Gedeón okintlan on madianitas
7
Kemaj Gedeón yejuan aman kitokayotiaj Jerobaal, niman nochimej on yejuan iuan nemiyaj, onokuitejkej saniman, niman onochachantitoj itech on amejli itoka Harod. Niman imincampamento on madianitas nokauaya norteika ipan on ixtlauatl yejuan onkaj ipeuyan on tepetl More.2 ToTEKO okijlij Gedeón:
—Sanoyej miyek tlakatl tikuajuika. Tla nejua nikchiuas para on israelitas ma kintlanikan on madianitas, yejuamej uelis yej noueyimatiskej nixpan, niman kinemiliskej san inseltimej onomanauijkej. 3 Yejua ika, xkinmijli on tlakamej tla yakaj nomojtia, ma uiya ichan.”
Niman oyajkej 22 mil tlakamej niman onokajkej sa 10 mil.
4 Pero toTEKO oksejpa okijtoj: “Sanken miyekej. Xkinuika ma atlitij, niman ompa nejua nikintlapejpenis niman nimitsijlis okinnomej yaskej mouan niman okinomej xaskej.”
5 Kemaj Gedeón okinuikak oatlitoj on tlakamej, niman toTEKO okijlij: “On yejuan kontilanaskej atl ika iminma ijkuak atliskej, niman atlij kenon chichimej ika iminnenepil, xkinxelo intech on yejuan notlakuantelketsaskej niman atliskej ika inkamak.”
6 On yejuan oatlikej ikan iminma katkaj 300. Nochimej on oksekimej onotlakuantelketsajkej ijkuak oatlikej. 7 Kemaj toTEKO okijlij Gedeón: "San ika in 300 tlakamej nemechmakixtis nemejuamej niman nikintlanis on madianitas. Niman on oksekimej uelis yaskej."
8 Yejua ika, Gedeón okinnauatij on oksekimej ma uiyan iminchan. Pero achtoj ijkuak xe yayaj, okintlajtlanilij intsotsokoluan niman inkuakuauan borregos. San onokau iminuan on 300 tlakamej yejuan tlatlapejpeniltin. Yejuamej okitlalikej imincapamento tlakpak ipan on tepetl, niman on madianitas nemiyaj tlatsintlan ipan on ixtlauatl. 9 Ipan on yeuajli, toTEKO okinauatij Gedeón: “Xmokuiteua niman xkinuisokiti on madianitas pampa nejua nimitsinmaktilis. 10 Pero tla timomojtia tikominuisokis, achtoj xtemoti ipan imincampamento iuan Fura motlakeual. 11 niman xkaki tlinon kijtouaj. Kemaj más timoyoleuas para tikominuijsokis.”
Kemaj Gedeón otemok iuan Fura itlakeual itenko imincampamento intlauelikniuan. 12 On madianitas, on amalecitas niman on tlakamej yejuan ualeuaj kampaka ikisayan tonaltsintli yonochajchayajkaj ipan on ixtlauatl ken itlaj chauistli de chapolimej. Kipiyayaj sanoyej miyekej camellos, kenon xajli yejuan onkaj itenko mar. 13 Ijkuak Gedeón ononisiuij itech imincampamento itlauelikniuan, okak sen soldado kitlajtlajtouiliaya okse soldado sen temiktli yejuan okipix, niman ijkin kijliaya:
—Oniktemik kitl sen pan de cebada ouajnomimilojtiaj hasta oyejkok ipan tocampamento. Niman ijkuak okimailij sen kajli de telaj, okitlajkal.
14 Niman on soldado okijlij icompañero:
—On kitosneki iespada on israelita Gedeón, ikoneu Joás, niman ika Dios techtemaktilis tejuamej yejuan timadianitas iuan nochi tocampamento itech Gedeón.
15 Ijkuak Gedeón okak on temiktli niman okimat tlinon kijtosneki, okimauistilij toTEKO. Kemaj onokuep ipan on campamento kampa nemij on israelitas niman ijkin okinnauatij:
—Xmokuiteuakan pampa toTEKO techmaktilis incampamento on madianitas.
16 Kemaj okinxexeloj on 300 tlakamej yexkantipan niman okiminmakak ikuakuauuan borregos niman tsotsokoltin yejuan ijtik yayaj tlauiltin. 17 Niman okinmijlij:
—Ijkuak najsis ne okselado de imincampamento totlauelikniuan, xnechitakan niman no xchiuakan ken nejua nikchiuas. 18 Ijkuak nejua niman on yejuan nouan yauij tikimpitsaskej on kuakuautin, nemejuamej no xkimpitsakan kampa nennemiskej iyeualkan on campamento, niman ijkin xtsajtsikan. “Ipampa toTEKO niman ipampa Gedeón.”
19 Ijkon tej, Gedeón niman on 100 tlakamej oajsikej ne iokselado on campamento ijkuak ye nopatlaskiaj on tlajpiyaj ijkuak tlajkoiuan. Kemaj okimpitskej ikuakuauuan on borregos, niman okintlajtlapankej on tsotsokoltin yejuan kinmiktiyaj. 20 Niman nochimej on yexkantipan opeu san setipan kimpitsaj on ikuakuauuan borregos niman okintlajtlapankej on tsotsokoltin. Ipan iminopochma kiktiyaj on tlauiltin yejuan tlikuitiayaj, niman ipan iminyekma kiktiyaj on ikuakuauan borregos. Niman ijkin otsajtsikej: “¡Titeuijsokij Ipampa toTEKO niman ipampa Gedeón!” 21 On israelitas cada se onokau iyeualkan on campamento niman xokuitlaj okichijkej. Pero ne ipan inkampamento on madianitas nochimej opeu tsajtsij niman ontlatlaksakej. 22 Niman chika on 300 israelitas sanken* kimpitsayaj on kuakuautin, toTEKO okichiu para on madianitas sano yejuamej ma nouijsokikan niman ma ontlatlatsakej hasta Bet-sita imelajkan ika on kalpan de Zerera, niman hasta itlamiyan Abel-mehola yejuan onkaj nisiu Tabat.
23 Kemaj Gedeón okiminnots on israelitas yejuan kisaj itech itribu* Neftalí, itribu* Aser, niman nochi on tribu* de Manasés para makintojtokakan on madianitas. 24 Gedeón okintitlan itlajtojkauan ipan on tepemej kampa iyaxka* itribu* Efraín, niman okinauatij ma temokan ma kinuijsokitij on madianitas, niman ma kitsakuakan nochiuiyan kampa xuejkatlan on atl, kampa ueli panolo ipan on río Jordán, hasta Bet- bara chika xe ajsij on madianitas.
On itribu* Efraín ijki okichijkej ken okiminnauatijkej. 25 Niman okinmajsikej omemej tlayekankej madianitas. Se itoka Oreb niman on okse itoka Zeeb. Oreb okimiktijkej ipan on ueyi tetl yejuan aman kixmatij ueyi tetl de Oreb. Niman Zeeb okimiktijkej ne kampa aman kixmatij Zeeb kampa kipaxouayaj uvas para kichijchiuayaj vino. Niman sakin* ijkuak otlan kinkixtiaj on madianitas, okiktilijkej Gedeón intsontekon Oreb niman Zeeb, kampa yejua nemiya iokse lado on río Jordán.