Tola onochiu juez
10
Sakin ijkuak Abimelec yomik, Dios okitlalij sen temanauijketl intech on israelitas. On tlakatl itokatka Tola yejuan kisaya itech itribu* Isacar. Ikoneu katka Fúa niman ixuiu katka Dodo. Tola chantiya ipan on ueyikalpan itoka Samir ipan itepeyoj Efraín, 2 niman okinyekan on israelitas 23 xipan hasta kaman omik. Niman okitôkakej ipan on ueyikalpan Samir.Jair onochiu juez
3 Kemaj Dios okitlalij okse tlayekanketl intech on israelitas. Yejua itoka katka Jair, yejuan ualeuaya Galaad niman okinyekan on israelitas 22 xipan. 4 Jair okimpix 30 itelpochuan. Cada se kipiyaya ipoloko*, niman cada se kipiyaya iueyikalpan ipan iueyitlalpan Galaad kampa tlamandarouaya. On 30 uejueyimej kalpanmej sanken* kintokayotiaj iuejueyikalpanuan Jair.
5 Ijkuak Jair omik, okitôkakej ipan on ueyikalpan Camón.
On filisteos niman amonitas okintlajyouiltijkej* on israelitas
6 Pero on israelitas oksejpa okichijkej tlen xkuajli ixpan toTEKO niman opeu kinmauistiliaj iminixneskayouan on ídolos Baal, niman Astarot. Niman no kinmauistiliayaj on dioses de on naciones Siria, Sidón, Moab, Amón niman Filistea. Okitlalkauijkej toTEKO niman xok okimauistilijkej. 7 Yejua ika toTEKO sanoyej okualan iminuan niman okintemaktilij intech on filisteos niman amonitas. 8 Desde ijkuakon, para 18 xipan on filisteos niman on amonitas, sanoyej okintlajyouiltijkej* on israelitas, yejuan chantiyaj Galaad, iokse lado on río Jordán kampaka ikisayan tonaltsintli, ipan iminueyitlalpan on amorreos. 9 On amonitas no okipanokej on río Jordán para okinuijsokitoj on intribus Judá, Benjamín niman Efraín. On israelitas sanoyej kintlajyouiltiayaj niman xok kimatiyaj kenijki nomanauiskej. 10 Kemaj okitsajtsilijkej toTEKO, niman okijlijkej: "toTEKO Dios, yotitlajtlakojkej mixpan, pampa otimitstlalkauijkej. Yej otikinmauistilijkej on yejuan xnejli dioses."
11 Niman toTEKO okiminnankilij: "Nemejuamej omechtlajyouiltijkej on egipcios, amorreos, amonitas, 12 sidonios, amalecitas niman on madianitas. Niman ijkuak nemejuamej onennechtlajtlanilijkej ma nemechmanaui, nejua onemechmanauij. 13 Pero maski onemechpaleuij, nemejuamej onennechtlalkauijkej niman onenkinmauistilijkej oksekimej yejuan xnejli dioses. Yejua ika, nejua xokaman nenmechmanauis. 14 ¡Xuiyan xkintlajtlanilitij on yejuan xnejli dioses yejuan onenkintlapejpenijkej! ¡Yejuamej ma mechmanauikan ijkuak xok nenkimatij kenijki nemomanauiskej!"
15 Kemaj on israelitas okinankilijkej toTEKO: "Yotitlajtlakojkej. Xtechchiuili tlen tejua tiknekis, pero aman xtechikneli* niman xtechmanaui." 16 Kemaj, on israelitas okinxoxotonijkej on dioses para oksejpa okimauistilijkej toTEKO. Niman toTEKO xok okixikoj kitas kenijki tlajyouiyayaj on israelitas.
17 Ijkuak on amonitas onosentlalijkej niman onochachantijkej ne Galaad, on israelitas onosentlalijkej niman onochachantijkej ne Mizpa. 18 On israelitas yejuan chantiyaj ne Galaad niman imintlayekankauan, onoijlijkej: “On yejuan tlayekanas para kominuijsokiskej on amonitas, yejua tlayekanki yes imintech nochimej on chanejkej Galaad.”