Itiopan Micaías
17
Ipan itepeyoj Efraín, chantiya sen tlakatl yejuan itoka katka Micaías. 2-3 Se tonajli ijkin okijlij inanaj:—On 1 mil 100 plataj tomin yejuan omitsichtekilijkej, niman san ipampa otikuijuikaltij on tlachtekketl, on tomin nejua nikpiya. Nejua onimitsichtekilij, pero aman nimitskuepilia. Onikak ika yotikyaxkatijka toTEKO para titlanauatiskia ma mitschijchiuilikan se ídolo tlatetsotsontli niman kalauiliskiaj plata.
Ijki tej okuepilij on tomin. Kemaj inanaj okijtoj:
—¡ToTEKO ma mitstiochiua, nokoneu!
4 Sakin ijkuak Micaías yokuepilij inanaj on tomin, on inanaj okimakak sen platero 200 plata tomin para ma kichijchiuili sen ídolo tlatetsotsontli niman ma kalauili plata. Kemaj okitlalij ichan Micaías.
5 Micaías kipiyaya itlaixpan ipan ichan kampa kinmauistiliaya idioses. Yejua okichijchiu sen ikatlakajtli tlakenpani yejuan xkipiya imatlaken, niman no okinchijchiu idioses. Niman okalaktij tiopixki se itelpoch. 6 Niman ipan on tiempo on israelitas xe kipiyayaj sen rey. Cada se kichiuaya tlinon yejua kinekiya.
7 Nemiya sen telpochtli chantiya Balén. Yejua xchanej katka ompa. Yejua levita katka kisaya itech itribu* Judá. 8 In telpochtli okis Belén para okitejtemoto oksekan kampa chantis, niman oyaj kampaka itepeyoj Efraín. Kemaj oajsik ichan Micaías. 9 Niman Micaías okitlajtoltij:
—¿Kanon tiualeuaj?
Niman on telpochtli okinankilij:
—Nejua niualeua Belén ne Judá. Nejua nilevita, niman niktejtemoua kanon nichantis.
10 Niman Micaías okijlij:
—Xmokaua nikan nouan. Tinotiopixkau yes niman tinechtlajtolpaleuis ken tinotataj yeskia. Nejua nimitstlaxtlauilis majtlaktli plata tomin ipan se xipan, niman no nimitsmakas tlakentin niman tlakuajli.