Saúl niman itelpochuan omikkej ipan nouijsokilistli
31
Ijuak on filisteos okinuijsokej on israelitas, on israelitas ontlatlaksakej. Ne ipan on tepetl Guilboa miyekej israelitas omikkej. 2 Niman on filisteos okitojtokakej Saúl iuan itelpochuan, niman okimiktijkej Jonatán, Abinadab niman Malquisúa. 3 Kemaj on filisteos ijkuak okixmatkej Saúl, okimotlakej ika imintlaminal niman sanoyej okikokojkej. Yejua ika Saúl sanoyej onomojtij. 4 Kemaj Saúl okijlij itlapaleuijkau yejuan kiktiya itepos: —Xkixti moespada niman ika xnechmikti para maka uajlaskej on xkuajkualtin tlakamej filisteos, niman noka uetskaskej niman kemaj nechmiktiskej.
Pero itlapaleuijkau xokinek okimiktij pampa sanoyej nomojtiaya. Kemaj Saúl okonkuik iespada, okitelkets ipan tlajli, niman ipan onotlajkal para onomiktij. 5 Niman ijkuak itlapaleuijkau yejuan kiktiya itepos okitak ika Saúl yomik, yejua no ijki okichiu ipan onotlajkal iespada niman omik iuan Saúl. 6 Ipan on tonajli, ijkon omik Saúl iuan yeyi itelpoch niman itlapaleuijkau inuan nochimej on soldados yejuan ompa iuan nemiyaj. 7 On israelitas yejuan chantiyaj ipan okse lado de on ixtlauatl niman on yejuan chantiyaj kampaka ikisayan tonaltsintli de on río Jordán, ijkuak okitakej ika on soldados israelitas yochojcholojkej, niman ika Saúl niman itelpochuan yomikkej, okiskej ipan iminuejueyikalpanuan niman ochojcholojkej. Kemaj on filisteos yejuamej onochantitoj kampa chantiyaj on israelitas.
8 Uajmostla ijkuak on filisteos oyajkej para kintlakijkixtiliskej on yejuan omikkej, okitakej tlakaj Saúl iuan yeyi itelpoch no ompa omikkej ipan on tepetl Guilboa. 9 Kemaj okechtsontekkej Saúl niman okuilijkej nochi iteposuan. Niman okintitlajkej tlajtojkamej ipan nochi on ueyitlalpan filisteo para nochiuiyan okimachistitoj nochi tlakatl niman no okimachistitoj imindioses ne impan on tiopanmej. 10 Kemaj itepos Saúl okitlalijkej ipan itiopan on ídolo Astarté. Niman okipilojkej imikatlalnakayo ipan on tepantli yejuan kiyeualojtoya on ueyikalpan Bet-sán.
11 Ijkuak on chanejkej Jabes de Galaad okimatkej on tlen okichiuilijkej Saúl on filisteos, 12 onosentlalijkej nochimej on tlakamej yejuan xmojkej niman oyajkej ne Bet-sán onejnenkej nochi yeuajli. Okitemoltitoj itlalnakayo Saúl niman imintlalnakayo itelpochuan, niman okinuikakej ne Jabes, niman ompa okintlatijkej. 13 Kemaj okinsentlalijkej iminomiyouan niman okintlalpachojkej itsintlan sen auakojtli ne Jabes. Niman kemaj onosaukej chikome tonajli pampa sanoyej najmanayaj.