Ikuikau Débora niman Barac
5
Ipan on tonajli Débora niman Barac, ikoneu Abinoam, ijkin onokuikatijkej:2 “Nemochimej xkueyiteneuakan toTEKO
pampa ipan in país de israel
sanken* nemij tlakamej yejuan kinekij tlauijsokiskej,
pampa intsajlan in israelitas sanken* nemij tlakamej
yejuan xnonenekij para kisaskej on tlauijsokiskej.
3 ¡Xnechkakikan nemejuamej reyes!
¡Xnechkakikan nemejuamej yejuan nenkipiyaj tekiuajyotl!
¡Nejua nikuikatlalis toTEKO!
¡Nikuikatlalis iminDios on israelitas!
4 "ToTEKO, ijkuak tejua otikis Seir,
niman ijkuak otinejnentiaj ipan on tepetl Edom,
ouiuixkak in tlaltikpaktli,
niman on cielo chikauak ouiuixkak,
niman on moxtli okuajtitlan kiautli.
5 Mixpan noTEKO,
mixpan tejua iDios Israel,
on tepemej ouiuixkakej.
Ouiuixkak on tepetl Sinaí.
6 Ipan on tiempo ijkuak sanken* nemiya Samgar, ikoneu Anat,
niman ijkuak nemiya Jael,
nochimej on israelitas xok nouitiayaj ipan on ueyi ojtli
yej nojuitiayaj ipan on ichtakaojtsitsimej pitsajkej yejuan tepejxikkej.
7 On yejuan kimanauiyayaj israel xok nemiyaj.
Kemaj onikinmanauij nejua Débora ken ninantli yeskia itech israel.
8 "Ijkuak kintokayaj oksekimej dioses,
uajlaya sen nouijsokilistli iminpan.
Nion se tepostlatsakuilijli nion lanza xkipiyayaj on 40 mil israelitas
para nomannauiskej.
9 "¡Nejua niktemaka noyojlo impampa on más uejueyixtokej itech Israel,
impampa on tlakamej yejuan kisaj itech nochanejkauan
yejuan ikan iminyojlo oyajkej otlauijsokitoj!
¡Nemochimej xkueyitenuakan toTEKO!
10 "Xkijtokan nemejuamej, yejuan nenyetiuij impan on siuapolokomej* istakej,
nemejuamej yejuan nemotlaliaj ipan xochipetlamej,
no ijki nemejuamej yejuan nennejnemij ipan ojtli.
11 Nepa kampa nenkimatliltiaj nemoyolkauan,
xmokuikatikan ikan miyek tlatsotsonaltin yeualtikej.
Xkueyiteneuakan ika toTEKO sen tetlanki.
Yejua sen tetlanki ipan on kalpanmej pipitikej de Israel.
Kemaj ikoneuan toTEKO nejnemiskej itechika ikalakiyan on iueyikalpan toTEKO.
12 "Xtlacha Débora. ¡Xlacha!
Xtlacha niman xmokuikati sen kuikatl.
Niman tejua Barac, ikoneu Abinoam, xmokuiteua
niman xkinuika on tlakamej yejuan otikinmajsik.
13 "Niman kemaj on israelitas ouajtemokej
niman okinuijsokikoj on yejuan más kojtikej.
Onechanakoj on isoldados toTEKO
para tikinmixnamikiskej on tlakamej
yejuan sanoyej ueli tlauijsokij.
14 Sekimej tlakamej yejuan kisaj itech itribu* Efraín
oualajkej ipan on ixtlauatl kampa inyaxka katkaj on amalecitas.
Niman ikuitlapan oyajkej isoldados
yejuan kisaj itech itribu* Benjamín.
On yejuan kisaj itech itribu* Maquir otemokej itlayekankauan.
Niman on yejuan kisaj itech itribu* Zabulón otemokej on tekiuajkej.
15 On itlayekankauan itribu* Isacar no oyajkej iuan Débora.
Isacar okipaleuij Barac niman yejua okitokak ipan on ixtlauatl.
"Pero itribu* Rubén onotlamachilisxelojkej,
niman yejua ika yejuamej xokinekkej oualajkej.
16 ¿Tline onokajkej kampa tsakutokej iminyolkauan
para kinkaktokej on tlajpixkej kenijki kinnotsaj iminborregos?
Itech isoldados Rubén nemij tlakamej yejuan noyolkuekuepaj.
17 Nochimej yejuan nemiyaj ipan iueyitlalpan Galaad
onokajkej okse ilado on río Jordan.
Itribu* Dan onokau intech on barcos.
Niman itribu* Aser onokau itenko mar
niman xonejkuanij kampa nemiya.
18 Pero intribus Zabulón niman Neftalí,
yejuamej, oyajkej otlauijsokitoj
niman xokinemilijkej ika ueliskia mikiskiaj."
19 "Kemaj on reyes cananeos oualajkej otlauijsokikoj
nisiu ipan on ueyikalpan Taanac nisiu de on río Meguido,
pero xokiktikej plata, nion okseki tlajtlamach* yejuan patioj.
20 Desde ipan cielo ne kampa nejnemij,
nochimej on sitlalimej otechpaleuijkej para otiktlankej Sísara.
21 On ayajtok, on ayajtok yejuan youejkau onkaj,
on ayajtok Cisón nochimej okinmatoktij.
¡Ma ninejnemi ikan nochi noyojli
niman ikan nochi nofuersa!
22 ¡"Chikauak kakistij inmistitekon on caballos chika notlalouaj!
¡Sanoyej notlalouaj, notlalouaj on caballos yejuan sanoyej yolchikajkej!
23 Niman on ángel yejuan toTEKO okuajtitlan kijtoua:
'Ma uetsi sen temojtij tlauelijli ipan Meroz
niman ipan ichanejkauan
pampa xoyajkej ken yejuan xixmojkej para okipaleuitoj toTEKO.'
24 "Jael isiuau Heber on quenita,
ma Dios más ma kitiochiua xken nochimej on siuamej.
Yejua más ma tlatiochijtli
xken on oksekimej siuamej yejuan chantij ipan imincampamento.
25 Sísara otlajtlan atl, niman Jael okimakak leche.
Ipan sen taza yejuan kualtsin,
okimakak crema yejuan ikatlakajtli* para se yejuan ueyixtikaj.
26 Chika ika iopochma okonkuik sen estaca,
ika iyekma okonkuik sen martillo.
Niman kemaj okitsopinij ika on estaca ipan itsontekon Sísara,
niman on estaca hasta opanoto okse lado de ixayak.
27 Sísara ouetstiaj hasta nokuejkueptinemiya ikxitlan Jael.
Niman ika sanoyej nokokouaya, xok onoketsteu.
Niman kampa ouets ompa omik.
28 "Inan Sísara ikan ajmantli ontlachix
ipan iventana niman okijtoj:
'¿Man tline hasta aman xejko icarreta de guerra?
¿Man tline nouejkaua icarreta yejuan ika tlauijsokij?'
29 Sekimej siuamej itekichiulijkauan yejuan tlamatkej kinankiliayaj
niman sano yejua nonankiliaya:
30 'Manin yej, noxexelouilijtokej
on tlen okitlankej ipan on nouijsokilistli.
Manin cada soldado kisekijtikaj se noso ome ichpochtli,
niman Sísara uej kimakatokej on telas yejuan sesekneka tlapajlojkej,
sentetl noso ome kimakatokej,
noso manin kiselijtikaj on telas yejuan tlajmachyoj*
ikan sesekneka tlapajli yejuan kitlaliliaj ikechtlan sen tlakatl ijkuak tetlani.'
31 "Ijkon ma mikikan nochimej motlauelikniuan toTEKO.
Niman on yejuan mitstlajsojtlaj, ma petlanikan
ken petlani nochiuiyan on tonaltsintli ijkuak tlakualispan."
Sakin ijkuak ijkon yonochiu, on israelitas okipixkej seuilistli 40 xipan ipan on región.