Iángel toTEKO ononextij ne Boquim
2
On ángel yejuan toTEKO okuajtitlan okis Gilgal niman oyaj kampa itoka Boquim, niman ijkin okinmijlij on israelitas: “Nejua onemechkixtij ipan on tlajli Egipto niman onemechajuikak ipan in tlajli yejuan onikimprometerouilij ika sen tlajtolmakalistli nemouejkatajuan ika nikinmakas. Ijkin onikinmijlij: ‘On pacto* yejuan onikchiu nemouan nochipa onyas, 2 tla nemejuamej xnenkichiuaj pacto* iminuan on tlakamej yejuan chantij ipan on tlajli, tla yej nenkixoxotoniaj imintlaixpauan'. Pero nemejuamej xonennechtlakamatkej. ¿Tline* ijkon onenkichijkej? 3 Aman tlami xmatikan, ika nejua xnikinkixtis on tlakamej yejuan nemij nemotsajlan. Yejuamej niman imindioses tlamach ika mechkajkayauaskej para xuetsikan ipan tlajtlakojli”.4 Ijkuak on ángel yejuan toTEKO okuajtitlan otlan tlajtoua, on israelitas opeu sanoyej ajmankachokaj. 5 Yejua ika, ompa okitokayotijkej Boquima, niman ompa okitlauentlalilijkej toTEKO.
Josué omik
(Jos. 24.29-31)
6 Ijkuak Josué ononauatij iminuan on israelitas, cada se oyaj okinoyaxkatito on tlajli kampa okimakakej. 7 Chika Josué sanken* nemiya, on israelitas kimauistiliayaj toTEKO. Niman no kimauistiliayaj toTEKO chika sanken* nemiyaj on uejueyixtokej tlayekankej yejuan okitakej nochi on tlamauisoltin yejuan toTEKO okichiu impampa on israelitas. 8 Pero Josué itelpoch Nun, omik ijkuak kipiyaya 110 xipan, 9 niman okitokakej ipan itlal kampa itoka Timnat-sera, yejuan onkaj inorte ika on tepetl Gaas, ipan on itepeyoj Efraín.
10 No omikkej nochimej on israelitas yejuan iuan yeuayaj Josué. Niman on yejuan sakin* otlakatkej, xitlaj* kimatiyaj de toTEKO, nion xkimatiyaj on tlen toTEKO okichiu impampa on israelitas.
On israelitas kitlalkauiyaj toTEKO
11 Yejua ika, on israelitas opeu kichiuaj tlen xkuajli ixpan toTEKO, pampa opeu kinmauistiliaj miyek ixneskayouan Baal. 12 Okitlalkauijkej toTEKO, iminDios inuejkatajuan yejuan okinkixtij ipan on tlajli Egipto, niman opeu kinmauistiliaj imindioses on tlakamej yejuan chantiyaj ompaka. Niman ijki okualanijkej toTEKO. 13 Okitlalkauijkej toTEKO para okimauistilijkej on dios Baal niman ixneskayouanon dios Astarot. 14 Yejua ika, toTEKO sanoyej okualan intechkopa, niman okichiu para on tlachtekej ma kinkuilikan nochi on tlen kipiyaj. Niman okichiu para on imintlauelikniuan yejuan chantiyaj nijnisiu ma kintlanikan. Yejua ika, yejuamej xouelkej okinmixnamikkej. 15 Nochipa ijkuak yayaj ontlauijsokiyaj, toTEKO sano yejua nochiuaya ken intlauelikniu. Yejua ika xtetlaniyaj ijkon ken yejua yokinmijlijka. Ijkon tej, toTEKO kintlajyouiltiaya on israelitas.
ToTEKO okintlalij tlayekankej intoka teyolkuitijkej para ma kinmanauikan on israelitas
16 Pero sakin, toTEKO sano yejua opeu kintlalia teyolkuitijkej yejuan ueliyaj kinmanauiyayaj de on tlachtekkej. 17 Pero on israelitas xokinkakkej nion xokintlakamatkej on teyolkuitijkej, yej niman okitlalkauijkej toTEKO, niman okinmauistilijkej oksekimej dioses. Iminuejkatajuan okitlakamatkaj itlanauatiluan toTEKO, pero yejuamej xijki okichijkej. 18 Cada juez yejuan toTEKO kintlaliaya kimpaleuiyaya. Chika nemiya on juez, yejua kinmanauiyaya on israelitas itech imintlauelikniuan, pampa ijkuak toTEKO kintaya ken kintlajyouiltiayaj kinmikneliaya. 19 Pero ijkuak on juez mikiya, on israelitas oksejpa tlajtlakouayaj niman kichiuayaj más xkuajli xken imintajuan. Kintekipanouayaj niman kinmauistiliayaj oksekimej dioses. Sanoyej tsontekonchikajkej* katka niman xkinekiyaj kajkauaskej on tlen xkuajli kichiuayaj.
20 Yejua ika, toTEKO sanoyej okualan intechkopa on israelitas, niman okijtoj: “In tlakamej xkitlakamatij on pacto* yejuan onikchiu iminuan iminuejkatajuan niman xkinekij nechtlakamatiskej. 21 Yejua ika, aman ika notlauel no xok nikinkixtis on tlakamej yejuan chantij ipan on tlajli yejuan Josué xokinkixtij ijkuak xe mikiya.”
22 ToTEKO okijtoj xok kinkixtis on tlakamej pampa kinekiya kitas tla on israelitas uej kitlakamatiskej itlanauatiluan noso ka, ijkon ken okitlakamatkej iminuejkatajuan. 23 Yejua ika tej, toTEKO xokinkixtij on tlakamej yejuan chantiyaj ipan on tlajli yejuan toTEKO xokimaktilij Josué, yej okinkauilij ma nokauakan.