Gedeón onochiu juez niman okinmanauij on israelitas itech on madianitas
6
On israelitas oksejpa okichijkej tlen xkuajli ixpan toTEKO. Yejua ika toTEKO okintemaktilij intech on madianitas chikomej xipan. 2 Niman pampa on madianitas sanoyej kintlajyouiltiayaj on israelitas, yejuamej ika iminnemojtil okitejtemojkej kampa niyanaskej, ipan tepemej, ijtik ostomej niman kampa on madianitas xueliya kominnextiayaj. 3 Nochipa ijkuak on israelitas ye kipiyayaj itlakyo on tlen okitôkakej, on madianitas, on amalecitas niman oksekimej yejuan ualeuayaj kampaka ikisayan tonaltsintli uajlayaj kinuijsokiyaj. 4 Yejuamej uajnochantiayaj ipan iminueyitlalpan on israelitas. Yejuamej kintlamiliayaj nochi tlen tlakiyaj ipan imintlatok hasta ipan on iueyitlalpan Gaza. Xitlaj onokau para on israelitas kikuaskej hasta iminborregos, iminuakaxuan, noso iminpolokouan. 5 Ikan iminkal de kuetlaxtli niman iminyolkauan uajlayaj ipan on región, niman nochi kixoxotoniayaj. Uajlayaj ika imincamellos sanoyej miyekej ken itlaj chauistli de chapolimej yejuan xakaj ueli kimpoua. 6 Impampa on madianitas, on israelitas sanoyej kijyouiyayaj miyek tlajtlamach*. Kemaj on israelitas onoueyikatsajtsilijkej itech toTEKO para ma kimpaleui.7 Ijkuak on israelitas onoueyikatsajtsilijkej itech toTEKO para ma kinmanaui de on madianitas, 8 toTEKO okinuajtitlanilij sen tiotlajtojketl yejuan okimijli: “Ijkin kijtoua toTEKO yejuan iDios israel: ‘Nejua onemechkixtij Egipto kampa nenchantiyaj ken esclavos. 9 Niman xsan onemechmanauij inmak on egipcios, yej no inmak nochimej on yejuan mechtlajyouiltiayaj. Yejuamej onikinkixtij nemixpan niman imintlaluan onemechyaxkatij nemejuamej. 10 Niman onemechijli ika nejua ninemoTEKO Dios, niman para maka xkinmauistilikan imindioses on amorreos yejuan aman ipan imintlal nenchantij, pero nemejuamej xonennechkakkej.'”
11 Kemaj ouajlaj on ángel yejuan toTEKO okuajtitlanniman onoseuij itsintlan sen auakojtli yejuan onkatka ne kalpan Ofra. On auakojtli iyaxka* katka Joás, yejuan ualeuaya itech iueyifamilia Abiezer. Gedeón, ikoneu Joás, kajaniaya trigo san ichtaka itik on tlaltekontli kampa kipaxouaya uvas para kichijchiuayaj vino. Ikon kichiuaya para xkitayaj on madianitas.
12 On ángel yejuan toTEKO okuajtitlan ononextij itech Gedeón niman okijlij:
—ToTEKO mouan nemi, tlakatl yejuan tikojtik niman xtixmojki.
13 Niman Gedeón okinankilij:
—Xnechtlapojpolui noteko, pero tla toTEKO touan nemi ¿tline topan nochiua nochi in tlajtlamach*? ¿Kanon onkaj nochi on tlamauisoltin yejuan techtlajtlatouiliaj toachtojtajuan ijkuak kijtouaj ika toTEKO otechkixtij Egipto? ToTEKO yotechkau niman yotechtemaktilij intech on madianitas.
14 ToTEKO okontak, niman okijlij:
—Xtekitilti mochikaualis yejuan tikpiya, para tikmanauis israel intech on madianitas. Sa no nejua nimitstitlani.
15 Pero Gedeón oksejpa okinankilij:
—Oksejpa xnechtlapojpolui noTEKO, pero ¿kenijki nikmanauis israel? Noueyifamilia yejua más xkojtik yejuan kisaj itech itribu* Manasés. Niman nejua xmás niueyixtikaj itech nofamilia.
16 Niman toTEKO okinankilij:
—Uelis tikchiuas pampa nejua ninemis mouan. Tikintlanis nochimej on madianitas ken tiktlaniskia san se tlakatl.
17 Kemaj Gedeón okijtoj:
—Tla tinechita ikan teiknelilistli*, xnechititi ika melauak tejua tinoDios akin titlajtoua nouan. 18 Nimitstlajtlanilia maka timejkuanis nikan hasta nikuakis sen uentli yejuan nimitsmakas.
Niman toTEKO okinankilij:
—Nikan nimitschas.
19 Gedeón oyaj, okikxitito sen chivito, niman ikan 20 litros harina okichijchiu pan yejuan xkipiya tlaxokolilistli*. Kemaj okitlalij on nakatl ipan sen chikiutli, niman iyayo on nakatl okitekak ipan sen kontli. Niman kemaj okiktik nochi hasta itech on auakojtli.
20 Kemaj iángel Dios okinauatij ma kitlali on nakatl ipan sen ueyi tetl, iuan on pan yejuan xkipiya tlaxokolilistli* niman no ma kitotoyaua iyayo on nakatl ipan on ueyi tetl.
Sakin ijkuak Gedeón yokichiu on tlen okinauatijkej, 21 on ángel okiteloj on nakatl iuan on pan ika ikuayak itopil* yejuan kipiyaya ipan ima. Niman ipan on ueyi tetl okis tlitl yejuan okitlatij on nakatl niman on pan. Kemaj on ángel yejuan toTEKO okuajtitlan ixpan ouajnopoloj.
22 Ijkuak Gedeón okimat ika in yejua on ángel yejuan toTEKO okuajtitlan, okijtoj:
—¡Ay noTEKO, noTEKO Dios! ¡Yonikontak ixayakatsin on ángel yejuan toTEKO okuajtitlan!
23 Pero toTEKO okinankilij:
—Maka xmomojti pampa xtimikis. Xseli noyolseuilis.
24 Kemaj Gedeón ompa okichijchiu sen tlaixpan* para tlakaitalistli itech toTEKO, niman in tlaixpan* okitokayotij “toTEKO teyolseuiya”. Yejua in tlaixpan hasta aman onkaj ne Ofra, kampa itlalpan on iueyifamilia Abiezer.
25 Sano ipan on yeuajli, toTEKO okijlij Gedeón:
—Xkajsi sen toro itech iyolkauan motataj niman on okse toro yejuan ika ome más tomauak yes, niman de chikome xijkayotl yes. Kemaj xxoxotoni itlaixpan* Baal yejuan iyaxka* motataj. Niman no xtsojtsonteki on kojtli* yejuan ipan ixnestikaj on diosa Asera yejuan onkaj itech itlaixpan* Baál. 26 Niman ikuapan on tepetl, xchijchiua sen tlaixpan* para moTEKO Dios niman ompa xmikti on toro yejuan ika ome, niman xtlati ken sen uentli tlatla. Xtlati ika on kojtli* yejuan otiktsojtsontek kampa ixnestikatka on diosa Asera.
27 Kemaj Gedeón okinuikak majtlaktlimej itlakeualuan niman okichiu nochi tlen toTEKO okinauatij. Pero xokichiu tlajokaj, yej okichiu tlayoua pampa kinmakasiya ifamilia itataj niman on chanejkej ipan on ueyikalpan.
28 Uajmostla kualkan ijkuak on chanejkej ipan on ueyikalpan onokuitejkej, okitakej ika itlaixpan* Baal yokixoxotonijkej, niman on kojtli* yejuan ipan ixnestikatka on diosa Asera, yejuan onkatka itech on tlaixpan* yokitsojtsontekaj. Niman no okitakej ika yokiuentlalijkaj sen toro ken sen uentli yejuan nochi tlatla ipan on yenkuik tlaixpan*. 29 On chanejkej ijkin onotlajtoltijkej: “¿Akinon okichiu yejua in?" Ijkuak sanoyej yokitejtemojkej niman yotetlajtlatoltijkej okimatkej ika okichiu Gedeón, ikoneu Joás. Kemaj oyajkej niman okinauatijkej Joás:
30 —¡Xkuajkixti mokoneu¡ Ika onkaj tikmiktiskej pampa okixoxotonij itlaixpan* Baal, niman okitsojtsontek on kojtli* yejuan ipan ixnestikaj on diosa Asera yejuan onkatka itech on tlaixpan*.
31 Pero Joás okiminnankilij on yejuan kiyeualojtikatkaj:
—¿Nemejuamej nentlauijsokiskej ipampa Baál niman nenkimanauiskej? Tla ijkon nochi tlakatl yejuan kimanauis Baál ma miki ikuak xe tlanesis. Tla Baal yejua sen dios, xkauakan iselti ma nomanaui, pampa yejua iyaxka* katka on tlaixpan* yejuan okixotonijkej.
32 Desde ijkuakon Gedeón opeu kitokayotiaj Jerobaal niman kijtouayaj “Baál ma nomanaui iselti” pampa Gedeón yokixoxotonijka itlaixpan Baal.
33 Kemaj nochimej on madianitas, on amalecitas, niman on tlakamej yejuan ualeuaj kampaka ikisayan tonaltsintli onosentlalijkej niman okipanauijkej on río Jordán niman onochantijkej ipan on ixtlauatl Jezreel. 34 Niman kemaj iespíritu toTEKO okalak ipan Gedeón, niman Gedeón okipits ikuakuau borrego para on iueyifamilia Abiezer iuan onosentlalijkej. 35 Niman okintitlan itlajtojkauan para ma kinotsatij nochi itribu* Manasés para iuan ma nosentlalikan. No ijki okintitlan itlajtojkauan para ma kinotsatij itribu Aser, Zabulón niman Neftalí. Yejuamej no oualajkej onosentlalikoj iuan Gedeón.
36 Niman Gedeón okijlij Dios: “Tla melauak tinechtekitiltis para nikinmanauis on israelitas ken tejua yotikijtoj, 37 nejua niktlalis ikuetlaxyo* borrego yejuan tsojmiyoj kampa tikajaniaj trigo. Tla ijkuak kualkan on itsojmiyo borrego otlanextilij patstik ikan ajuichtli, niman on tlajli uej uaki, nikmatis ika melauak tinechtekitiltis para nikinmanauis on israelitas ken tejua yotikijtoj.”
38 Niman ijki onochiu. Ijkuak Gedeón onokuiteu on kualkan, okipatskak on kuetlaxtli tsojmiyoj niman oten se taza ika on ajuichtli. 39 Pero Gedeón okijlij toTEKO: “Maka tikualanis nouan tla oksejpa nimitstlajtlanilia okse señal. Aman, kej nimitstlajtlanilia ma nokaua uaki itsojmiyo on borrego niman on tlajli uej ma patsiui ikan ajuichtli.”
40 Ipan on yeuajli Dios ijki okichiu. Niman uajmostla kualkan, on itsojmiyo borrego uaki katka niman nochi on tlajli patstik katka ikan ajuichtli.