Samuel omik
25
Samuel omik, niman nochimej on israelitas onosentlalijkej para okichokilijkej. Okitôkakej ichan ne Ramá. Sakin David oyaj ipan on xalpatlajkan itoka Parán.David niman Abigail
2 Ipan on kalpan Maón chantiya sen tlakatl yejuan sanoyej rico katka. Kipiyaya 3 mil borregos niman se mil chivos. Niman yaya ipan on ueyikalpan Carmel kampa kipiyaya irrancho, niman ompa kinximaya iborregos. 3 In tlakatl itoka katka Nabal, niman san tetlajtlaueltik katka niman xkuajli nouikaya. Yejua teuejkakoneu katka itech Caleb. Pero Abigail, isiuau, uej kualtetsin katka niman tlamachilisyej katka.
4 Ijkuak David nemiya ipan on xalpatlajkan, okimat ika Nabal nemiya ne Carmel kampa kinximaya iborregos. 5 David okititlan majtlaktli itlakeual yejuan okinmijlij ma uiyan Carmel para ma kitatij Nabal niman ma kijlikan ika David kitlajpaloua. 6 Ijkin okinmijlij ma kijlikan: "Toteko David mitsnekilia miyek tlatiochiualistli niman nochi tlen kuajli, para tejua niman para nochi mofamilia iminuan nochimej yejuan nikan mouan nemij. 7 David okimat ika tikinxima moborregos, niman ye tikmatstikaj ika motlajpixkauan nemiyaj touan nikan ipan in ueyikalpan Carmel, niman no tikmatstikaj ika ijkuak onenkej touan xkaman otikimpajsolojkej, nion xitlaj* otikinkuilijkej. 8 Tla tikneki, uelis tikintlajtoltis motlakeualuan, niman yejuamej mitsijliskej ika xtimitskajkayauaj. Yejua ika tej, aman nimitsyemankatlajtlanilia xkinseli kuajli in telpokamej yejuan ajsiskej mochan ipan in tonajli ijkuak tikchiua sen iluitl. Niman no xkinmaka yejuamej san tlinon tiuelis para kikuaskej niman nejua no xnechmaka pampa nejua niuajnochijtiu ken sen mokoneu."
9 On itlakeualuan David oyajkej niman okijlitoj Nabal nochi ken David okinmijlij, niman okichixkej para ma kiminnankili Nabal. 10 Pero Nabal ijkin okiminnakilij:
—¿Akinonon David? ¿Akinon on ikoneu Isaí? Ipan in tonaltin nemij miyekej esclavos yejuan cholojteuaj itech iminteko. 11 On kenon tlakamej yejuan nion xnikmati kanon ualeuaj, xnikinmakas on tlakuajli, on atl niman on nakatl yejuan nikpiya para notlakeualuan.
12 Kemaj itlakeualuan David onokuepkej, niman ijkuak oajsikej itech David, okijlijkej nochi tlen okinmijlij Nabal. 13 Kemaj David okinmijlij on tlakamej yejuan kinyekanaya:
—¡Nemochimej xkajsikan nemoespadas!
Kemaj on tlakamej okonkuikej iminespada niman David no okonkuik iespada. Kanaj 400 tlakamej oyajkej iuan David niman 200 okinkajkej para ma cuidarokan on tlajtlamach*. 14 Pero sen itlakeual Nabal oyaj okijlito Abigail, isiuau Nabal, niman ijkin okijlij:
—David okinuajtitlan itlajtojkauan desde ne xalpatlajkan para ma kitlajpalokij noteko Nabal, pero yejua yej okintlauelnankilij. 15 Pero on tlakamej yejuan kinyekanaya David sanoyej kuajli tlen okichijkej topampa ijkuak tinemiyaj imintech niman nochi on tonaltin ijkuak otikistinenkej iminuan neka ipan on campo, xkaman otechpajsolojkej nion xkaman itlaj otechichtekilijkej. 16 Yej techcuidarouayaj, tejuamej niman toborregos, ijkuak tlajokaj niman tlayoua. 17 Pampa moueuentsin sanoyej tetlaueltik, xueli itlaj kijliaj. Tejua xkita tlinon uelis tikchiuas, pampa ipan Nabal, niman ipan nochi ifamilia uelis uajlas itlaj tlen sanoyej xkuajli.
18 Kemaj Abigail amanaman opeu tlatlajtlalia. Okitlalij 200 panes, ome kuetlaxtekomatl yejuan tentikaj ikan vino, makuijli borrego yejuan tliuakej, 40 litros trigo yejuan tliuaki, niman 100 tematsitsimej de uvas yejuan tetsoltik, 200 memelatsitsimej de higos yejuan tetsoltik. Kemaj okintlamamaltijkej ipolokouan ika in tlajtlamach*. 19 Niman okinmijlij itlakeualuan:
—Nemejuamej xyakatstiakan niman nejua nias más sakin*.
Pero Abigail xitlaj* okijlij iueuentsin. 20 Kemaj Abigail otlejkok ipan ipoloko* para okinamikito David. Chika uatemotiayaj ilado on tepetl, okitak ika David niman on tlakamej yejuan kinyekanaya no ompaka ye uajlajtikatkaj. Kemaj yejua oyaj okinnamikito.
21 Niman David kuajnemilijtiaya ika sa nenkaj okimanauilij on tlen Nabal kipiyaya ipan on xalpatlajkan, niman xokitekauilij ma kuilikan itlaj. Aman xkuajli onechtlaxtlauilij on tlen kuajli onikchiu ipampa. 22 Yejua ika, ijkin onotlajtolmakak ika itokatsin Dios: "¡Dios ma nechmaka ueyi castigo tla aman niman mostla xtlami nikinmiktia nochimej on yejuan tlakamej ipan ifamilia".
23 Ijkuak Abigail okitak David, amanaman ouajtemok ipan ipoloko* niman onotlakuantelkets niman onopachoj hasta ipan tlajli. 24 Kemaj onotlajkal ikxitlan David niman okijlij:
—Noteko, on tlajtlakojli nopan ma uetsi. Nimitstlajtlanilia xkaki on tlen nimitsijlis. 25 Maka xchiuili cuenta Nabal, pampa yejua sen tlakatl xompayejyeua. Yejua hasta kinamiki ijkon ken itoka Nabal, pampa nabal kijtosneki “yoltechikauaka” niman yejua sanoyej yoltechikauak. Nejua nimotekitkau, xonikintak on motlajtojkauan yejuan otikintitlan. 26 ToTEKO xomitskauilij titetlakuepiltis niman tikinmiktis on yejuan xkuajli omitschiuilijkej. Melauak ken nemi toTEKO niman tejua tinemi, toTEKO ma kincastigaro nochimej motlauelikniuan, niman nochimej yejuan kinekij mitschiuiliskej tlen xkuajli ijkon ken castigaros Nabal. 27 Aman xseli nochi in tlajtlamach* yejuan onimitsajkuilij xkinxexelouili nochimej motlakeualuan yejuan nemij mouan. 28 Niman nimitstlajtlanilia xnechtlapojpolui nejua nimotekitkau. Melauak toTEKO kichiuas para tejua, mokoneuan niman mouejkakoneuan nochipa nentlamandaroskej, pampa tejua noteko, titlauijsoki ipampa toTEKO. Niman ipan nochi monemilis xitlaj* mopan nochiuas yejuan xkuajli. 29 Tla yakaj mitstotokatinemi pampa mitsmiktisneki, moTEKO Dios mitsmanauis. Niman toTEKO uejka kominxixinis motlauelikniuan amanaman ken ijkuak yakaj tlamotla ikan tematlatl. 30 Niman ijkuak toTEKO kichiuas nochi on tlen kuajli para tejua ijkon ken yomitsprometerouilij, niman ijkuak mitsteneuas titlayekanki intech on israelitas, 31 xtimoyolkokos nion timajmanas pampa tikinmiktia yejuan xkipiyaj tlajtlakojli. Niman no xtimoyolkokos tla titemiktia para titekuepiltis on tlen xkuajli omitschiuilijkej. Ijkuak toTEKO mitsmakas on ueyilistli, xnechelnamiki nejua nimotekitkau.
32 Kemaj David okinankilij Abigail:
—ToTEKO, iminDios on israelitas ma kiseli ueyilistli pampa yejua aman omitsajtitlan para xnechnamikiki. 33 ToTEKO ma mitstiochiua pampa sanoyej kuajli titlanemilia, pampa otinechteltij para xonitemiktij ijkuak nitekuepiltiskia on tlen xkuajli onechchiuilijkej. 34 Pero tla xnimantsin tinechajnamikiskia, niktestigojtlalia toTEKO iDios Israel yejuan xonechkauilij onenmechchiuilij tlen xkuajli, mostla maniskia nochimej nikinmiktiskia on tlakamej yejuan nemij ichan Nabal, nion se xnikauaskia yoltikaj.
35 Kemaj David okiselij nochi on tlajtlamach* yejuan Abigail okiktilij, niman kemaj okijlij:
—Uelis moyolika tias mochan. Tikita ika onimitskak, niman yonikchiu on tlen otinechtlajtlanilij.
36 Ijkuak Abigail onokuep kampa nemiya Nabal, okitak ika ichan tlaluichiuaya niman tlakuaya ken sen rey. Yejua sanoyej paktikatka niman sanoyej tlauanki katka. Yejua ika, Abigail xitlaj* okijli, yej okichix hasta uajmostla. 37 Uajmostla kualkan ijkuak Nabal xok tlauankikatka, Abigail okitlajtlajtouilij tlinon onochiu, niman Nabal okajsik sen kokolistli niman osepou. 38 Majtlaktli tonajli sakin*, toTEKO oksejpa okichiu para Nabal sejpa ma kajsi on kokolistli niman ika omik.
39 Ijkuak David okimat ika Nabal yomik, okijtoj:
—Ma kiueyilikan toTEKO pampa yejua okitlajtlakolmakak Nabal ipampa on tlen xkuajli onechchiuilij. ToTEKO onechmanauij para maka nikchiuas on tlen xkuajli niman toTEKO okichiu ma miki Nabal pampa xkuajli tlen okichiu.
Sakin David okintitlan itlakeualuan para okijlitoj Abigail tla kineki iuan nonamiktis David. 40 Ijkuak itlakeualuan David oajsikej ipan on ueyikalpan Carmel para iuan otlajtotoj Abigail, ijkin okijlijkej:
—David otechajtitlan para ma timitsijlikij tla tikneki iuan timonamiktis.
41 Niman Abigail onotlakuantelkets niman onopachoj hasta ipan tlajli para okiteititij tetlakaitalistli, niman ijkin otenankilij:
—Nejua niitekitkau David, niman hasta uelis nikinmikxipajpakas iesclavos tla yejua nechnauatia.
42 Kemaj ijkuak ijkin yotenankilij, amanaman onotlatlajtlalilij. Niman okuikak makuijli isiuatekitkauan, kemaj otlejkok ipan sen poloko* niman okinuikak on tlakamej yejuan okintitlan David. Kemaj iuan ononamiktij.