Oksejpa peua itribu* Benjamín
21
On israelitas okitestigojtlalijkaj toTEKO ipan on ueyikalpan Mizpa ika imichpochuan xkinkauiliskej ma nonamiktikan iuan sen tlakatl benjaminita. 2 Pero kemaj on israelitas onosentlalijkej ne Betel niman onenkej ixpan Dios hasta tlapoyajkan chokayaj, niman ijkin kijtouayaj: 3 "¡Ay toTEKO, Dios de israel!¿Tline topan onochiu yejua in?
¿Tline aman se poliui itribu* Israel?"
4 Uajmostla on israelitas onokuitejkej saniman. Okichijchijkej sen tlaixpan* niman okimakakej toTEKO uentin yejuan tlatlaj niman uentin de yoltlalilistli. 5 Niman notlajtoltiayaj: “¿ Yakaj nemi nikan yejuan xonosentlalij touan ne Mizpa?” (Ijkon okijtojkej pampa yokitlajtolmakakaj toTEKO ika yejuan xnosentlaliskiaj iminuan, kinmiktiskiaj.)
6 On israelitas sanoyej najmanayaj ipampa on tlen impan onochiu on benjaminitas yejuan no imikniuan. Niman ijkin nojliayaj: “Ipan in tonajli se itribu* Israel yopoliu. 7 ¿Tlinon tikchiuaskej para tikintejtemouiliskej siuamej on tlakamej benjaminitas yejuan xomikkej? Tejuamej otiktestigojtlalijkej toTEKO ika xtikinmakaskej tochpochuan para iminuan nonamiktiskej.
8 ¿Nemi nikan yakaj israelita yejuan xouajlaj ixpan toTEKO ne Mizpa?” Kemaj okelnamikkej ika on yejuan ualeuaj Jabes de Galaad xakaj teuan onosentlalijkaj, 9 pampa ijkuak okipanoltijkej lista xakaj otlanankilij yejuan ualeua ipan on kalpan. 10-11 Kemaj on israelitas okisepanmatkej niman okititlankej 12 mil soldados yejuan más uelij tlauijsokij para okinmiktitoj ikan espada nochimej on chanejkej ipan on kalpan Jabes. Nochimej okinmiktijkej, tlakamej, kokonej niman siuamej yejuan xok ichpokamej. 12 Ipan on kalpan Jabes, tetsajlan okinextijkej 400 ichpokamej yejuan xe nonamiktiayaj niman okinuikakej ipan on campamento itech on ueyikalpan Silo yejuan onkaj ipan on tlajli Canaán.
13 Kemaj nochimej on israelitas otlanauatijkej ma kintejtemotij on benjaminitas yejuan nemiyaj ne kampa onkaj on ueyi tetl itoka Rimón, niman okintlajtlanilijkej ma noyoltlalikan iminuan. 14 On benjaminitas onokuepkej niman on israelitas okinmakakej on siuamej yejuan okinuajuikakej ne Jabes. Pero on siuamej xotlajxilijkej para nochimej on tlakamej.
15 On israelitas sanoyej onajmankej ipampa itribu* Benjamín, pampa toTEKO okixpoloj on tribu* niman ijkon opoliu sen tribu* intech on israelitas. 16 Niman on tlayekankej israelitas notlajtoltiayaj: “¿Kanon tikominanaskej siuamej para tikinmakaskej on oksekimej tlakamej benjaminitas yejuan kimpoloua iminsiuau, pampa nochimej on siuamej benjaminitas otlan kinmimiktiaj?” 17 Itribu* Benjamín sanken* kitocaroua nemis kampa okikajkej intech totribus. Intechkopa on yejuan xomikkej, noneki tlaskaltiskej para maka poliuis nion se tribu* intech on israelitas. 18 Pero tejuamej xuelis tikinmakaskej tochpochuan para inuan ma nonamiktikan, pampa tinochimej otitotlajtolmakakej ika xtikinmakaskej tochpochuan on benjaminitas. Tla yakaj ijkon kichiuas, ipan uetsis tlauelijli. 19 Pero cada xipan onkaj se ueyi iluitl para toTEKO ipan on ueyikalpan Silo yejuan nokaua inorte ika on ueyikalpan Betel, kampaka ikisayan tonaltsintli ipan on ojtli yejuan yau Betel niman Siquem, niman kampaka sur de on ueyikalpan Lebona.
20 Kemaj intlayekankauan on israelitas okintitlanilijkej in tlajtojli on benjaminitas:
—Xuiyan, xmiyanakan ijtik on uvasyo ne nisiu Silo. 21 Niman ijkuak nenkitaskej uajnijtotijtiuij san sekan on ichpokamej yejuan ualeuaj ipan on ueyikalpan Silo, xuajkisakan kampa nenmiyantokej, niman cada se nemejuamej xkajsikan sen ichpochtli niman kemaj xkuikakan nemochan. 22 Niman tla imintajuan noso iminikniuan on ichpokamej uajlauij techajtlajtoltiaj tline temechkauiliaj ijkon nenkichiuaj, ijkin tikinnankiliskej: "Temechtlajtlaniliaj ken sen ueyi favor para xkintlapojpoluikan, pampa tejuamej xouel otikinnextijkej siuamej para nochimej yejuamej ijkuak otikuijsokkej on kalpan Jabes. Niman pampa on nemochpochuan xsan onenkinekkej onenkinmakakej, nemejuamej xnenkipiyaj tlajtlakojli de on tlajtolmakalistli."
23 On benjaminitas onokalaktijkej kichiuaskej on tlen okinmijlijkej. Ijkon tej, cada se okajsik sen ichpochtli yejuan uajnijtotijtiaya niman okuikak. Kemaj oyajyajkej ipan imintlal niman oksejpa opeu kinchijchiuaj on uejueyikalpanmej.
24 On oksekimej israelitas no oyajyajkej, cada se onokuep itech itribu, itech iueyifamilia niman ipan itlal.
25 Ipan on tonaltin on israelitas xkipiyayaj sen rey, niman cada se kichiuaya tlinon yejua kinekiya.