David xkineki kimiktis Saúl
24
Ijkuak Saúl otlan kinuijsoki on filisteos, okijlijkej ika David nemiya ipan on xalpatlajkan En-gadi. 2 Kemaj Saúl okintlapejpenij 3 mil tlakamej israelitas, niman oyajkej okitejtemotoj David iuan on tlakamej yejuan kinyekanaya ipan nochi on teostokalmej yejuan intoka teostokalmej de on tepechivos. 3 Ipan iminojui oajsikej kampa kintsakuayaj borregos, niman ompa nisiu onkatka sen tekajli kampa niyantikatka David iuan on tlakamej yejuan kinyekanaya. Kemaj Saúl ompa okalak para onoseseuitoa. 4 Kemaj David okichtakaijlijkej on tlakamej yejuan kinyekanaya:—Yoyejkok in tonajli yejuan omitsijlij toTEKO, ijkuak omitsprometerouilij ika mitsmaktilis motlauelikniu. Aman xchiuilij tlinon tejua tiknekis.
Kemaj David yoliktsin okinisiuijtiaj Saúl niman okitekilij pitentsin icapa. 5 Pero sakin* David onoyolkokoj ika okitekilij icapa Saúl. 6 Niman okinmijlij on tlakamej yejuan kinyekanaya:
—¡ToTEKO ma nechtlapojpolui pampa noteko on rey, onikchiuilij tlen xkuajli! ¡Yejua rey, pampa toTEKO yejua okitlapejpenij! Yejua ika xnikchiuilis tlen xkuajli.
7 Ijki David okinteltij on tlakamej yejuan kinyekanaya, niman xokinkauilij ma kimiktikan Saúl. Saúl okis ipan on tekajli niman oyaj. 8 Pero David okuitlapanuij Saúl niman okitsajtsilij:
—¡Norey, norey!
Kemaj Saúl oontlachix ikuitlapan, niman David onotlankuatelkets niman onopachoj hasta ipan tlajli ikan ueyi tetlakaitalistli. 9 Niman okijlij:
—¿Tline tikinkaki on yejuan mitsijliaj kitl nikneki nimitsmiktis? 10 Norey, tejua yotikitak ika maski toTEKO yomitstemakaka notech ne ijtik on tekajli, nejua xoniknek onimitsmiktij. Sekimej onechijlijkej para ma nimitsmikti, pero xonikchiu pampa onikijtoj: “Tejua tirey, pampa toTEKO omitstlapejpenij”. Yejua ika xonimitschiuilij tlen xkuajli.
11 Xkita noteko, nikan nikpiya in itentlajkotsin mocapa yejuan oniktek. Nejua ueliskia nimitsmiktiskia. Yejua ika in, tikita ika xniknenimilia nimitschiuilis tlen xkuajli, nion xipan nimitsitas. Niman tejua uej kemaj, tinechtokatinemi para tinechmiktis. 12 ToTEKO ma kita akinon kipiya tlajtlakojli, tla tejua noso nejua. ToTEKO ma mitscastigaro ipampa on tlen otinechchiuilij, pero tlami xmati ika nejua xitlaj* nimitschiuilis tlen xkuajli. 13 Ijki kijtoua sen tlajtojli: “On tlen xkuajli, ualeua intech on tlakamej xkuajkualtin". Yejua ika, xkaman itlaj nikchiuas para nimitschiuilis tlen xkuajli. 14 Niman no, ¿Akinon kitotokatinemi iminrey on israelitas, nejua, yejuan ken sen nichichimiki, noso ken sen tekpin? 15 Yejua ika, toTEKO ma kita akinon kipiya tlajtlakojli, tla tejua noso nejua. Tla xnikpiya tlajtlakojli, ma nechmanaui motech.
16 Ijkuak David otlan tlajtoua, Saúl okijtoj:
—¡Pero tlakaj yej tejua, nokoneu David, akin tinechnotsa!
—Melauak tlen tikijtoua, pampa otinechtlaxtlauilij ika tlen kuajli, maski onimitschiuilij tlen xkuajli. 18 Aman yotinechititij ika tejua sanoyej tinechtlajsojtla, pampa maski toTEKO onechtemakak motech, tejua xotinechmiktij. 19 Xnemi yakaj, yejuan ijkuak yokinextij itlauelikniu, kauilia ma uiya. ToTEKO ma mitstlaxtlauili ipampa on tlen aman kuajli otikchiu nopampa. 20 Aman nikmati ika tejua yes tirey, niman nochi in tlajli Israel kuajli tikyekanas. 21 Xnechtlajtolmaka ixpan toTEKO, ika xtikinmiktis nouejkakoneuan nion xtikpopolos notoka itech nofamilia.
22 Niman David ijkon okitlajtolmakak Saúl ika itokatsin Dios. Kemaj Saúl onokuep ipan ipalacio, niman David iuan on tlakamej yejuan kinyekanaya oksejpa onokuepkej kampa nemiyaj ipan on tekajli.