Otlakat Sansón
13
Pero on israelitas oksejpa okichijkej tlen xkuajli ixpan toTEKO, yejua ika toTEKO okintemaktilij 40 xipan intech on filisteos.2 Ipan on ueyikalpan itoka Zora, nemiya sen tlakatl yejuan itoka katka Manoa. Yejua kisaya itech itribu* Dan. Isiuau xkaman otlaskaltij pampa tetsakatl* katka. 3 Pero sen ángel yejuan toTEKO okuajtitlan ouajnonextij itech isiuau Manoa, niman okijlij: "Tejua xkaman ueli tikimpiya mokoneuan, pero timokoneanas niman tikpiyas sen motlakakonetsin. 4 Maka tikonis vino nion itlaj okse yejuan tetlauantij niman maka tikuas itlaj tlakuajli yejuan xchipauak ixpan toTEKO. 5 Tikpiyas sen mokonetsin, yejuan xkaman kiximaskej pampa yejua ikatlakajtli yes ken nazareoa itech Dios desde ijkuak xe tlakati. Niman yejua peuas kinmanauis on israelitas inmak on filisteos."
6 Kemaj on siuatl oyaj okitlajtlajtouilito iueuentsin* niman okijlij: "Sen tlakatl yejuan okuajtitlan Dios, ouajlaj kampa nejua ninemiya. Yejua onechmojkatlachaltij pampa nesiya ken iángel toTEKO. Nejua xoniktlajtoltij akin yejua, nion yejua xonechijli akinon. 7 Pero onechijlij ika nejua ninokoneanas niman nikpiyas nokonetsin, niman desde aman xok nikonis vino, nion itlaj okse yejuan tetlauantij. Niman no onechijlij xnikuas itlaj tlakuajli yejuan xchipauak ixpan toTEKO, pampa on tlakakonetsintli teyaxka* yes itech Dios ken nazareo desde ijkuak xe tlakati hasta kaman mikis."
8 Kemaj Manoa onoueyikatsajtsilij ixpan toTEKO niman okijlij: "Nejua nimitsiknotlajtlanilia noTEKO, oksejpa xkuajtitlani totech on tlakatl yejuan otikuajtitlanka. Ma techijliki kenijki tikiskaltiskej tokoneu yejuan tlakatis."
9 Dios okichiu on tlen Manoa okitlajtlanilij, niman iángel toTEKO oksejpa ononextij kampa nemiya on siuatl ijkuak nemiya mijlaj. Niman ika Manoa xompa iuan nemiya, 10 yejua onotlaloj, okinotsato, niman okijlij:
—¡Xkaki, on tlakatl yejuan onikitaka okse tonajli, aman oksejpa yonechnotitij!
11 Kemaj Manoa oyaj iuan isiuau kampa nemiya on tlakatl niman okijlij:
—¿Tejua otiknotska nosiuau okse tonajli?
Niman on tlakatl okinankilij:
—Kemaj, nejua.
12 Kemaj Manoa okitlajtoltij:
—Ijkuak nochiuas on tlen tejua yotitechijlij, ¿kenijki tikiskaltiskej on konetsijtli? ¿Niman kenijki tikixtlamachtiskej yejua?
13 On ángel yejuan toTEKO okuajtitlan okinankilij:
—Noneki para mosiuau ma kichiua nochi ken yoniknauatij: 14 “Onikijlij: ‘Maka konis vino nion itlaj okse yejuan kisa itech uva noso yejuan tetlauantij, nion maka kikuas itlaj yejuan xchipauak ixpan toTEKO. San ma kichiua nochi tlen yoniknauatij.’”
15 Kemaj Manoa okijlij on ángel yejuan toTEKO okuajtitlan:
—Nimitstlajtlanilia xmokaua touan niman timitsikxitiliskej sen chivito para tikuas.
16 Pero on ángel yejuan toTEKO okuajtitlan okinankilij:
—Maski tla ninokauaskia, xniueliskia nitlakuaskia nemouan, pero on chivito uelis tikuentlalilis toTEKO, sen uentli yejuan nochi tlatla.
(Manoa xkimatiya ika on tlakatl yejua on ángel yejuan toTEKO okuajtitlan.)
17 Kemaj Manoa okijlij on ángel yejuan toTEKO okuajtitlan:
—Xtechijli kenijki motoka para ijki uelis timitstlajsokamachiliskej ijkuak nochiuas on tlen yotitechijlij.
18 Pero on ángel yejuan toTEKO okuajtitlan okinankilij:
—¿Tline tikneki tikmatis notokaj? Notoka sanoyej tetlatlachalti.
19 Kemaj Manoa okonan on chivito niman okonkuik on uentli de trigo. Kemaj okintlalij ipan sen tetl niman okinuentlalilij toTEKO ken sen uentli yejuan nochi tlatla. Kemaj toTEKO okichiu on tlen milagroso ixpan Manoa niman isiuau. 20 Ijkuak on tlitl de on tlaixpan* otlejkok, Manoa niman isiuau okitakej on ángel yejuan toTEKO okuajtitlan otlejkotiaj iluikak ijtik on tlitl. Kemaj yejuamej onotlankuantelketskej niman onopachojkej hasta ipan tlajli. 21 Manoa okimat ika on tlakatl katka on ángel yejuan toTEKO okuajtitlan, niman on ángel xokaman oksejpa onoteititij, itech Manoa nion itech isiuau. 22 Niman Manoa okijlij isiuau:
—¡Aman kemaj timikiskej pampa yotikitakej toTEKO Dios!
23 Pero yejua okinankilij:
—Tla toTEKO kinekiskia techmiktis, xkiseliskia on uentli kyejuan nochi tlatlak, nion on uentli de trigo, nion xtechkauiliskia tikitaskiaj in tlajtlamach*. Niman no ijki xtechijliskia nochi on tlen yotechijlij.
24 Oyejkok on tonajli ijkuak on sisiuatl okipix sen tlakakonetl niman okitokayotij Sansón. Niman on tlakakonetl noskaltiaya, niman toTEKO kitiochiuaya. 25 Se tonajli, ijkuak Sansón nemiya ipan icampamento Dan, yejuan nokaua entre on uejueyikalpanmej Zora niman Estaol, iespíritu toTEKO opeu kimaka miyek fuerza.