Jefté niman itribu* Efraín onouisojkej
12
On tlakamej yejuan kisaj itech itribu* Efraín onosentlalijkej niman okipanokej on río Jordán niman oyajkej ipan on ueyikalpan itoka Zafón. Niman okijlijkej Jefté:—¿Tline xotitechijlij para ma tiuiyan mouan ijkuak otikinuijsokito on amonitas? ¡Aman tiktlatiskej mochan niman tejua ompa tinemis ijtik para teuan xtlatla!
2 Jefté okinminankilij:
—Nejua niman nochanejkauan otikpixkej sen ueyi tlauejli iminuan on amonitas. Niman nejua onemechtekuitlan, pero nemejuamej xonenuajlajkej onentechpaleuikoj. 3 Ijkuak onikitak ika xonenualajkej onentechpaleuikoj, onikinuijsok on amonitas maski ueliskia nimikiskia, niman toTEKO onechpaleuij para ma nitetlani. ¿Aman, tline nenuajlauij para nennechuijsokiskej?
4 Pero itribu Efraín ijkin otenankilij:
—Nemejuamej galaaditas, san topal nenchantij ipan in totlalpan, pampa nenchantij ipan inueyitlalpan itribu Efraín niman de Manasés.
Kemaj Jefté okinsentlalij nochimej on tlakamej Galaaditas, niman okinuijsokej itribu* Efraín, niman okitlankej. 5 On Galaaditas okitsakukej nochiuiyan on río Jordán kampa ueli panolo para yauij ipan on ueyitlalpan Efraín. Niman ijkuak sen Efrainita kitlajtlaniya ma kauilikan ma pano, on Galaaditas kitlajtoltiayaj tla efrainita. Tla tenankiliaya ika ka, 6 kijliayaj ma kijto "Shibolet". Niman tla kijtouaya "Sibolet", pampa on efrainitas xueliyaj kijtouayaj kuajli, kajsiyaj niman kimiktiayaj ompa ipan on río Jordán kampa ueli panolo. Niman ijkuakon okinmiktijkej 42 mil tlakamej efrainitas.
7 Jefté okinyekan on israelitas chikuasen xipan. Ijkuak omik, okitôkakej ne Galaad kampa yejua otlakatka.
Ibzán onochiu juez
8 Sakin ijkuak yomik Jefté, kej Ibzán yejuan ualeua Belén, yejua okinyekan on israelitas. 9 Yejua okipix 30 itelpochuan niman 30 ichpochuan, niman nochimej okiminnamiktij iminuan yejuan xchanejkej. Ibzán okinyekan on israelitas chikome xipan. 10 Niman ijkuak omik okitôkakej Belén.
Elón onochiu juez
11 Sakin, Elón yejuan kisa itech itribu* Zabulón kej yejua okinyekan on israelitas majtlaktli xipan. 12 Niman ijkuak omik okitôkakej ne Ajalón ipan iueyitlalpan itribu* Zabulón.
Abdón onochij juez
13 Sakin, Abdón, ikoneu Hilel, yejuan ualeua ipan on ueyikalpan itoka Piratón, kej yejua okinyekan on israelitas, 14 chikueyi xipan. Abdón okimpix 40 itelpochuan niman 30 ixuiuan yejuan tlakamej, niman cada se kipiyaya ipoloko*. 15 Ijkuak omik okitôkakej ipan on ueyikalpan Piratón, yejuan onkaj ipan iueyitlalpan Efraín, ipan itepeuan Amalec.