On levita niman itlakpasiuau
19
Ipan on tonaltin ijkuak on israelitas xe kipiyayaj iminrey, sen levita tlakatl yejuan chantiya ne kampaka más uejka ipan itepeyoj Efraín, iuan onen itlakpasiuau yejuan ualeuaya ipan on ueyikalpan Belén ne Judá. 2 Pero on siuatl okitlauelkajteu on tlakatl, niman oyaj ichan itataj ne Belén. Kemaj ipan naui metstli, 3 on levita okitejtemoto para oksejpa kuikas ichan. On tlakatl okuikak itlakeual niman ome poloko. Niman on siuatl okiselij on tlakatl ichan itataj. 4 Itataj on siuatl no okiselij ikan paktli niman okijlij ma nokaua iminuan. On levita niman itlakeual onokajkej ichan itataj on siuatl yeyi tonajli, otlakuajkej, otlaonikej* niman ompa okochkej. 5 Kampa ika naui tonajli ijkuak kualkan, saniman onokuitejkej para yaskej, pero ijkuak ye yajtiaskiaj, on tajtli okijlij imon:—Xtlakua maski achijtsin chika xe tiau para tikxikos.
6 Niman on omemej oksejpa onotlalijkej, otlakuajkej niman otlaonikej*. Kemaj itataj on siuatl okijlij on tlakatl ma nokaua okse yejuajli niman ma noyolikaui kuajli. 7 Maski on levita onotelkets para yas, imontaj okichiu kanika para oksejpa okiteltij. Yejua ika onokau.
8 Ijkuak ika makuijli tonajli, onokuiteu saniman para yas ichan, pero itataj on siuatl oksejpa okijlij itlaj ma kikua chika xe yau, para kixikos. Ijki tej, onokau hasta ijki otiotlakilij. 9 Ijkuak on levita onotelkets para yas iuan itlakpasiuau niman itlakeual, imontaj okijlij ika sanoyej ye tiotlak katka, niman ika ye tlantikatka on tonajli. Niman oksejpa okijlij ma nokaua okse yeuajli niman iyolika ma nemi, para yas uajmostla saniman. 10 Pero on levita xok okinek onokau okse yeuajli. Yej oyaj iuan itlakpasiuau, itlakeual niman on ome ipoloko* yejuan yokinsillajtikaj. Ijkuak oajsikej nisiu Jebús kampa no itoka Jerusalén, 11 on tlakeuajli okijlij on levita:
—¿Ken tikita tla in tlayoua tikpanoskej ipan inueyikalpan on jebuseos?
12 Niman on levita okinankilij itlakeual:
—Xtitokauaskej ipan sen ueyikalpan tla xisraelita. Ma tiuiyan hasta Gabaa. 13 Ma tikchiuakan kanika para in tlayoua titoseuiskej ipan on ueyikalpan Gabaa noso Ramá.
14 Ijkon tej, onejnenkej. Niman ijkuak ye tlayouatikatka, oajsikej Gabaa, iueyikalpan itribu* Benjamín. 15 Kemaj okalakkej ipan on ueyikalpan para ompa onoseuijkej. Onotlalitoj plaza, pampa xakaj okinnots para onosekuiskej ichan.
16 Pero ijkuak ye tlayouatsin, opanok sen ueuentsin yejuan oualeu mijlaj ipan itekiu. Yejua on ueuetsin chantiya ken xchanej ipan on ueyikalpan Gabaa. Ompa chantiyaj on yejuan katkaj itribu* Benjamín niman on ueuentsin ualeuaya ipan itepiyoj Efraín. 17 Ijkuak on ueuentsin okintak on nejnenkej ipan on plaza, okintlajtoltij:
—¿Kanon onenualejkej niman kanon nenyauij?
18 Niman on levita okinankilij:
—Tejuamej san tipanouaj. Otiualejkej Belén ne Judá, niman tiauij ipan itepeyoj Efraín kampa más uejka, kampa nejua nichanti. Oniajka Belén niman aman ninokuepa nochana, pero nikan xakaj otiknextijkej yejuan techseuis. 19 Tikuajkij sakatl niman okseki intlakual topolokouan. No tikuajkij pan niman vino para nejua, nosiuau niman notlakeual. Xitlaj techpoloua.
20 Niman on ueuentsin okinankilij:
—Nenueliskej nenkipanoskej nochan ipan in tlayoua. Nejua nemechmakas nochi tlinon mechpolos, pero maka xmokauakan nikan ipan in plaza in tlayoua.
21 On ueuentsin okinuikak ichan. Niman chika on ueuentsin kintlakualtiaya iyolkauan on nejnenkej, yejuamej onokxipajpakkej, otlakuajkej niman otlaonikej*. 22 Chika yejuamej choj paktikatkaj, sekimej tlakamej xkuajkualtin chanejkej ipan on ueyikalpan, onotetekpankej iyeualkan on kajli, niman oksekimej opeu kimajmapeuaj itsakuijlou, niman okijlijkej on ueuentsin yejuan iyaxka* on kajli:
—¡Xkuajkixti on tlakatl yejuan otikselij nikan mochan. Tejuamej tiknekij iuan totekaskej!
23 Pero on ueuentsin ouajkis ichan niman okiniknotlajtlanilij:
—Ka, noamigos nemechtlajtlanilia maka xchiuakan on tlen xkuajli pampa in tlakatl notenotskau. 24 Xkitakan, nikan nemi nochpoch. Yejua ichpochtli, niman no nikan nemi itlakpasiuau in tlakatl. Nikinkixtis para xkinchiuilikan tlen nenkinekiskej. Pero in tlakatl maka itlaj nenkichiuiliskej.
25 Pero on tlakamej xokinekkej okakkej on ueuentsin. Yejua ika, on levita okonan itlakpasiuau niman okuajkixtij ipan ojtli, niman on tlakamej okichiualtijkej iuan onotekakej ipan nochi on yeuajli hasta ijki otlanes, niman kemaj okimakajkej. 26 Ye uajtlanestiaya ijkuak on siuatl oajsik ichan on ueuentsin kampa nemiya iueuentsin. Ompa kiauatempan ouetstajsik niman omik. 27 Ijkuak on levita onokuiteu niman okitlapoj on tsakuijlotl para kasiskia iojui, okitak itlakpasiuau ompa tlajkaltok kiauatempan niman onmajmasojtikatka ipan ipan on kiauatentli. 28 Kemaj on levita okijlij:
—Xmokuiteua, niman tiauij.
Pero on siuatl xokinankilij pampa miktoya. Kemaj on tlakatl okitlalij on mikatsintli ipan ipoloko* niman oyaj ichan.
29 Ijkuak oajsik ichan, okikuik sen cuchillo niman okitejtek majtlaktli uan ometipan itlakpasiuau. Kemaj okititlan se pedazo ipan cada tribu* de Israel. 30 Nochimej yejuan kitayaj kijtouayaj:
—Desde ijkuak on israelitas okiskej ne Egipto, xkaman nochiuaya itlaj kenin. Kuajli ma tiknemilikan tlinon tikchiuaskej.