Jefté onochiu juez niman okinmanauij on israelitas intech on amonitas
11
Jefté katka sen tlakatl yejuan chantiya ipan on tlajli Galaad, niman xmojki katka niman ueliya tlauijsokiya. Itataj itoka katka Galaad niman inanaj katka sen siuaauilnenki. 2 Galaad kimpiyaya oksekimej ikoneuan iuan yejuan kuajli isiuau. Niman ijkuak on ikoneuan onoskaltijkej, okitotokakej Jefté, niman okijlijkej ika xitlaj* kiselis herencia itech itataj pampa yejua okse inanaj katka. 3 Kemaj Jefté ocholojteu de intech ikniuan, niman ochantito ipan on región Tob. Ompa onosentlalij iminuan on tlakamej yejuan sanoyej xkuajkualtin . Yejuamej iuan kisayaj Jefté niman kichiuayaj tlen sanoyej xkuajli.4 San xuejkajtika, on amonitas okinuijsokkej on israelitas. 5 Yejua ika, on tlayekankej de Galaad okanatoj Jefté ipan on región itoka Tob, 6 niman okijlijkej:
—Xuajla, tiknekij tejua titechyekanas para tikinuijsokiskej on amonitas.
7 Niman Jefté okiminnankilij:
—¿Tline nejua onennechitakoj? Nemejuamej nennechtlauelitaj niman yejua ika onennechajkixtijkej ichan notataj. Tla ijkon tej, ¿tline nennechtejtemouaj aman ijkuak nentlajyouiyaj?
8 Kemaj ijkin okinankilijkej:
—Yejua ika tej, pampa titlajyouiyaj otimitstejtemokoj. Tiknekij xtechpaleui, niman xkinuijsokiti on amonitas. Niman no tikenekij tejua xtechyekana tinochimej yejuan tichantij ipan in tlajli Galaad.
9 Kemaj Jefté okinmijlij:
—Tla ninokuepas nemouan para nikinuijsokis on amonitas, niman tla toTEKO nechinmaktilia, ¿Nennechkalaktiskej ken nemotlayekankau?
10 Niman kemaj on tlayekankej okinankilijkej:
—ToTEKO yejua totestigo ika tikchiuaskej nochi on tlen tejua yotikijtoj.
11 Kemaj Jefté oyaj iminuan on tlayekankej, niman on chanejkej okitenejkej imintlayekankau. Niman ne Mizpa Jefté oksejpa okijtoj ixpan toTEKO on pacto* yejuan yokinmijlijka on tlayejkankej.
Jefté okititlan sen tlajtojli itech iminrey on amonitas
12 Kemaj Jefté okintitlan keskimej itlajtojkauan itech iminrey on amonitas para ma kitlajtoltikan: ¿Tlinon tikneki nouan ika aman tiuajlau tikuajuijsoki nopaís”?
13 Niman iminrey on amonitas okiminankilij on itlajtojkauan Jefté: "Ijkuak nemejuamej israelitas onenkiskej Egipto, onentechkuilijkej totlaluan desde on río Arnón hasta on ríos Jaboc niman Jordán. Aman tej, san kuajlotika xnechinkuepili."
14 Kemaj Jefté okintitlan oksekimej itlajtojkauan, itech iminrey on amonitas, 15 para ijkin ma kijlitij:
"Ijkin kijtoua Jefté: 'Tejuamej yejuan tiisraelitas xotemechkuilijkej imintlaluan on moabitas, nion de on amonitas. 16 Yej ijkuak otikiskej Egipto, otipanokej on xalpatlajkan niman on Mar Rojo, niman kemaj otajsikej hasta Cades. 17 Kemaj on israelitas okintitlankej keskimej tlatojkamej itech iminrey on edomitas para otiktlajtlanilijkej ma techkauili ma tipanokan ipan iueyitlalpan, pero yejua xotechkauilij otipanokej. No otiktlajtlanilijkej on rey de Moab. Pero no xotechkauilij otipanokej. Yejua ika, otitokajkej ne Cades. 18 Sakin ijkuak tikistinemiyaj ipan on xalpatlajkan, otikyeualojtiajkej iueyitlalpan Edom niman iueyitlalpan Moab hasta otajsikej itenko on tlajli Moab kampaka ikisayan tonaltsintli. Niman ompa otitochachantijkej ipan okse itenko on río Arnón. Pero xotikpanokej on río pampa ompa peuaya iueyitlalpan Moab. 19 Kemaj otikintitlankej keskimej tlajtojkamej itech Sehón iminrey on amorreos yejuan nemiya Hesbón. Otiktlajtlanilijkej para ma techkauili ma tipanokan ipan iueyitlalpan, para tejuamej tiaskej ipan totlaluan. 20 Pero Sehón oometlamat totechkopa niman xotechkauili ma tipanokan ipan iueyitlalpan. Yej okinsentlalij nochimej isoldados niman onochachantitoj ne Jahaza, niman otechuijsokito. 21 Pero toTEKO, iDios Israel, tejuamej tiitlapejpeniluan otechinmaktilij, niman otiktlankej Sehón iuan isoldados. Niman otiktoyaxkatijkej nochi iminueyitlalpan on amorreos ipan on iminregión. 22 Otiktoyaxkatijkej nochi imintlal on amorreos desde on río Arnón hasta on río Jaboc, niman desde on xalpatlajkan hasta on río Jordán. 23 ¿Niman aman tikneki titechkuilis on tlen toTEKO Dios okinkuilij on amorreos para otechmakak tejuamej? 24 Tla Quemós, on modios, mitsmaka itlaj, tejua tikijtoua ika moyaxka, ¿Xnejli? Ijkon tej, tejuamej no ijki tikijtouaj ika toyaxka on tlen toTEKO otechyaxkatij. 25 Tlen ken tikmati tejua más tiueyixtikaj xken Balac, ikoneu Zipor, yejuan irey Moab? Yejua xkaman otechuijsok. 26 Ye kipiya 300 xipan ika tichantij ipan on uejueyikalpanmej Hesbón, Aroer niman nochi on kalpanmej pipitikej yejuan onokej nisiu. Niman no tichantij impan on uejueyikalpanmej yejuan onnokej itenko on río Arnón. ¿Tline xonentechtlajtlanilijkej on tlaltin ipan nochi in tiempo yopanok? 27 Nejua xitlaj* onimitschiuilij tlen xkuajli. Yej tejua tikchijtikaj tlen xkuajli pampa tiuajlau titechuijsoki. Pero toTEKO yejua teyolkuitijketl. Yejua kichiuas para ma tikitakan akinomej kuajli kichiuaj, tla on israelitas noso on amonitas.' "
28 Pero iminrey on amonitas xokinek okak itlajtol Jefté.
Ipromesa Jefté niman itetlanilis intech on amonitas
29 Kemaj iespíritu toTEKO ouajla ipan Jefté, niman yejua oyaj ipan on tlajli Galaad niman on tlajli Manasés, niman kemaj opanok Mizpa ipan on tlajli Galaad. Kemaj opanoto ipan intlal on amonitas. 30 Niman Jefté okimakak toTEKO sen promesa niman ijkin okijlij : "Tla tikchiuas para ma nikintlani on amonitas, 31 nejua nimitsmakas ken sen uentli yejuan nochi tlatla on akin achtoj uajkisas nochan para nechajnamikis, ijkuak nejua yoniuajnokuepato yonitetlanito ipan on tlauijsokilistli."
32 Jefté opanoto ipan iminueyitlalpan on amonitas, okinuijsok niman toTEKO okichiu para ma kintlani. 33 Jefté okinmiktij miyekej itlauelikniuan niman okintlan 20 uejueyikalpanmej desde Aroer, iuan Minit, hasta Abel-keramin. On israelitas ijkin okintlankej on amonitas.
34 Ijkuak Jefté onokuep ichan ne Mizpa, ichpoch yejuan san kanochi ikoneu okinamikiko uajnijtotijtiaya niman kuajtsotsontiaya sen pandero. 35 Ijkuak Jefté okitak, okitsayantiaj itlaken pampa ijki kiteititiaya on ueyi ajmantli, niman okijlij:
—¡Ay nokoneu, sanoyej ninoyolkokoua! ¡Niman on san mopampa tla sanoyej ninoyolkokoua pampa onikchiuilij sen promesa toTEKO,niman aman ika onkaj nikchiuas!
36 Niman yejua okinankilij:
—Notataj, xnechchiuili ken otikijlij toTEKO, pampa yejua yokichiu tlinon otiktlajtlanilij. Otikintlan motlauelikniuan on amonitas. 37 San nimitsiknotlajtlanilia, xnechmaka ome metstli para nias ipan tepemej iminuan noamigas, para nichokas ika nimikis sanken* niichpochtli.
38 Jefté okimakak on ome metstli. Niman ipan on tonaltin yejua okistinen ipan on tepemej inminuan on ichpokamej niman chokayaj pampa mikiskia sanken* ichpokatl. 39 Ijkuak yotlan on tonaltin, onokuep kampa nemiya itataj, niman Jefté okichiu on tlen okiprometerouilij toTEKO. Ichpoch Jefté omik ijkuak xe notekaya iuan yakaj tlakatl. 40 Yejua ika, cada xipan on ichpokamej yayaj naui tonajli konchokiliayaj ichpoch Jefté.