On rey Aquís xokauilij David kinuijsokis on israelitas
29
On filisteos okinsentlalijkej nochimej insoldados ne kampa itoka Afec. Niman on israelitas uej okitlalijkej incampamento itech on amejli yejuan onkaj ne Jezreel. 2 On tlayekankej filisteos xexelijtiayaj, sekimej de 100 soldados niman sekimej de se mil. Yejuamej yayaj tlayakapan, niman David iuan on tlakamej yejuan kinyekanaya uej yayaj tlakuitlapan iuan Aquís. 3 On tlayekankej filisteos okitlajtoltijkej Aquís:—¿Tlinon kichiuaj nikan in hebreos*?
Niman Aquís okiminnankilij:
—In yejua David yejuan katka iueyitekitkau Saúl, iminrey on israelitas. Ye kipiya keski xipan ika nemi nouan niman hasta aman xitlaj* kichiua itlaj tlen xkuajli.
4 Pero on tlayekankej filisteos okualankej itech on rey Aquís, niman okilijkej:
—Xnauati ma uiya ipan on ueyikalpan yejuan otikmakak, niman maka ma uiya touan ipan in nouijsokilistli pampa uelis nokuepas totlauelikniu niman kinekis techuijsokis. Yejua kinemilis ika iteko kiselis ikan pakilistli tla kinmiktis tosoldados niman kinmakas intsontekonuan. 5 In yejua on David yejuan kiteneuayaj ijkuak nokuikatiayaj kijtouayaj:
"¡Se mil tlakamej okinmiktij Saúl,
niman 10 mil okinmiktij David!"
6 Kemaj Aquís okonnots David niman okijlij:
—Nimitsijlia ixpan toTEKO ika tejua sanoyej tikuajli tlakatl, niman nikuelita ken titlauijsoki touan. Desde ijkuak otiuajlaj hasta aman, xkaman nikita tla tikchiua itlaj tlen xkuajli. Pero on tlayekankej filisteos xmitsseliaj. 7 Yejua ika tej, xmokuepa kuajlotika para maka más tikinkualanis.
8 Niman David okinankilij Aquís:
—¿Tlinon xkuajli onikchiu? ¿Tlinon otinechitilij xkuajli onikchiu ipan nochi in tonaltin, yejuan ika xtikneki ma nikinuijsokiti motlauelikniuan?
9 Aquís okinankilij David:
—Nejua kuajli nikmati ika sanoyej kuajli moyojlo ken se iángel Dios, pero on tlayekankej filisteos yokijtojkej: “Maka xuiya touan ipan on nouijsokilistli”. 10 Yejua ika, mostla saniman tejua niman nochimej on tlakamej yejuan tikinyekana xmokuepakan nemochan.
11 Ijkon tej, uajmostla saniman kualkan, David niman on tlakamej yejuan kinyekanaya onokuitejkej niman oyajkej ipan imimpaís on filisteos, chika on filisteos yayaj para Jezreel.