28
Ipan on tonaltin, on filisteos okinsentlalijkej iminsoldados para okinuijsokitoj on israelitas, niman on rey Aquís okijlij David:—Ye tikmatstikaj ika tejua niman on tlakamej yejuan tikinyekana ika onkaj nenyaskej nouan ipan nouijsokilistli.
2 David okinankilij:
—Kuajli yes. Aman tikitas tlinon ueli nikchiua.
Niman Aquís okijlij:
—Tla ijkon nimitstlalis para nochipa xkinyekana nosoldados yejuan nechcuidarouaj.
Saúl oyaj itech sen siuatl yejuan tlajtouaya inuan mikatsitsimej
3 Ipan on tonaltin Samuel yomika, niman nochimej on israelitas yokichokilijkaj, niman yokitôkakaj ne Ramá kampa iueyikalpan katka. Niman Saúl uej yokintotokaka nochimej on tetlatejtemouilijkej niman on yejuan iminuan tlajtouayaj mikatsitsimej.
4 On filisteos onosentlalijkej niman okitlalitoj incampamento ne kampa itoka Sunem. Niman Saúl no okinsentlalij isoldados, niman okitlalijkej incampamento ne kampa itoka Guilboa. 5 Ijkuak Saúl okintak on soldados filisteos, sanoyej onomojtij. 6 Yejua ika, onoueyikatsajtsilij itech toTEKO, pero toTEKO xokinankilij nion ipan temiktin nion itech on Urim, nion intech tiotlajtojkej. 7 Yejua ika, Saúl ijkin okinmijlij itlapaleuijkauan:
—Xtejtemokan sen siuatl yejuan ueli kiminnotsa mikatsitsimej, niman nias nikontas.
Niman itlapaleuijkauan okijlijkej:
—Ipan on kalpan Endor nemi sen siuatl yejuan kiminnotsa on mikatsitsimej.
8 Niman Saúl onotlakentij oksekneka para oteixkajkayau. Kemaj okuikak ome tlakatl niman oyajkej ijkuak tlayoua okitatoj on siuatl, niman okijlij:
—Nikneki xnechtlatejtemouili niman xnechnochili iespíritu on yejuan nejua nimitsijlis.
9 Niman on siuatl okijlij:
—Tejua ye tikmatstikaj ika on rey Saúl otlanauatij ma kinkixtikan nochimej on yejuan tetlatejtemouiliaj niman yejuan kiminnotsaj on mikatsitsimej. Tejua san tinechtejtemouilijtikaj ma nechmiktikan.
10 Kemaj Saúl ika itokatsin Dios okitlajtolmakak:
—Nimitstlajtolmaka ika itokatsin Dios ika xitlaj* temojtij mopan nochiuas.
11 Niman on siuatl okijlij:
—¿Akinon tikneki ma niknotsa?
Saúl okijtoj:
—Xnechnochili Samuel.
12 Ijkuak on siuatl okitak Samuel, otsajtsiteu niman okijlij Saúl:
—¿Tline otinechkajkayau? !Tlakaj tejua tiSaúl!
13 Kemaj Saúl okijlij:
—¡Maka xmomojti, yej xnechijli tlinon tikita!
On siuatl okinankilij:
—Nikita sen tlakatl yejuan nesi ken sen dios ye uajkistiu ijtik tlajli.
14 Niman Saúl okitlajtoltij:
—¿Ken tlinon nesi?
On siuatl okinankilij:
—Sen tlakatl ueuentsin tlakemej ika sen capa.
Saúl okajsikamat ika yejua Samuel, niman onotlakuantelkets niman onopachoj hasta ipan tlajli. 15 Kemaj Samuel okijlij:
—¿Tline tinechpajsoloua niman tikchiua ma niuajla?
Niman Saúl okinankilij:
—Nejua sanoyej yonimojkamik pampa on filisteos nechuijsokij. Niman Dios yonechtlalkauij niman xnechnankilia, nion ipan temiktli nion intech tiotlajtojkej. Yejua ika nimitsnotsa pampa nikneki xnechijli tlinon nikchiuas.
16 Kemaj Samuel okinankilij:
—¿Tla toTEKO yejua xok mouan nemi, niman yonochiu motlauelikniu, ¿Tline yej nejua tinechtlajtoltia? 17 ToTEKO ye kichijtikaj mouan on tlen omitsijlijka notechkopa. Yejua aman yomitskuilij motekiuajyo ken rey niman yokimakak motekitkau David, 18 pampa tejua xotiktlakamat itlanauatil toTEKO, nion xotikinmiktij nochimej on amalecitas ken yejua omitsmanauitij xchiua. Yejua ika, aman toTEKO mitscastigaroa. 19 ToTEKO mechintemaktilis intech on filisteos, tejua niman on israelitas, niman mostla tejua niman motelpochuan nenuajlaskej notech. Niman noTEKO no kichiuas para on soldados israelitas ma uetsikan inmak on filisteos.
20 Kemaj Saúl oixakamanteuetstiaj hasta ueyakixtoya pampa sanoyej okimojtij on tlen okijlij Samuel. Yejua xok kojtik katka pampa xtlakuaya nochi se tonajli niman se yeuajli. 21 Ijkuak on siuatl okitak ika Saúl sanoyej yonomojtij, okijlij:
—Onimitstlakamat niman onikchiu tlen otinechtlajtlanij maski ueliskia nimikiskia. 22 Aman tej, nikneki no xkaki tlinon nimitsijlis. Xnechkauili ma nimitsmaka achijtsin tlakuajli para xkajsi chikaualistli niman ijkon uelis tajsis kampa tias.
23 Saúl xkinekiya tlakuas, pero isoldados niman on siuatl miyekpa okijlijkej para ma tlakua hasta kaman okiyolejkej. Kemaj onokuiteu kampa tlajkaltoya, niman onotlalij ipan sen tlapechtli. 24 Niman on siuatl okimiktij sen becerro tomauak yejuan kipiyaya ichan. Niman no okimaxakualoj harina niman okichijchiu pan yejuan xkipiya tlaxokolilistli*. 25 Kemaj on tlakuajli okiktilij Saúl niman no okinmakak itlapaleuijkauan. Sakin ijkuak yotlakuajkej, ononauatijkej niman oyajkej sano ipan on tlayoua.