Abimelec, itelpoch Gedeón sano yejua onoteneu rey
9
Abimelec on ikoneu Jerobaal oyaj Siquem niman okinminotsato itiojuan yejuan ikniuan inanaj. Niman okinmijlij:2 —Tla tejuamej melauak ken titotaj, nemechtlajtlanilia para xkintlapololtikan on chanejkej ne Siquem, ika más kuajli tla kinyekanas san se tlakatl, xken tla nochimej on 70 tlakamej, yejuan ikoneuan Jerobaal. Xkelnamikikan ika nejua no ken nemechita.
3 Niman pampa Abimelec infamilia katka, okuelitakej on tlen okinmijlij. Niman kemaj okinmijlikej on tlakamej de Siquem para ma iuan ma uiyan, niman yejuamej no okuelitakej pampa okijtojkej: “Yejua ken tokniu”. 4 No ijki okuikej 70 tomin de plata yejuan okixtijkej ipan itiopan Baal-berit, niman okimakakej Abimelec. Ika in tomin, Abimelec okintlakeu keskimej tlakamej yejuan sanoyej xkuajkualtin para oyajkej iuan. 5 Oyajkej ne Ofra kampa ochantika Jerobaal on itataj, niman ipan se ueyi tetl okiminmiktijkej on 70 ikniuan Abimelec. San ouel oniyan niman onomanaui Jotam, yejuan más konetl de ikoneu Jerobaal. 6 Sakin nochimej on chanejkej Siquem niman Bet-milo onosentlalijkej itsintlan on auakojtli niman itech on tetl yejuan kimauistiliayaj, yejuan onkatka ne Siquem kampa Abimelec okalaktijkej rey.
7 Ijkuak Jotam okimat, otlejkok ipan on tepetl Gerizim niman ompa sanoyej chikauak otsajtsik para nochimej ma kakikan. Ijkin otsajtsik:
"¡Xnechkakikan kuajli chanejkej nikan Siquem! ¡Tla nenkinekij para Dios mechkakis, xnechkakikan kuajli!
8 "Se tonajli on kojtin* okinekej kipiyaskej iminrey, niman okitlajtlanilijkej sen olivojkojtli para yejua ma nochiua iminrey. 9 Pero on olivojkojtli okinmijlij: ‘Ka, pampa tla ninochiuas nemorey, noneki xok niktemakas noaceite yejuan ika nikintiochiua on tlakamej niman nikpaktia Dios.’
10 "Kemaj on kojtin* okitlajtlanilijkej sen higuerajkojtli para yejua ma nochiua iminrey. 11 Pero on higuerajkojtli okinmijlij: ‘Ka, pampa tla nejua ninochiuas nemorey, xok niktlakitis on tsopelik niman uelik tlakyotl.’
12 "Kemaj on kojtin* okitlajtlanilijkej on uvajkuamekatl yejua ma nochiua inminrey. 13 Pero on uvajkuamekatl okinmijlij: ‘Ka, pampa tla nejua ninochiuas nemorey, xok niktemakas noayo yejuan ika kichijchiuaj vino yejuan kimpaktia on tlakamej niman Dios.'
14 “Sa ika nochi on kojtin* okitlajtlanijkej on uitskojtli yejua ma nochiua iminrey. 15 Niman on uitskojtli okinmijlij: ‘Tla melauak nenkinekij ma ninochiua nemorey, nemejuamej nemotlaliskej ipan notlaseuajlo. Pero tla xnejli nenkinekij ma ninochiua nemorey, tla ijkon notech kisas sen tlitl yejuan kintlatis on cedro kojtin* yejuan onokej Líbano.’
16 “Niman aman nejua nemechtlajtoltia: '¿Nenkitaj kuajli ika onenkalaktijkej nemorey Abimelec? ¿Onenkichiuilijkej tlen kuajli Jerobaal iuan ifamilia ijkon ken yejua omechchiuilij tlen kuajli? 17 Ijkon nemechtlajtoltia, pampa notataj ueliskia mikiskia ijkuak otlauijsokito para omechmanauij intech on madianitas. 18 Pero nemejuamej yej onenkualankej niman ximpan nenkintaj ifamilia notataj. Onenkinmiktijkej ipan se ueyi tetl on 70 ikoneuan. Niman aman yej yonenkalaktijkej Abimelec ken rey ne Siquem yejuan ikoneu on itlakpasiuau Jerobaal, san pampa ken nenkitaj. 19 Pero nejua aman nemechijlia, tla nemejuamej onenkichiuilijkej tlen kuajli Jerobaal iuan ifamilia, tla ijkon, xselikan tlen kuajli iuan Abimelec, niman yejua ma kuajli ma nemi nemouan. 20 Pero tla ka, ma kisa tlitl itech Abimelec niman ma kintlati nochimej on chanejkej Siquem niman Bet-milo, niman itech Siquem niman Bet-milo no ma kisa sen tlitl yejuan kitlatis Abimelec.'
21 Sakin ijkuak Jotam ijkin yokijtoj, ocholojteu niman onochantito ne kampa itoka Beer, pampa kimakajsiya Abimelec on itlakpaikniu.
Siquem okixnamik Abimelec
22 Abimelec otlamandaroj yeyi xipan intech on israelitas, 23 pero Dios okuajtitlan sen xkuajli espíritu itech Abimelec niman intech on chanejkej Siquem para ma kualanikan itechkopa Abimelec. Yejua ika xok ipan okitakej Abimelec. 24 Dios ijkon okichiu para ijki Abimelec okikuepiltijkej ika okinmiktij on 70 ikoneuan Jerobaal, niman on yejuan chanejkej Siquem no okinkuepiltijkej ika okipaleuijkej Abimelec. 25 On tlakamej chanejkej Siquem kintitlanyaj sekimej tlakamej san ichtaka ipan tepemej para in tlakamej kintlachtekiliayaj on yejuan ompaka panouayaj. Niman Abimelec okimat ika ijkon kichiuayaj on tlakamej.
26 Se tonajli, Gaal, ikoneu Ebed, oyaj iuan ikniuan ipan on ueyikalpan itoka Siquem niman on chanejkej de on ueyikalpan xoometlamatkej* niman kuajli okinselijkej. 27 Kemaj on chanejkej Siquem oyajkej mijlaj, okitekitoj uvas niman okipaxojkej para okichijchijkej vino. Niman kemaj okichijkej sen ueyi iluitl. Otlakuajkej niman otlaikej ipan intiopan imindioses, niman kuijuikaltiayaj Abimelec. 28 Niman Gaal kijtouaya: "¿Kenijki nomati in Abimelec? Yejua san ikoneu Jerobaal, niman Zebul itlakeual. Niman tejuamej yejuan tichanejkej Siquem, ¿Tiakinonnomej para itech tiesclavos yeskej? Tejuamej tiktlakamatiskej san nemouejkatatauan Hamor yejuan okipeualtij in ueyikalpan Siquem, pero maka itech Abimelec. 29 ¡Tla nejua ninemotlayekankau yeskia, amantsin nikixtiskia Abimelec! Niman ijkin nikijliskia: '¡Xkinsentlali mosoldados Abimelec niman xuajla xmouijsokiki nouan!' "
30 Zebul, governador ipan on ueyikalpan sanoyej okualan, ijkuak okimat tlinon kijtouaya Gaal. 31 Yejua ika, amanaman ichtaka okititlanilij Abimelec in tlajtojli chika nemiya Aruma: "Gaal, ikoneu Ebed, youajlaj iuan ikniuan nikan Siquem niman ijkin kinyoleua in tlakamej yejuan chantij nikan, para ma noketsteuakan, niman ma mitsixnamikikan tejua. 32 Aman tej, in yeuajli xkisa iuan mosoldados niman xmiyanatij ipan tepetl. 33 Niman uajmostla kualkan ijkuak tlanesis, xkuijsokikij in ueyikalpan. Niman ijkuak Gaal iuan on tlakamej kisaskej para mechonuijsokiskej, xkinchiuili tlinon tejua tiknekis."
34 Ijkon tej, Abimelec niman nochimej isoldados okiskej ipan on yeuajli, niman oniyankej iyeualkan on ueyikalpan Siquem, kampa onoxexelojkej naukantipan. 35 Ijkuak Gaal okisako ipan ikalakiyan on ueyikalpan, Abimelec niman isoldados ouajkiskej ne kampa niyantikatkaj. 36 Ijkuak Gaal okintak, okijlij Zebul:
—¡Xkita ipan on tepemej, uajtemotokej soldados! Niman Zebul okinankilij:
—Ka, on tlen tejua tikita nesi ken tlakamej, yej san intlaseuajlo tepemej.
37 Pero Gaal oksejpa okijlij:
—¡Xkita ne ipan on ojtli yejuan kitokayotiaj "Ixik on tlajli" no uajtemouaj soldados! ¡Niman oksekimej uajlauij ipan on ojtli kampa onkaj Iminauakojyoj on Tetlatejtemouilijkej!
38 Kemaj Zebul okijlij:
—¡Aman xtlajto chakua! ¡Tejua tikijtoua ika Abimelec xakin yejua para tiiesclavos yeskej itech! Aman paon nemij. Paon nemij on soldados yejuan tikijtoua xtikinmakajsi. ¡Aman xuajkisa niman xkinuijsoki!
39 Niman Gaal onkinyekan on soldados de Siquem para okuijsokitoj Abimelec. 40 Pero Abimelec okuajtotokak Gaal, niman Gaal ocholoj. Niman miyekej isoldados okinkokojkej niman oksekimej omikkej ipan nochi on ojtli hasta ikalakiyan on ueyikalpan. 41 Kemaj Abimelec oksejpa oyaj ipan on ueyikalpan Aruma, niman Zebul okinuajkixtij Gaal iuan ikniuan ne Siquen.
42 Uajmostla Abimelec okimat ika on chanejkej Siquem okijtojkej ika yaskej mijlaj. 43 Yejua ika, okinxexeloj isoldados yexkantipan, niman okinnauatij ma niyanatij mijlaj. Niman ijkuak on soldados okintakej on chanejkej Siquem ye uajkistokej ipan on ueyikalpan, yejuamej ouajkikistikiskej kampa niyantikatkaj niman opeu kinuijsokij. 44 Chika Abimelec niman sekimej isoldados oyajkej itech ikalakiyan on ueyikalpan, on oksekimej soldados okinuijsokitoj niman okinmiktitoj nochimej yejuan nemiyaj mijlaj. 45 Nochi on tonajli Abimelec okinuijsok on chanejkej Siquem. Niman ijkuak yonoyaxkatij on ueyikalpan, okinmiktij nochimej yejuan ompa chanejkej niman nochi okixoxotonij. Kemaj okixixinij istatl imanian on ueyikalpan.
46 Ijkuak on chanejkej Migdal-siquem okimatkej on tlen okichiu Abimelec, oniyanatoj ipan itiopan El-berit. 47 Niman ijkuak Abimelec okimat ika nochimej yonosentlalijkaj ompa ipan on tiopan, 48 oyaj ipan on tepetl Salmón niman ikan ihacha, okitsontek ima sen kojtli, niman okinomamaltij ikechpan. Kemaj okinnauatij isoldados no ijki ma kichiuakan nimantsin ken yejua okichiu. 49 Nochimej on soldados okitsontekej miyek kuamatli niman okitokakej Abimelec hasta kampa onkatka itlatsakuyo on tiopan. Niman ompa okintlalijkej on kuamatin itech on tiopan niman kemaj okitlatijkej. Ijki tej omikkej nochimej yejuan yoniyankaj. Katka kanaj se mil tlakamej niman siuamej yejuan omikkej.
50 Sakin Abimelec oyaj Tebes para otlauijsokito, niman okinoyaxkatij* on ueyikalpan. 51 Itlajkotian on ueyikalpan onkatka sen ueyi torre. Niman ompa oniyankej nochimej on chanejkej ipan on ueyikalpan, tlakamej niman siuamej. Okintsakukej kuajli intsakuijlouan niman kemaj otlejkokej tlapani. 52 Kemaj Abimelec oyaj itech on torre para kinuijsokiskia yejuan ompa oniyankej. Pero ijkuak oajsik ikalakiyan on torre para kitlakechiskia, 53 sen siuatl okuajtlajkal sen tetl yejuan ika tlakuechouaj niman ouetstajsik ipan itsontekon Abimelec niman okuatetlapan. 54 Kemaj Abimelec amanamantsin okonotstets itlapaleuijkau, niman okijlij: "Xkixti moespada niman xnechmikti, pampa xnikneki ma kijtokan ika sen siuatl onechmiktij." Kemaj itlapaleuijkau okitlalaktilijtiaj iespada, niman Abimelec omik. 55 Ijkuak on israelitas okitakej ika Abimelec yomik, oyajkej iminchan.