David okintlan on amalecitas
30
Kampa ika yeyi tonajli, David niman on tlakamej yejuan kinyekanaya oajsikej ipan on ueyikalpan Siclag. Niman okitakej ika on amalecitas ipan yokalakkej Néguev niman on ueyikalpan Siclag, niman ika yokixoxotonijkej niman yokitlatijkej. 2 No okinuikakej nochimej on siuamej, niman nochimej on oksekimej yejuan ompa nemiyaj, pero xakaj okimiktijkej. 3 Ijkuak David niman on tlakamej yejuan kinyekanaya oajsikej ipan on ueyikalpan, niman okitakej ika yokitlatijkej, niman iminsiuauan niman inkoneuan yokinuikakej, 4 opeu sanoyej chokaj, hasta kaman ochokis tlankej. 5 On amalecitas no okinuikakej isiuauan David: Ahinoam yejuan ualeuaya Jezreel, niman Abigail yejuan isiuau katka Nabal, yejuan ualeuaya ipan on ueyikalpan Carmel. 6 David xok kimatiya ken kichiuas pampa on tlakamej yejuan kinyekanaya kijtouayaj kitemojmotlaskej, pampa sanoyej najmanayaj niman kualaniyaj ika okinuikakej inkoneuan. Pero David onoyolchikau itech iTEKO Dios. 7 Kemaj David okijlij on tiopixki Abiatar ikoneu Ahimelec:
—Xnechajkuili on efod*.
—¿Tinechkauilia ma nikintojtoka on tlachtekkej? ¿Uelis nikominnajsis?
Niman toTEKO okinankilij:
—Kemaj, xkintojtoka, uelis tikominnajsis niman tikinmanauis nochimej on yejuan okinuikakej.
9 Isijkapan okis David iminuan on 600 tlakamej yejuan nemiyaj iuan, niman oajsikej ipan on ayajtok itoka Besor. 10 Niman ompa onokajkej 200 on tlakamej yejuan kinyekanaya pampa sanoyej yosiaukaj niman xouel okipanokej on ayajtok, pero David niman on 400 tlakamej yejuan kinyekanaya oyajkej. 11 Más tiotlak, on tlakamej yejuan kinyekanaya David okinextikej sen tlakatl egipcio ipan on ixtlauatl, niman okuikilijkej David. Okitlakualtijkej niman okatlitijkej. 12 Okimakakej tlajkotipan sen memelatsin yejuan kipiya higos, niman ome tematsitsimej de uvas yejuan tetsoltik. Kemaj ijkuak on egipcio yotlakuaj, oksejpa onotlachaltij, pampa kipiyaya yeyi tonajli niman yeyi yeuajli ika xtlakuaya nion xatliya. 13 Kemaj David okitlajtoltij:
—¿Akinon moteko? ¿Kanon tiualeua?
On egipcio okinankilij:
—Nejua niegipcio, niesclavo itech sen amalecita, pero ye kipiya yeyi tonajli ika noteko nikan onechkajteu pampa onikualok. 14 Tejuamej otiajkaj otitlachtekitoj kampaka sur de on inueyitlalpan on Cereteos. No otitlachtekitoj ipan iueyitlalpan Judá niman iueyitlalpan on iueyifamilia Caleb niman otiktlatijkej on ueyikalpan Siclag.
15 Niman David okijlij:
—¿Uelis titechuikas kampa yejuamej nemij?
On egipcio okinankilij:
—Tla tiktestigojtlalia Dios ika xtinechmiktis nion xtinechtemakas itech noteko, nemechuikas kampa nemij.
16 Niman on egipcio okinuikak hasta kampa nemiyaj on tlachtekkej. Yejuamej yonosesemankaj nochiuiyan ipan campo. Tlakuajtikatkaj, tlaonitikatkaj niman tlailuichiuayaj ika miyek pakilistli ika nochi on tlen okichtekkej ipan iminueyitlalpan on filisteos niman ipan iueyitlalpan Judá. 17 David opeu kinmiktia desde kualkan hasta uajmostla tiotlak. Sa on 400 telpokamej ocholojkej ipan imincamellos.
18 David oksejpa okitekuilij nochi on tlen okinmichtekilijkaj on amalecitas, niman no okinmanauij on omemej isiuauan. 19 Nochi okitekuilij yejuan okinmichtekilijkaj, xitlaj* opoliuito. No ijki nochimej yejuan ompa nemiyaj, xakaj opoliuito. Yej, David nochimej okinmanauij. 20 No ijki okinkuilij on amalecitas nochi iminborregos niman iminvacas. Niman on israelitas yejuan kimpeuijtiayaj iminyolkauan on amalecitas, ijkin kijtouayaj: "¡In yejua iparte yejuan kiselis David!"
21 David oajsikej ipan on ayajtok Besor kampa onokajkaj on 200 tlakamej yejuan kinyekanaya, yejuan xok ouel oyajkej iuan pampa sanoyej yosiaukaj. Niman on tlakamej yejuan kinyekanaya okiskej, okinamikitoj David iminuan on yejuan iuan yayaj. Kemaj David okiminnisiuij niman okintlajpaloj. 22 Pero sekimej tlakamej yejuan xkuajli tlanemiliayaj, okijtojkej:
—On yejuan xoyajkaj touan maka itlaj ma kiminmakakan. San ma kinmakakan iminsiuauan, iminkoneuan niman kemaj ma uiyan.
23 Pero David okijtoj:
—Maka ijkon xchiuakan nokniuan. ToTEKO yejua nochi yotechmakak, niman yotechmanauij. Yejua otechinmaktilij on tlakamej yejuan otechtlatekilijkaj. 24 On xakaj kuelitas ken nenkijtouaj, pampa on yejuan nikan onokajkej yejuamej ocuidarojkej on tlajtlamach*. Yejua ika, no ichkich kiseliskej kenon yejuan otlauijsokitoj.
25 Desde ijkuakon hasta aman on israelitas kitokaj in tlanauatijli yejuan David okitlalij.
26 Ijkuak David oajsik ipan on ueyikalpan Siclag, itlajsojkaikniuan* yejuan uejueyixtokej ne Judá, seki okintitlanilij on tlajtlamach* yejuan okinkuilijkej imintlauelikniuan, niman okijtoj ijkin ma kinmijlikan: “Nikan nenkipiyaj in tetlayokolijli* yejuan otikinkuilijkej itlauelikniuan toTEKO”. 27 Okintitlanilij on tlayekankej yejuan chantiyaj ne Betel, ne Ramot yejuan nokaua ipan on xalpatlajkan Néguev, ne Jatir, 28 ne Aroer, ne Sifmot, ne Estemoa, 29 niman ne Racal. No okintitlanilij on yejuan chantiyaj ipan iuejueyikalpanuan Jerameel, niman ipan iminuejueyikalpanuan on quenitas. 30 No ijki okintitlanilij ne Horma, ne Corasán, ne Atac, 31 ne Hebrón niman nochiuiyan kampa David niman on tlakamej yejuan kinyekanaya okistinenkej.