Jueces 14

Ononamiktij Sansón

Se tonajli Sansón oyaj ipan on kalpan Timná, niman ompa okitak sen ichpochtli filistea. 2 Niman ijkuak onokuep ichan, okintlajtlajtouilij itajuan niman okinmijlij:

—Onikitak sen ichpochtli filistea ne ipan on kalpan Timná. Nikneki xnechtlajtlanilitij on ichpochtli para iuan ninonamitis.

3 Pero itajuan okijlijkej:

—¿Tline tias tikontejtemos mosiuau intech on filisteos yejuan xtlaneltokaj? ¿Tlen xok nemij siuamej intech in yejuan ken tikintaj, noso intech nochimej on israelitas?

Kemaj Sansón okiminnankilij:

—On ichpochtli nejua yonikuelitak, niman nejua nikneki. Xnechtlajtlanilitij para nosiuau yes.

4 (Itajuan xkimatiyaj ika toTEKO yejua ijki kinekiya ma nochiua, pampa kitejtemouaya kenijki peuas kinuijsokis on filisteos, yejuan ipan on tonaltin sanoyej kimintlajyouiltiayaj on israelitas.) 5 Ijkon tej, Sansón niman itajuan oyajkej ipan on kalpan Timná. Ijkuak Sansón oajsik kampaka uvasyoj nisiu on kalpan Timná, sen león yejuan san konetl katka, ipan ochapantiaj Sansón niman chikauak nanalkaya. 6 Pero iespíritu toTEKO okalak ipan Sansón, niman san ika imauan, okojkoton on león ken itlaj chivito yeskia . Pero xitlaj* okinmijlij itajuan on tlen onochiu. 7 Kemaj oyaj ipan on kalpan Timná niman iuan otlajtlajtoj on ichpochtli yejuan yokuelitaka.

8 Ijkuak yopanok keski tonajli, Sansón yaya ichan on ichpochtli para nonamiktis. Kemaj, yejua okitlalkauij on ojtli para okitato on león yejuan okimiktijka. Niman okitak ika ipan imikatlakayo on león nemiyaj nekuyolkatsitsimej, niman onkatka sen tekamasosojli yejuan kipiyaya nekutli. 9 Kemaj Sansón okontilan on tekamasosojli para okixtilij nekutli niman kikuakuajtiaya. Ijkuak oksejpa okinmajsito itajuan okiminmakak on nekutli niman no okuajkej, pero xokinmijli ika on nekutli okikuik ipan on león yejuan okimiktijka.

10 Itataj Sansón oyaj okitato on ichpochtli. Niman Sansón okichiu sen iluitl ijkon ken kichiuanij on telpokamej ijkuak se ye nonamiktis. 11 Ijkuak on filisteos okitakej Sansón, okuikakej 30 tlakamej para ompa iuan ma nemikan. 12 Kemaj Sansón okinmijlij on 30 tlakamej:

—Nemechijlis sen tlanemililtlajtojli, niman tla ipan chikome tonajli kech ika uejkauis in iluitl nennechijliaj tlinon kijtosneki in tlanemililtlajtojli, cada se nemejuamej nemechmakas sen tlakempani de lino yejuan más kuajli niman sen tlakentli* yejuan de iluitl. 13 Pero tla xnenkimatij tlinon kijtosneki, cada se nemejuamej nechmakas sen tlakempani de lino yejuan más kuajli niman sen tlakentli* yejuan de iluitl.

Yejuamej okinankilijkej:

— Xtechijlijtetsi on tlanemililtlajtojli aman chika timitskaktokej.

14 Niman Sansón okijtoj on tlanemililtlajtojli:

"Ipan on yolki tekuani okis tlakuajli,

itech on sanoyej kojtik okis tsopelilistli."

Ijkuak opanok yeyi tonajli, yejuamej xe kimatiyaj tlinon kijtosneki on tlanemililtlajtojli. 15 Niman ipan naui tonajli, okijlijkej isiuau Sansón:

—Xchiua kanika para moueuentsin ma techijli tlinon kijtosneki on tlanemililtlajtojli, pampa tla xtitechijlia tiktlatiskej ifamilia motataj niman tejua no teuan titlatas. ¡Nesi ken nemejuamej onentechnotskej san para nentechkuiliskej on tlen toyaxka!

16 Kemaj yejua okitato Sansón, niman ika ichokilis okijlij:

—¡Tejua xtinechneki! ¡Tejua yej tinechtlauelita! Noamigos, yotikinmijlij sen tlanemililtlajtojli, pero nejua xtinechchijlia tlino kijtosneki.

Niman Sansón okinankilij:

—Nion notataj, nion nonanaj xnikinmijlia. ¿Tline nimitsijlis tejua?

17 Pero yejua nochipa chokaya ixpan iueuentsin* nochi on chikome tonajli de on iluitl. Niman pampa sa chika kitlajtoltiaya kampa ika chikome tonajli, Sansón okijlij tlinon kijtosneki on tlanemililtlajtojli. Kemaj yejua, okinmijlito iamigos tlinon kijtosneki on tlanemililtlajtojli. 18 Niman kampa ika chikome tonajlli, ijkuak xe kalakiya tonaltsintli on tlakamej oyajkej okijlitoj Sansón:

"Xitlaj onkaj más tsopelik kenon nekutli.

Nion xnemi itlaj más kojtik ken sen león."

Kemaj Sansón okinnankilij:

"San pampa onentlaxoponijkej ikan nosiuauakaxkoneu

ouel onenkimatkej tlinon kijtosneki on tlanemililtlajtojli."

19 Kemaj iespíritu toTEKO nimantsin ouajlaj ipan Sansón niman onokuep sanoyej kojtik, niman yejua oyaj Ascalón. Niman ompa okinmiktij 30 tlakamej yejuan chanejkej ompa ne. Yejua okinkuilij imintlaken, niman ika okintlaxtlauilij on tlakamej yejuan okimatkej on tlin kijtosneki on tlanemililtlajtojli. Kemaj Sansón oyaj ichan itataj sanoyej okualantiaj. 20 Niman sakin*, isiuau Sansón okinamiktijkej iuan sen iamigo yejua.