On israelitas okintlakuepiltijkej on benjaminitas
20
Kemaj nochimej on israelitas yejuan oualejkej desde Dan hasta Beerseba, Galaad, niman onosentlalijkej san sekan ne Mizpa, ixpan toTEKO. 2 Nochimej on tlayekankej ipan itribus Israel ompa onosentlalijkej inuan on oksejkimej itlapejpeniluan Dios. Niman ompa nemiyaj 400 mil soldados ikan espadas. 3 (Itribu* Benjamín okimatkej ika on sekimej israelitas onosentlalijkej ne Mizpa.) Niman on israelitas okitlajtoltijkej on levita kenijki onochiu ika itlakpaisiuau omik. 4 Niman on levita yejuan iueuentsin* katka on siuatl yejuan okimiktijkej, okijtoj:—Nejua onajsik iuan notlakpasiuau ipan on ueyikalpan Gabaa kampa iueyitlalpan itribu* Benjamín para ompa titoseuiskiaj on tlayoua. 5 Pero sa no ipan on tlayoua on chanejkej ipan on ueyikalpan Gabaa okiyejyeualojkej on kajli kampa tinemiyaj, pampa kinekiyaj nechmiktiskej. Yej notlakpasiuau ika onajauiltijkej niman yejua ika omik. 6 Kemaj nejua oniktejtek itlalnakayo, niman oniktijtitlan se pedazo ipan cada tribu* de Israel para ma kimatikan in ueyi niman tepinajtij tlajtlakojli. 7 Aman nemejuamej israelitas xkijtokan tlinon kitocaroua nochiuas.
8 Nochimej san sekan, ouajnotelketskej niman okijtojkej:
—Xakaj nion tisemej tejuamej nokuepas ichan. 9 Achtoj tikchiuaskej suertes para tikitaskej akinomej achtoj kuijsokiskej Gabaa. 10 De intech nochimej on tribus de Israel, kisas se de cada majtlaktli tlakatl para yaskej konkuiskej tlakuajli para on soldados, chika on oksekimej kominuijsokiskej on chanejkej Gabaa pampa okichijkej tlen sanoyej xkuajli itechika Israel.
11 Nochimej on israelitas onosentlalijkej san sekan para konuijsokiskej on ueyikalpan. 12 Okintitlankej tlakamej okiteijlitoj ipan nochi iueyitlalpan itribu* Benjamín in tlajtoltin: sekimej okichijkej on tlen sanoyej xkuajli? 13 Xtechinmaktilikan yejuamej on xkuajkualtin tlakamej yejuan nemij ipan on ueyikalpan Gabaa para tikinmiktiskej, niman ijki tikchipauaskej in tlajli de israel.
Pero on benjaminitas xokinekkej okinkakkej on oksejkimej israelitas. 14 Yej nochimej on tlakamej de on uejueyikalpanmej de on itribu* Benjamín onosentlalijkej ne Gabaa para kominuijsokej on oksekimej israelitas. 15 On soldados benjaminitas yejuan oualejkej ipan oksekimej uejueyimej kalpanmej katkaj 26 mil, pero xteuan okimpojkej on 700 tlakamej yejuan ualejuaj ne Guibea yejuan okintlapejpenijkej. 16 Intech nochimej on tlakamej, nemiyaj 700 tlakamej maopocheros yejuan sanoyej ueliyaj tlamotlayaj ikan tematlatl hasta ueliyaj kimayaj sen tsontli niman xkaman kijneuayaj. 17 Pero on oksekimej israelitas okinsentlalijkej 400 mil tlakamej yejuan uelij tlauijsokij.
18 On israelitas oyajkej Betel niman ompa okitlajtoltitoj Dios katlejua tribu* achtoj kinuijsokis on benjaminitas. Niman toTEKO okinmijlij ika Judá yejua achtoj tlauijsokis.
19 Ijkon tej, on israelitas onokuitejkej saniman niman onoteltijkej nisiu Gabaa. 20 Okiminnisiuijkej on benjaminitas niman onokajkej ixpan Gabaa para kuijsokiskej. 21 Pero on benjaminitas okiskej ipan on ueyikalpan para oteixnamikkej, niman ipan on tonajli okinmiktijkej 22 mil israelitas. 22-23 Yejua ika, on israelitas oyajkej Betel. Ochokatoj ixpan toTEKO hasta ijki otlapoyau, niman ompa okitlajtoltijkej tla noneki oksejpa kinuijsokiskej iminikniuan benjaminitas. Niman toTEKO okinnauatij oksejpa ma kinuijsokitij. On israelitas onoyolejkej, niman 24 uajmostla oksejpa okinuijsokitoj on benjaminitas sano ompa kampa onouijsokkaj. 25 No ijki, on benjaminitas oksejpa okiskej ipan on ueyikalpan Gabaa, para oteixnamikkej niman okinmiktijkej 18 mil soldados israelitas yejuan kiktiyaj iminespadas. 26 Kemaj nochimej insoldados on israelitas, niman nochimej on israelitas oksejpa oyajkej Betel, ochokatoj ixpan toTEKO. Nochi on tonajli xotlakuajkej, niman okimakakej toTEKO uentin yejuan tlatlaj niman uentin de yoltlalilistli.
27-28 (Ipan on tiempo on yekcaja de ipacto* Dios onkatka Betel, niman itiopixkau katka Finees, ikoneu Eleazar, ixuiu Aarón.) Niman on israelitas okitlajtoltijkej toTEKO:
—¿Noneki oksejpa tikinuijsokiskej on tokniuan benjaminitas noso san nikan ma titoteltikan?
Niman toTEKO okiminnankilij:
—Xkinuijsokitij, pampa mostla nejua nikchiuas xtetlanikan.
29 Kemaj keskimej soldados israelitas oniyanatoj iyeualkan on ueyikalpan Gabaa, 30 Kemaj ipan on ika yeyi tonajli, on oksekimej insoldados on israelitas onotlalijkej ixpan Gabaa, para kinuijsokiskej on benjamintas ijkon ken achtoj yokichijkaj. 31 Kemaj on benjaminitas oksejpa okiskej ipan on ueyikalpan para okinmixnamikitoj on israelitas. Niman okinmiktijkej kanaj 30 israelitas ipan on ojtin, se yejuan yau Betel niman on okse yejuan yau Gabaa, niman ipan on mijlaj. 32 On benjaminitas kuitiayaj ika on israelitas oksejpa ye ontlatlaksatokej pampa yokintlankej ijkon ken okpa yokinchiuilijkaj. Pero ka, on israelitas yej san ika kichiuayaj ken cholouayaj para on intlauelikniuan ma kintojtokakan hasta neka ipan on ojtli. 33 Ijkuak on israelitas yejuan kintojtokayaj oajsikej ne Baal-tamar ompa okinchixkej on benjaminitas para kinuijsokiskej. Chika on yejuan niyantikatkaj ipan on sakayoj iyeualkan on ueyikalpan Gabaa, okiskej kampa niyantikatkaj, niman okuijsokej on ueyikalpan. 34 Katkaj 10 mil israelitas yejuan más ueliyaj tlauijsokij, yejuan okuijsokkej Gabaa. On nouijsokilistli sanoyej temojtij, niman on benjaminitas xkimatiyaj ika ye kintlantikatkaj. 35 ToTEKO okichiu para on israelitas ma kintlanikan on benjaminitas, niman on tonajli okinmiktijkej 25 mil 100 soldados yejuan kisa itech itribu* Benjamin. Nochimej kiktiyaj iminespadas. 36 Kemaj on benjaminitas okimatkej ika on israelitas yotetlankej.
Okitakej ika on israelitas tlakaj san okinekkej ma kintojtokakan on benjaminitas, pampa kimatstikatkaj ika on oksekimej tlakamej niyantikatkaj yejuan kuijsokiskiaj on ueyikalpan Gabaa. 37 In tlakamej okalakkej san ichtaka ne Gabaa niman okinmiktijkej ikan espada nochimej on chanejkej yejuan nemiyaj ipan on ueyikalpan. 38 On yejuan oniyankaj para okuijsokitoj on ueyikalpan, yokinojlijkaj iminuan on oksekimej israelitas, para ijkuak kitaskej on miyek poktli, kimatiskej ika ye kuijsoktokej on ueyikalpan. 39 On israelitas yejuan san nochiuayaj ken ye ontlatlaksatokej, okinmijlijkej ika ijkuak kitaskiaj ye nestikaj on miyek poktli ipan on ueyikalpan, imimpan uajnokuepaskiaj on bejaminitas niman kinuijsokiskiaj. Pero on benjaminitas okimiktijkej kanaj 30 israelitas ijkuak kintojtokayaj. Yejua ika, onoyolchikajkej niman okinemilijkej oksejpa ye kintlantokej ken achtoj yokinchiuilijkaj ijkuak onouijsokkaj. 40 Chika ijkon nochijtikatka, opeu kisa on miyek poktli ipan on ueyikalpan, niman ijkuak on benjamitas ontlachixkej, okontakej on temojtij tlitl niman on miyek poktli yejuan nesiya ajsitikaj* hasta ipan cielo. 41 Kemaj on israelitas onokuepkej niman okinmixnamikkej on benjaminitas, niman yejuamej sanoyej onomojtijkej ijkuak okitakej tlinon impan nochijtikaj okimatkej ika uelis mikiskej. 42 Niman oontlatlaksajkej imixpan on israelitas neka ipan on xalpatlajkan. Pero xouel onomanauijkej pampa on israelitas yejuan ouajkiskej ipan on ueyikalpan okintsakuilijkej niman okinmiktijkej. 43 On israelitas okinyejyeualojkej on benjaminitas, kemaj okimintojtokakej niman okinmiktijtiajkej desde Menuhá hasta Gabaa kampaka ikisayan tonaltsintli. 44 Ijkon omikkej 18 mil soldados yejuan kisayaj itech itribu* Benjamin niman yejuan más ueliyaj tlauijsokij. 45 Oksekimej benjaminitas oontlatlaksajkej ipan on xalpatlajkan niman oajsikej kampa onkaj on ueyitetl itoka Rimón. Pero 5 mil okiminmiktijkej ipan ojtli niman on israelitas sanken* kintojtokayaj hasta Gidom, niman okimintlankej okse 2 mil tlakamej. 46 Nochimej on yejuan ipan on tonajli omikkej yejuan kisayaj itech itribu* Banjamín katkaj, 25 mil soldados yejuan más ueliyaj tlauijsokij. 47 Pero 600 benjaminitas oyajkej ipan on xalpatlajkan, niman onokajkej naui metstli ne kampa onkaj on ueyi tetl itoka Rimón. 48 On israelitas okinuijsokkej on oksekimej benjaminitas niman kinmiktijtiayaj ipan cada ueyikalpan. No kinmiktijtiayaj yolkej niman nochi tlen kinextiayaj ipan iminojui, niman kintlatiayaj on uejueyikalpanmej.