik. Kemaj Dalila otsajtsik:

—¡Sansón, on filisteos uajlauij para mitsajsiskej!

Pero Sansón okojkoton on mekamej ken ijtla ikpatl yeskia yejuan pitsauak. 13 Dalila okijlij Sansón:

—¡Sansón, sanken* tinechkajkayajtikaj! ¡Saken tinechiyanilijtikaj! ¡Xnechijli tlinon nikchiuas para nimitssalos!

Niman Sansón okinankilij:

—Ijkin xchiua. Ikan notson iuan on listontsitsimej tikxinepalos chikome xinepajli niman kemaj tiktlalaktis ikan estaca ipan tlajli. Ijkon nikpolos nofuerza. Ninokauas sano ijki ken oksekimej tlakamej.

Kemaj Dalila okochtekak Sansón, niman ika chikome ixinepaluan, okixinepaloj iuan on listontsitsimej. Quemaj kuajli okitlalaktij on estaca ipan tlajli para otilin on ixinepaluan. 14 Niman okisaloj ipan on estaca. Kemaj okitlalaktij ipan tlajli, niman kemaj otsajtsik:

—¡Sansón, on filisteos uajlauij para mitsajsiskej!

Kemaj Sansón otlachix, onokuitejtikis niman okopin on estaca niman on xinepajli. 15 Kemaj yejua okijlij:

—¡Ueyi tlakajkayajketl! ¿Tline tinechijlia tinechneki? Aman ye ika yexpa noka tiuetska, niman sanken* xtinechijlia kanon ualeua mofuerza.

16 Pero pampa Dalila mojmostla sa chika kitlajtoltiaya, Sansón sanoyej oyolajsik, hasta kinekiskia ma miki. 17 Kemaj Sansón okitlajtlajtouilij Dalila on ichtakayotl:

—Xkaman yakaj nechxima, pampa desde ijkuak xe nitlakatiya, onechteyaxkatijkej itech Dios ken nazareo. Tla nechximaskej nikpolos nofuerza niman xok nikojtik yes. Ninokauas sano ijki ken oksekimej tlakamej.

18 Ijkuak Dalila okimat ika aman kemaj melauak yokijlij on ichtakayotl, okinmijlito on tlayekankej filisteos:

—Xuajlakan, aman kemaj melauak Sansón yonechmachistij on ichtakayotl.

Yejuamej oyajkej okitatoj, niman okiktilijkej on tomin.

19 Dalila okochtekak Sansón niman okikuejtontij imetskojyouan. Kemaj okonnots sen tlakatl para ma kitekili on chikome ixinepal. Niman Dalila okitak ika xok kojtik katka, 20 niman okitsajtsilij:

—¡Sansón, on filisteos uajlauij para mitsajsiskej!

Kemaj Sansón otlachix niman okinemilij nomanauis ken achtoj yokichijka, pero xkimatiya ika toTEKO yokitlalkauij. 21 On filisteos okajsikej niman okixtilijkej ixtololojuan. Kemaj okuikakej ipan on ueyikalpan Gaza. Ompa okisasalojkej ikan teposmekamej de bronce, niman okichiualtijkej ma kitekiti ipan molino ipan on cárcel. 22 Pero itson oksejpa opeu noskaltia.

Imikilis Sansón

23 On tlayekankej filisteos okichijkej sen iluitl ika otetlankej niman okitlauentlalilijkej imindios Dagón. Niman ijkin nokuikatiayaj:

"Todios otechmaktilij

Sansón totlauelikniu."

24 Niman ijkuak on oksekimej filisteos okitakej, no onokuikatijkej niman okiyektenejkej imindios, niman okijtojkej:

"Todios yotechmaktilij Sansón,

totlauelikniu yejuan kixpolouaya on tlen tiktokaj ipan totlaluan,

niman kinmiktiaya miyekej tochanejkauan."

25 Sanoyej pakiyaj niman otlanauatijkej ma kuajuikakan Sansón para ika nauiltiskej niman kipijpinauiskej. Kemaj okitelketskej itlajkotian ome ipilar on tiopan. 26 Kemaj Sansón okijlij on telpokakonetl yejuan kimayantiaya:

—Xnechkaua itech on ome pilar yejuan kimamajtokej on tiopan. Nikneki impan ninokitskis.

27 Nochimej on tlayekankej intech on filisteos nemiyaj ijtik on tiopan, niman tentikatka ikan tlakamej niman siuamej. Niman tlapani ipan on tiopan nemiyaj kanaj 3 mil tlakamej niman siuamej yejuan kitstikatkaj kenijki on oksekimej ika uetskayaj Sansón.

28 Kemaj Sansón onoueyikatsajtsilij itech toTEKO niman okijlij: "Nimitstlajtlanilia noTeko, xnechelnamiki maski sa sejpatsin. Niman xnechmaka mopoder para nikintlakuepiltis in filisteos pampa onechinkixtilijkej nixtololojuan." 29 Kemaj Sansón okintejtemoj ika imauan on ome pilar yejuan kimamajtikatkaj on tiopan. Ijkuak onokiktsij chikauak ipan on pilares, 30 ijkin otsajtsik: "¡Ma mikikan nouan on filisteos!"

Kemaj san kechika kojtik, okimapeu on ome pilar yejuan kimamajtikatkaj on tiopan. Niman on tiopan ouets impan on tlayekankej filisteos niman impan nochimej on yejuan ompa nemiyaj. Ijkon tej, Sansón más miyekej okinmiktij san sekan kampa yejua iminuan omik, xken on yejuan okinmiktij ipan nochi inemilis.

31 Kemaj oualajkej ikniuan Sansón niman nochimej ifamilias. Yejuamej okiktikej imikatlakayo niman okitokakej entre on ome kalpanmej Zora niman Estaol, ipan itlalkon Manoa on itataj. Sansón okinyekan on israelitas sempoajli xipan.