Gedeón okinmajtsik on reyes madianitas
8
On itribu* Efraín okualankej itechkopa Gedeón niman iuan onokamauijsokej pampa yejua xokintekuitlan ijkuak okinuijosokitoj on madianitas. 2 Pero Gedeón ijkin okinnankilij:—¿Tlen xnenkitaj ika nemejuamej más kuajli onenkichijkej xken nochi on tlen nejua onikchiu? On tlen achijtsin onenkichijkej más ueyi kijtosneki xken nochi on tlen tejuamej otikchijkej. 3 Dios omechmaktilij Oreb niman Zeeb, on tlayekankej madianitas. Nemejuamej más ueyi kijtosneki tlen onenkichijkej xken on tlen tejuamej otikchijkej.
Ijkuak itribu* Efraín okakkej on tlen okijtoj Gedeón, xok okualankej.
4 Kemaj Gedeón iuan on 300 tlakamej oyajkej niman okipanokej on río Jordán, maski sanoyej yosiaukaj pampa yejuamej kintojtokayaj on madianitas. 5 Ne Sucot, Gedeón ijkin okinmijlij on yejuan ompa chantiyaj:
—Nemechtlajtlanilia, xkintlakualtikan yejuan nouan uajlauij pampa sanoyej yosiaukej. Tejuamej tikintojtokaj Zeba niman Salmuna, on reyes madianitas.
6 Pero on tlayekankej ipan on ueyikalpan Sucot ijkin okinankilijkej:
—¿Tlen yotikajsik Zeba niman Zalmuna, para aman uelis tikintlakualtiskej mosoldados?
7 Niman Gedeón okinnankilij:
—¡Ijkuak toTEKO yonechmaktilij Zeba niman Zalmuna, oksejpa niuajlas, niman ijkuakon nemechnakayotetsajtsayanas ikan xikojuitstli niman ikan tlakouitstli yejuan onkaj ipan on xalpatlajkan!
8 Kemaj oyaj Penuel niman ompa no otlajtlan tlakuajli ken otlajtlan ne Sucot. Niman ompa no ijki okinankilijkej ken okinankilijkej ne Sucot. 9 Niman Gedeón ijkin okinmijlij:
—¡Ijkuak nejua ninokuepas nikan ken sen tetlanki, niktlajkalis in torre!
10 Zeba niman Zalmuna nemiyaj ne Carcor iuan kanaj 15 mil tlakamej. On soldados sa yejuamej yonokajkaj yejuan ualeuayaj kampaka ikisayan tonaltsintli pampa yokiminmiktikaj 120 mil soldados. 11 Gedeón oyaj ipan on ojtli yejuan kiyeualoua on xalpatlajkan Noba niman Jogbeha kampaka ikisayan tonaltsintli. Niman okinuijsokitoj ijkuak yejuamej xkimatstikatkaj 12 Zeba niman Zalmuna ocholojkej, pero Gedeón okintojtokak on ome reyes de Madián niman okinmajsik. Niman nochimej on soldados sanoyej onomojtijkej.
13 Ijkuak Gedeón youajnokuepato ipan on nouijsokilistli ipan on ojtli yejuan itoka Heres, 14 okajsik sen telpochtli yejuan chanej* Sucot. Yejua okiyolkuitij, niman on telpochtli okijkuilouilij imintoka on 77 tlayekankej ipan on ueyikalpan Sucot.
15 Kemaj Gedeón oyaj Sucot niman okinmijlij on chanejkej:
—¿Nenkelnamikij kenijki noka onenuetskakej san ipampa Zeba niman Zalmuna? ¿Nenkelnamikij ika xonenkinekkej onenkinmakakej tlakuajli nosoldados yejuan sanoyej yosiaukaj, pampa xe tikinmajsiyaj Zeba niman Zalmuna? Aman tej, nikan tikinuajuikaj.
16 Kemaj Gedeón okonkuik on xikojuitstli niman on tlakouitstli yejuan kisa ipan xalpatlajkan, niman ika okintlatsuitek on tlayekankej de Sucot. 17 No okitlajkal itorre on ueyikalpan Penuel, niman okinmimiktij nochimej on tlakamej yejuan ompa chantiyaj. 18 Kemaj Gedeón okintlajtoltij on reyes Zeba niman Zalmuna:
—¿Kenijki tlajtlachayaj on tlakamej yejuan onenkinmiktijkej ne Tabor?
Yejuamej okinankilijkej:
—Tlajtlamatiyaj ken tejua. Cada se nesiya ken ikoneu sen rey.
19 Kemaj Gedeón otsajtsik:
—¡Nokniuan katkaj! ¡On yejuan onenkinmiktijkej nokniuan katkaj, ikoneuan nonanaj! Niktestigojtlalia toTEKO yejuan nemi, tla xnenkinmiktiskiaj, nejua aman no xnemechmiktiskia.
20 Kemaj okinauatij Jeter, iyenkuiyokoneu:
—¡Xkinmikti amantsin!
Pero Jeter nomojtiaya kixtis iespada pampa sanken* telpochkonetl katka. 21 Kemaj Zeba niman Zalmuna okijlijkej Gedeón:
—¡Tla ijkon, tejua xtechmikti pampa sen tlakatl noneki ixkojtik yes.
Niman kemaj Gedeón okinmiktij Zeba niman Zalmuna. Niman kemaj, okinkuilij on kualneskayomej yejuan on imincamellos kiktiyaj iminkechtlan. 22 Kemaj on israelitas okijlijkej Gedeón:
—Pampa tejua otitechmanauij intech on madianitas, aman tiknekij tejua niman mouejkakoneuan xtechyekanakan.
23 Pero Gedeón okiminankilij:
—Nion nejua nion notelpoch xtenmechyekanaskej. ToTEKO yejua mechmandaros. 24 Yej, nikneki nemechtlajtlanilis on anillos yejuan onenkinkuilijkej nemotlauelikniuan. (On madianitas kintekitiltiayaj anillos kenon oksekimej tlakamej yejuan chantiyaj ipan on xalpatlajkan.) 25 Ikan nochi paktli temechmakaskej.
On israelitas okipatlajkej sen tela ipan tlajli niman ompa okintlalijkej on anillos yejuan okitilankaj.
26 Nochi on oro de on anillos katka matlaktli uan chiknaui kilos niman xteuan tlapoualtin katkaj on kualneskayomej, nion on koskamej nion on telas morado yejuan kitkiyaj on reyes madianitas nion inkoskauan imincamellos. 27 Ikan on oro, Gedeón okichijchiu sen itlakenpani yejuan xkipiya imatlaken para sen ídolo niman okitlalij ipan on ueyikalpan Ofra kampa yejua ualeuaya. Niman nochimej on israelitas okitlalkauijkej toTEKO para okimauistilijkej on ídolo. Ipampa on ídolo, Gedeón iuan ifamilia no ouetskej ipan tlajtlakojli.
28 Ijki tej, on madianitas okintlankej niman onokajkej esclavos intech on israelitas, niman xok kaman onochijkej kotjikej. Chika Gedeón nemiya, onkatka seuilistli 40 xipan ipan on región.
Imikilis Gedeón
29 Jerobaal yejuan no itoka Gedeón, oksejpa oyaj ichan. 30 Okimpix 70 ikoneuan, pampa kimpiyaya miyekej isiuauan. 31 No kipiyaya se itlakpasiuau ne ipan on kalpan Siquem, yejuan okipiyalij sen ikoneu, niman yejua okitokayotij Abimelec.
32 Gedeón omik ijkuak ye ueuentsin katka. Niman okitôkakej kampa tôktoya itataj, ne Ofra ipan on ueyikalpan yejuan iyaxka* katka iueyifamilia Abiezer.
33 Sakin ijkuak yomik Gedeón, on israelitas oksejpa okitlalkauijkej Dios niman okinmauistilijkej ixneskayouan on dios Baal. Niman okitlapejpenijkej ken imindios yejuan itoka Baal-berit. 34 Okelkajkej toTEKO Dios yejuan okinmanauij itech nochimej imintlauelikniuan yejuan chantiyaj inyeualkan. 35 Ifamily Jerobaal, yejuan no itoka katka Gedeón, xokitlajsojkamachilijkej on tlen kuajli okichiu impampa yejuamej.