David oyaj ipan inueyitlalpan on filisteos
27
Pero David ijkin kinemiliaya: "Maski xnimantsin, Saúl nechmiktis. Más kuajli tla nikisas niman nias ipan imintlal on filisteos, para ijkon Saúl makasa ma nechpajsolo niman makasa ma nechtejtemojtinemi ipan nochi iueyitlalpan Israel. Yejua ika nicholos itech". 2 Ijki tej, David niman on 600 tlakamej yejuan kinyekanaya, oyajkej ipan on ueyikalpan Gat para tekitiskej itech Aquís, ikoneu Maoc. Maoc rey katka ipan on ueyikalpan Gat. 3 David niman on tlakamej yejuan kinyekanaya ochantikej ipan on ueyikalpan Gat itech on rey Aquís. Cada se chantiya iuan ifamilia. David okuikak on ome isiuau: Ahinoam yejuan ualeuaya Jezreel niman Abigail yejuan isiuau katka Nabal niman ualeuaya ipan on ueyikalpan Carmel. 4 Ijkuak Saúl okimat ika David okis ipan on tlajli Israel niman oyaj ipan on ueyikalpan Gat, xok okitejtemoj.5 David okijlij on rey Aquís:
—Noteko tla tikita kuajli nimitstlajtlanilia xnechkauili ma nichanti ipan okse ueyikalpan, pampa xnechtocaroua nejua nimotekitkau nichantis mouan ipan in ueyikalpan kampa onkaj mopalacio.
6 Sano ipan on tonajli, Aquís okimakak David on ueyikalpan Siclag. Yejua ika, hasta aman Siclag sanken* teyaxka* intech on reyes de Judá.
7 David ompa ochantik ipan iminueyitlalpan on filisteos se xipan ipan naui metstli. 8 Niman David iuan on tlakamej yejuan kinyekanaya yayaj komintlachtekiliayaj on gesuritas, gezritas niman on amalecitas, yejuan chantiyaj ipan on región. Peuayaj desde Telaim kampaka Sur, niman ontlamiyaj hasta ipan on tlajli Egipto. 9 Ijkuak David kinuijsokiya yejuan nemiyaj ipan on región, nochimej kinmiktiaya, tlakamej niman siuamej. Niman no kinoyaxkatiaya iminborregos, iminuakaxuan, impolokouan, imincamellos niman hasta imintlakeuan. Kemaj nokuepaya kampa nemiya Aquís. 10 Niman on rey Aquís kitlajtoltiaya: "¿Aman katlejua kalpan otiktlachtekilij?" Niman David xkimelajkaijliaya, yej ijkin kinankiliaya: "Ne Judá kampaka sur", noso kijliaya: "Ne Jerameel kampaka sur", noso "Ipan iminueyitlalpan on quenitas kampaka sur."
11 David kinmiktiaya nochimej, on tlakamej niman siuamej para ijki xakaj ueliya yaya ne Gat para konijliayaj on rey Aquís, tlen yejua kichiuaya. David nochipa ijki okichiu ijkuak chantiya ipan iminueyitlalpan on filisteos. 12 Niman Aquís kineltokaya nochi tlen David kijliaya, niman ijkin kinemiliaya: "Kuajli ika David yokinkualanij on israelitas. Ijki uej nochipa nechpaleuis."