On naciones yejuan onokajkej Canaán
3
In yejuamej on naciones yejuan toTEKO okinkau Canaán para kintlatlatas on israelitas yejuan xe tlakatiyaj ijkuak iminuejkatajuan okichijkej nouijsokilistli para okinoyaxkatijkej Canaán: 2 (ToTEKO okinkau on naciones san para on israelitas yejuan xe kaman tlauijsokiyaj, ma kejekokan ken tlauijsokiskej.) 3 Onokajkej on makuiltimej tlayekankej filisteos, nochimej on cananeos, sidonios, niman heveos yejuan chantiyaj ipan itepeyoj Líbano, niman desde on tepetl Baal-hermón hasta Hamat. 4 Inka yejuamej in naciones, toTEKO okinek kintlatlatas on israelitas para kitas tla kintlakamatiskej on tlanauatiltin yejuan yokinmakaka iminuejkatajuan itechkopa Moisés. 5 Ijkin on israelitas opeu chantij intsajlan on cananeos, heteos, amorreos, ferezeos, heveos niman jebuseos. 6 Imintelpochuan niman inmichpochuan on israelitas ononamiktijkej inuan imintelpochuan niman inmichpochuan on tlakamej yejuan xisraelitas, niman okinmauistilijkej imindioses.Otoniel okinmanauij on israelitas itech Cusan-risataim
7 On israelitas okichijkej tlen xkuajli ixpan toTEKO. Okitlalkauijkej toTEKO, niman okinmauistilijkej ixneskayouan Baal niman Asera. 8 Yejua ika toTEKO okualan intechkopa yejuamej niman okintemaktilij itech Cusan-risataim, on rey de Mesopotamia, niman on israelitas okitekipanojkej chikueyi xipan. 9 Kemaj on israelitas onoueyikatsajtsalijkej itech toTEKO, niman toTEKO okitlalij sen temanauijketl yejuan okinmanauij. Yejua itoka katka Otoniel, ikoneu Cenaz, niman ikniu katka Caleb yejuan más konetl. 10 Iespíritu toTEKO okalak ipan Otoniel para okinyekan on israelitas, niman yejua oyaj otlauijsokito, niman toTEKO okipaleuij para ma kitlani Cusan-risataim. 11 Niman sankin xok oonyak nouijsokilistli ipan on región 40 xipan. Kemaj omik Otoniel.
Aod okinmanauij on israelitas itech Moab
12 On israelitas oksejpa okichijkej tlen xkuajli ixpan toTEKO. Yejua ika, toTEKO okimakak más poder Eglón irey on país Moab, xken israel. 13 Eglón okinnots on amalecitas niman on amonitas para okinuijsokej on israelitas, niman okinoyaxkatijkej on ueyikalpan yejuan kipiya palmeras itoka Jericó. 14 Niman on israelitas okitekipanojkej Eglón 18 xipan.
15 On israelitas onoueyikatsajtsilijkej itech toTEKO, niman toTEKO okitlalij sen temanauijketl. Yejua itoka katka Aod, ikoneu Gera yejuan kisaya itech itribu* Benjamín, niman yejua maopocheroj katka. Se tonajli on israelitas okititlankej Aod ma kiktili tlaxtlauijli de renta on rey Eglón. 16 Pero Aod okichijchiu sen espada yejuan okan tlateki niman tlajko metro ika ueyak. Okinotlalilij ixijlan itsintlan itlaken kampaka iyekmakopa. 17 Kemaj okiktik on tomin niman okimakato Eglón yejuan sanoyej tomauak katka. 18 Sakin ijkuak Aod yokimakaka on tomin, okis iminuan on yejuan ouajlajkej iuan. 19 Pero ijkuak oajsik intech on ídolos yejuan onkatkaj nisiu Gilgal, Aod oksejpa onokuep kampa nemiya Eglón, niman okijlij:
—Nikpiya tlinon nimitsijlis tejua rey, pero noneki nimitsijlis ichtaka.
Kemaj on rey Eglón okinmijlij itekipanojkauan makasa ma nauatikan niman ma kisakan ompa ne. 20 Ijkuak on rey Eglon ye uatikatka iselti ipan ikalijtik tlakpak kampa noseuiya ijkuak tonalko, Aod okalak ompa niman okijlij:
—In tlajtojli yejuan nimitsajkuilia, onechmakak noTeko Dios para tejua.
Ijkuak on rey Eglón ijkon okak, onotelkets kampa yeualtikatka. 21 Kemaj Aod yejuan opochero katka, okixikopintiaj iespada yejuan kipiyaya ixijlan, niman okitlalaktilijtiaj on rey Eglón ipan ijti. 22 Okitlalaktilij sanoyej chikauak hasta itsinkojyo on espada onokauato ijtik, niman ichajka Eglón okitepox ikojyo on espada, niman on espada hasta okisato ipan itlakayo on rey. Niman Aod xokixtilij. 23 Kemaj Aod kuajli okintsaku on tsakuijlomej niman okis ipan ventana.
24 Ijkuak Aod yokiska, itekitkauan on rey otlachakoj niman ika okitakej on tsakuijlomej kuajli tsakutokej, okinemilijkej kas on rey onokaltsaku ipan on ikalijtik kampa noxixaloyan. 25 Pero sakin* ijkuak youejkau kichaj niman okitakej ika on rey xuajkisa, otlatlapojkej ikan llaves. Niman ijkuak okitlapojkej on tsakuijlotl, okitakej tlajkaltok iminrey ipan tlajli.
26 Chika yejuamej nouejkauayaj, Aod ocholojteu. Niman sakin* ijkuak yopanok kampa onkatka on ídolo ne Gilgal onomanauito kampa itoka Seirat. 27 Ijkuak oajsik ipan iminueyitlalpan on israelitas okipits sen tlapitsajli ipan itepeyoj Efraín, para ma nosentlalikan on israelitas. Niman nochimej yejuamej ouajtemokej iuan Aod yejuan kinuajyekantiaya. 28 Aod okinmijlij: “Xnechtokakan. Tiauij tikominuijsokij on moabitas, pampa toTEKO techchinmaktilis, niman tikintlaniskej totlauelikniuan.” Ijki tej, on israelitas okitokakej Aod niman okitsakukej kampa panolo ipan on río Jordán niman xakaj okauilijkej ma pano. 29 Ipan on tonajli okimiktijkej kanaj 10 mil moabitas yejuan kojtikej niman más ueliyaj tlauisokiyaj. Nion se xonomanauij. 30 Ijkon tej, on israelitas okintlankej on moabitas. Kemaj ijkuak nochi in yonochiu oonyak seuilistli 80 xipan ipan on región.
Samgar onochiu juez
31 Sakin okitenejkej okse juez yejuan itoka katka Samgar. Yejua ikoneu katka Anat. Niman Samgar okinmiktij 600 filisteos ika sen vara yejuan kuayakapitstik yejuan ika kimpeuiyaj yolkej. Yejua no okinmanauij on israelitas.