Itribu* Dan kinmauistilia iídolos Micaías
18
Ipan on tonaltin xe nemiya sen rey ne israel. Niman itribu* Dan no sanken* xe kipiyayaj inueyitlalpan niman kitejtemojtinemiyaj kanon nochantiskej. 2 Kemaj itribu* Dan okintitlankej makuiltimej tlakamej yejuan xmojkej desde Zara niman Estaol para ma ichtatlajtlachatij ipan on región. In makuiltimej tlakamej oyajkej ipan itepeyoj Efraín. Oajsikej ichan Micaías niman ompa onokajkej ipan on yeuajli. 3 Ijkuak ye nemiyaj nisiu ichan Micaías, okitlajtolixmatkej on levita. Yejua ika, okinisiuikej niman okitlajtoltijkej:—¿Akinon omitsajuikak nanika? ¿Tline nikan tinemi? ¿Tlinon otiktejtemoko nikan?
4 Niman on levita okintlajtlajtouilij tlen Micaías okichiu ipampa. Niman okinmijlij ika okitlalij para itiopixkau.
5 Kemaj on tlakamej okijlijkej:
—Xtlajtolti Dios para tikmatiskej tla kuajli tiuajtokuepaskej kampa tiauij.
6 Niman on tiopixki levita okiminnankilij:
—Nemoyolika xuiyan, toTEKO mechmanauis nochiuiyan kampa nenyaskej.
7 Kemaj on makuiltimej tlakamej oyajkej ipan on ueyikalpan Lais. On chanejkej ipan on ueyikalpan chantiyaj iminyolika ijkon ken nouikaj on tlakamej sidonios. Chantiyaj ikan yolseuilistli niman xakaj kimpasolouaya nion xitlaj kimpolouaya. Yejuamej nemiyaj uejka de on oksekimej sidonios niman xakaj iuan nouikayaj. 8 Ijkuak on makuiltimej tlakamej onokuepkej ipan on uejueyikalpanmej Sorá niman Estaol, on inchanejkauan israelitas okintlajtoltikej:
—¿Kenijki onenuajmokuepatoj?
Niman yejuamej otenankilijkej:
9 —Otiknejnenkej imanian on región niman otikitakej ika on tlajli sanoyej kuajli. ¡Tiauij tikonminuijsokij! ¡Maka san nikan xejeuatiakan niman xitlaj nenkichiuaj! ¡Ika onkaj tikontlaniskej on tlajli! 10 Ijkuak ompa nenmajsiskej nenkitaskej ika on tlakamej chantij iminyolika niman kipiyaj miyek tlaltin yejuan nochi kipiya, niman Dios mechyaxkatis on tlajli.
11 600 tlakamej yejuan kisaj itech itribu* Dan okiskej ne Sorá niman ne Estaol ikan intepos. 12 Niman oajsikej ne ipan iueyitlalpan Judá, niman onokajkej nisiu on ueyikalpan Quiriat-jearim kampaka ikalakiyan tonaltsintli ne kampa aman itoka Campamento de Dan. 13 Kemaj oyajkej ipan on itepeyoj Efraín niman oajsikej ichan Micaías. 14 Kemaj on makuiltimej tlakamej yejuan oichtakatlajtlachatoj ipan iregión Lais okinmijlijkej on oksekimej tlakamej:
—¿Nenkimatij tlinon? Otikitakej ipan sen kajli onkaj sen tlakempani yejuan xkipiya imatlaken, niman dioses yejuan iyaxka Micaías niman ifamilia. Niman no onkaj sen ídolo yejuan okalauilijkej plata. ¿Tlinon nenkinemiliaj nenkichiuaskej?
15 Kemaj on yejuan oichtakatlajtlachatoj ipan iregión Lais onoxelojkej intech on oksekimej niman oyajkej ichan on telpochtli levita ichan Micaías, niman okitlajpalojkej 16 chika on 600 soldados ikan intepos yejuan kisaj itech itribu* Dan kichayaj kiauatempan. 17 On makuiltimej tlakamej yejuan oichtakatlajtlachatoj, yejuamej achtoj okalakkej ipan on kajli niman okiktikej on ídolo yejuan okalauilijkej plata, on tlakenpani yejuan xkipiya imatlaken, niman on dioses yejuan iyaxkauan Micaías, chika on tiopixki onokau kiauatempan iminuan on 600 soldados.
18 Ijkuak on tiopixki okitak ika on makuiltimej tlakamej okalakkej ichan Micaías niman okuikej on ídolo de plata, on tlakenpani yejuan xkipiya imatlaken, niman on dioses yejuan iyaxkauan Micaías niman ifamilia, okinmijlij:
—¿Tline ijkon nenkichiuaj?
19 Niman yejuamej okinankilijkej:
—¡Maka xnauati, maka xkijtoj nion se tlajtojli, niman xuajla touan! Tiknekij xtechpaleui ken tiopixki niman xmochiua totlajtolpaleuijkau ken sen tajtli yeskia para tejuamej. ¿Tlen xmás kuajli titiopixki yes itech nochi se tribu* de Israel xken san itech ifamilia se tlakatl?
20 On tiopixki okuelkak on tlen okijlijkej. Okonkuik on ídolo, on tlakempani yejuan xkipiya imatlaken, niman on dioses de ifamilia Micaías, niman oyaj iminuan on tlakamej yejuan kisaj itech itribu* Dan. 21 Yejuamej oksejpa opeu nejnemij inuan inkoneuan, inyolkauan, niman nochi tlen kipiyayaj ne inyakapan. 22 Ijkuak ye uejka yayaj, Micaías onosentlalij iuan inisiuchanejkauan niman okintojtokakej. 23 Kemaj ijkuak on tlakamej de itribu* Dan okitakej ika kintojtokaj, niman okakkej ika kinuajtsajtsilijtiuij, onokuepkej niman okitlajtoltijkej Micaías:
—¿Tlinon mopan nochiua? ¿Tline sanoyej titechtsajtsilia?
24 Niman Micaías okiminankilij:
—Nemejuamej nenkiktij nodioses yejuan nejua onikinchijchiu, niman no nenkuikaj no tiopixkau, niman nochi nennechkuiliaj. ¿Niman yej nennechtlajtoltiaj tlinon nopan nochiua?
25 Pero on tlakamej de itribu* Dan okinankilijkej:
—Maka xtechtsajtsili, pampa sekimej yejuan touan uajlauij uelis kualaniskej niman mitsuijsojkiskej, niman mitsmiktiskej iuan nochi mofamilia.
26 Ijkuak Micaías okitak ika on tlakamej de itribu* Dan sanoyej miyekej, yejua oyaj ichan, niman on tlakamej de itribu* Dan sanken* onejnenkej. 27 Okiktikej nochi on tlen Micaías okichijchijka, niman okuikakej itiopixkau, niman oajsikej ipan on ueyikalpan Lais. Ompa on chanejkej kuajlotika nemiyaj niman xitlaj* nouijsokilistli kitenmatiyaj. Pero on tlakamej de itribu* Dan okinmiktijkej nochimej on chanejkej ika iminespada niman okitlatijkej on ueyikalpan. 28 Niman pampa on ueyikalpan Lais uejka kitstikatka Sidon, niman xakaj iuan nouikayaj, xkipiyayaj akinon kinmanauis. On ueyikalpan onkatka ipan on ixtlauatl yejuan onkaj itech Bet-rehob. Sakin on tlakamej yejuan okiskej itech itribu* Dan oksejpa okichijchijkej on ueyikalpan Lais niman ompa onochantijkej. 29 Maski achtoj itoka katka Lais, yejuamej okitokayotijkej Dan ken itokakatka iminuejkatataj yejuan ikoneu katka Israel. 30 Ompa, okitlalijkej on ídolo de plata para kimauistiliayaj. Intiopixkau katka Jonatán, itelpoch Gersón niman ixuiu Moisés. Sakin iuejkakoneuan Jonatán onochijkej tiopixkej itech itribu* Dan hasta ijkuak ouetskej imak Babilonia. 31 Nochi on tonaltin ijkuak iyektiopan toTEKO onkatka ne Silo, on ídolo yejuan okichijchika Micaías ompa onkatka ipan iueyikalpan Silo.