Débora niman Barac okinmanauikej on israelitas itech Sísara
4
Sakin ijkuak yomik Aod, on israelitas oksejpa opeu kichiuaj tlen xkuajli ixpan ToTEKO. 2 Kemaj toTEKO okintemaktilij itech Jabín, iminrey on cananeos, yejuan tlamandarouaya ipan on ueyikalpan Hazor. Sísara tlayekanketl katka intech on isoldados on rey. Yejua chantiya ipan on ueyikalpan Haroset-goim. 3 Jabín kipiyaya 900 teposcarretas de guerra. 20 xipan sanoyej okintlajyouiltij on israelitas. Kemaj on israelitas onoueyikatsajtsilijkej itech toTEKO para ma kimpaleui.4 Ipan on tonaltin on israelitas kinyekanaya sen siuatiotlajtojketl itoka katka Débora; isiuau katka Lapidot. 5 Débora nochipa noseuiyaya itech sen palmera kampa nochimej kitokayotiayaj “Ipalmera Débora”. On palmera onkatka ipan itepeyoj Efraín, yejuan nokaua itlajkotian on kalpan Ramá niman on ueyikalpan Betel. On israelitas nochimej kontayaj Débora para kinyoltlaliaya ijkuak kipiyayaj tlauejli.
6 Se tonajli Débora okitekuitlan Barac, ikoneu Abinoam, yejuan chantiya ipan on kalpan Cedes de itribu* Neftalí, niman okijlij:
—ToTEKO iminDios on israelitas, ijkin mitsnauatia: “Xuiya ipan on tepetl Tabor, niman ompa xkinsentlali 10 mil tlakamej yejuan kisaj itech itribu* Neftalí niman Zabulón. 7 Nejua nikchiuas para Sísara, on tlayekanketl itech isoldados Jabín, ma uajla ipan on río Cisón iuan icarretas de guerra niman iuan isoldados para mitsuijsokiskej, pero nejua nimitsinmaktilis”.
8 Niman Barac okijtoj:
—Tla tejua tias nouan, nias. Pero tla xtias nouan, nejua xnias.
9 Kemaj Débora okinankilij:
—Nias mouan. Pero pampa xtikneki titlayekanas ipan in nouijsokilistli, xmitsueyiteneuaskej ken tejua titetlanki, pampa toTEKO kitemaktilis Sísara imak sen siuatl.
Kemaj Débora oyaj iuan Barac ne Cedes. 10 Ompa Barac okinots itribu* Zabulón niman itribu* Neftalí. Niman 10 mil soldado kitokayaj, niman Débora no yaya iuan Barac.
11 Nisiu Cedes, itech on ueyi auakojtli yejuan onkaj ne Zaanaim, onkatka icampamento Heber, on quenita, yejuan onoxelojka intech on oksekimej quenitas. (On quenitas kisayaj itech Hobab imontaj Moisés.) 12 Ijkuak Sísara okimat ika Barac, oyaj ipan on tepetl Tabor, 13 okinsentlalij 900 iteposcarretas de guerra niman nochimej isoldados. Niman kemaj oyaj inmiuan desde Haroset-goim hasta on río Cisón. 14 Kemaj Débora okijlij Barac:
—¡Xuiya! Aman ToTEKO mitsyekanas niman mitsmaktilis Sísara. ToTEKO yau inyakapan nemosoldados.
Kemaj Barac ouajtemok de on tepetl Tabor iuan on 10 mil soldados. 15 Ijkuak Barac opeu kinmiktia ika iespada, toTEKO okichiu para Sísara iuan nochimej isoldados ma mojkamikikan. On soldados yejuan yayaj ipan incarretas de guerra niman on yejuan san nejnentiayaj, omojkamikkej. Niman Sísara ouajtemok ipan icarreta niman ontlaksak. 16 Kemaj Barac okintojtokak on soldados yejuan yayaj ipan incarretas de guerra niman yejuan san nejnentiayaj, niman okinmajsitoj hasta Haroset-goim. Niman ompa nochimej okinmiktijkej. Xakaj onomanauij. 17 Chika ijkuakon, Sísara onotlaloj ichan Jael para niyanas. Jael isiuau katka Heber, on quenita. Ijkon okichiu pampa Jabín, on rey de Hasor, xnotlauelitayaj iuan on quenitas. 18 Jael okinamiktetsito Sísara niman okijlij:
—Xkalaki noteko, maka xmomojti.
Sísara okalak niman Jael okiyan niman okitlapachoj ika sen tela. 19 Kemaj Sísara okitlajtlanilij atl pampa sanoyej amikiya. Jael okitentlapoj sen kuetlaxtekomatl kampa keuayaj leche, niman okimakak para ma koni. Kemaj oksejpa okitlapachoj ika on tela. 20 Sísara okijlij on siuatl:
—Xmokaua kiauatenko. Tla yakaj uajlau niman mitstlajtoltia tla yakaj nikan nemi, xkijli: “Ka, xakaj nemi”.
21 Chika Sísara okochtiaj pampa sanoyej siautikatka, Jael okonkuik sen martillo niman sen estaca yejuan kitekitiltiaya para ipan kisalouaya ikal. Kemaj, yolik ononisiuijtiaj kampa nemiya Sísara, niman okitlalaktilijtiaj on estaca ipan itsontekon hasta opepechiu ipan tlajli. Ijkon omik Sísara.
22 Ijkuak Barac oajsik para okitejtemoto Sísara, Jael okinamikito, niman okijlij:
—Xuajla, nimitsititis on yejuan tiktejtemoua.
Barac okalak niman okitak Sísara yomik tlajkaltok ipan tlajli, ika sen estaca tlalaktok ipan itsontekon.