David oksejpa okitlapojpoluij inemilis Saúl
26
On chanejkej ipan on ueyikalpan Zif oyajkej Gabaa okitatoj Saúl niman okijlijkej: "David niyantikaj ipan on tepetl Haquila ixpan on xalpatlajkan."2 Kemaj Saúl nimantsin okis inmiuan 3 mil soldados yejuan más uelij tlauijsokij, niman oyajkej okitejtemotoj David ipan on xalpatlajkan Zif. 3 Saúl okitlalij icampamento ipan on tepetl Haquila itech ojtli, ixpan on xalpatlajkan. Pero ijkuak David nemiya ipan on xalpatlajkan okimat ika Saúl kitejtemoua. 4 Yejua ika, David okintitlan tlakamej ma ichtakatlajtlachatij para kimatis hasta nemiya Saúl. 5 Kemaj David oichtakayaj kampa nemiya Saúl niman okitak kampa kochiya Saúl niman Abner, ikoneu Ner. Abner tlayekanketl katka itech isoldados Saúl. Niman David okitak ika Saúl kochiya ipan on campamento, niman kiyejyeualojtikatkaj isoldados. 6 Kemaj David okinots Ahimelec on heteo, niman Abisai ikoneu Sarvia ikniu Joab, niman okintlajtoltij:
—¿Akinon kineki yas nouan ipan icampamento Saúl?
Niman Abisai okinankilij:
—Nejua nias mouan.
7 Sano ipan on yeuajli David niman Abisai oyajkej ipan on campamento. Saúl kochiya ijtik on campamento, niman ikuatsontlan onkakta ilanza tlalaktikatka ipan tlajli. Abner niman nochimej on soldados kochiyaj iyeualkan Saúl. 8 Kemaj Abisai okijlij David:
—Dios yomitsmaktilij motlauelikniu. Xnechkauili ma nikmikti, ma niktlalakti ipan tlajli sano ika ilanza. San ika se niktlalaktilis niman mikis.
9 Pero David okinankilij:
—Maka xmikti, pampa on yejuan kimiktis on rey yejuan toTEKO okitlalij, ika onkaj kiselis castigo. 10 San toTEKO uelis kixtilis inemilis ijkuak yoajsik ika mikis, noso ijkuak yas ipan nouijsokilistli. 11 ToTEKO ma nechpaleui maka nikmiktis on rey yejuan yejua okitlalij. Aman tikiktiskej ilanza niman iatekon yejuan kipiya atl, yejuan onokej ne ikuatsontlan, niman tiauij.
12 Niman David okonkuik ilanza niman on iatekon yejuan onkatkaj ikuatsontlan Saúl, niman oyajkej. Xakaj okintak, nion xakaj okinkak. Xakaj otlachix pampa nochimej kochiyaj, pampa toTEKO okichiu sanoyej ma kochmikikan. 13 Kemaj David okipanok on ixtlauatl niman otlejkok ikuapan sen tlamimijli, kampa uejka notstikatka iuan Saúl. 14 Kemaj David chikauak okonnots Abner niman on soldados:
—¡Abner, xnechajnankili!
Kemaj Abner okinankilij niman okijlij:
—¿Tlen akin tejua ika tiktsajtsilia on rey?
15 Niman David okijlij Abner:
—¿Tlen, xtejua on yejuan más ueyixtikaj tlakatl intech on israelitas? ¿Tline xotikmanauij on moteko rey ijkuak akinonon okalak ipan icampamento niman kinekiya kimiktis? 16 Tejua xkuajli otikchiu ika xotikmanauij. Nejua nemechixkomaka ixpan toTEKO ika mechtocaroua mechmiktiskej, pampa xonencuidarojkej nemoteko on rey yejuan toTEKO okitlalij. Xtejtemo on lanza niman on atekomatl ikan atl yejuan onkatkaj ikuajtsontlan morey. Xkita tla tikinnextia.
17 Ijkuak Saúl okitenkak David, okichikajkaijtoj:
—¿Tlakaj yej tejua nokoneu David yejuan tinechnotsa?
Niman David okinankilij:
—Kemaj noteko, nejua. 18 Pero, ¿Man tline tinechtotokatinemi nejua nimotekitkau? ¿Tline, tlinon xkuajli onikchiu? 19 Nejua nimitstlajtlanilia xnechkaki noteko. Tla toTEKO omitsnauatij para tinechuijsokis, tla ijkon niknekiskia nikmakas sen uentli. Pero tla san on tlakamej mitsijliaj xnechuijsoki, tla ijkon toTEKO ma kintlaueli pampa nennechkixtiaj ipan in tlajli yejuan iyaxka* toTEKO. Niman nenechchiualtiaj para ma niuiya kampa san uelis nikinmauistilis oksekimej dioses. 20 Nejua xniknekiskia nimikis uejka ipan okse país kampa xnemi toTEKO Dios. Pero tejua noteko otikis otinechtejtemoto, ken tikontejtemoskia sen tekpin, niman tinechtotokatinemi ipan tepemej ken tiktejtemojtinemiskia sen tototl.
21 Kemaj Saúl okijtoj:
—¡David nokoneu, nikmatstikaj ika yonitlajtlakoj! Yonikchiu sanoyej sen ueyi tontojyotl ken yakaj yejuan xitlaj* kimati. Aman tej, xuajla notech. Xokuitlaj nimitschiuilis pampa aman ipan in tonajli otinechititij ika tiktlakaita nonemilis.
22 David okinankilij:
—Nikan onkaj molanza noteko. Ma uajla sen motlakeual ma kuiki. 23 Niman toTEKO ma kitlaxtlauili on akin melauak kineltoka niman kichiua tlen kuajli. Maski aman toTEKO omitstemaktilij notech, xoniknek onimitsmiktij, pampa tejua tirey yejuan toTEKO okitlapejpenij. 24 Niman ijkon ken aman xoniknek onimitskixtilij monemilis, no ijki toTEKO ma kimanaui nonemilis niman ma nechmanaui de nochi on tlen xkuajli.
25 Kemaj Saúl otsajtsik:
—¡ ToTEKO ma mitstiochiua David, nokoneu! ¡Tejua tikchiuas uejueyi tlajtlamach* niman nochi kuajli kisas on tlen tikchiuas!
Kemaj Saúl oyaj ichan, niman David no oyaj.