David kimanauiya on ueyikalpan Keila
23
Se tonajli on filisteos okuijsokitoj on ueyikalpan itoka Keila, niman okichtekej trigo yejuan kemach okiteinijkaj. Niman ijkuak okitlajtlajtouilijkej David on tlen onochiu, 2 yejua okitlajtoltij toTEKO, niman ijkin okijlij:—¿Tinechkauilia ma niuiya ma nikinuijsokiti on filisteos?
Niman toTEKO okinankilij:
—Kemaj, xkinuijsokiti niman xmanaui on ueyikalpan Keila.
3 Pero on tlakamej yejuan David kinyekanaya okijlijkej:
—Tla nikan Judá tinemij ikan nemojtijli, más titomojtiskej tla tiaskej ipan on ueyikalpan Keila para tikominuijsokiskej on soldados filisteos.
4 Kemaj David oksejpa okitlajtoltij toTEKO, niman toTEKO okijlij:
—Xuiya ipan on ueyikalpan Keila, pampa nejua nemechinmaktilis on filisteos.
5 Yejua ika, David oyaj ipan on ueyi kalpan Keila inuan on tlakamej yejuan kinyekanaya. Okinuijsokej on filisteos, nochimej okintlankej niman okinkuilijkej nochi inminyolkauan. Ijkon David okinmanauij on chanejkej ipan on ueyikalpan Keila.
6 Chika ijkuakon, on tiopixki Abiatar ikoneu Ahimelec ocholojteu. Yejua ika, oyaj ipan on ueyikalpan Keila kampa nemiya David, niman okuiteu on efod yejuan itiopixkatleken. 7 Ijkuak okitlajtlajtouilijkej Saúl ika David nemiya ipan on ueyikalpan Keila, yejua hasta okuelitak niman okijtoj: "Dios yonechmaktilij pampa okalak ipan on ueyikalpan yejuan yeualtsakutikaj ikan tepantli niman tsakuijlomej de tepostli."
8 Niman Saúl amanaman okintekuitlan nochimej isoldados para yaskej ipan on ueyikalpan Keila niman kiyejyeualoskej David iuan on tlakamej yejuan kinyekanaya. 9 Pero ijkuak David okimat ika Saúl kinekiya konuijsokis, okijlij on tiopixki Abiatar para ma kuajkuili on efod tiopixkatlakentli* para kimatis tlinon kijlis toTEKO. 10 Niman David okijtoj:
—ToTEKO, iDios Israel, nejua yonikak ika Saúl kineki uajlas nikan Keila niman kineki kixoxotonis in ueyikalpan san nopampa. 11 ¿Uajlas Saúl nechajtejtemos ken yonikak? ¿Nechtemakaskej itech Saúl in chanajkej ipan in ueyikalpan Keila? ¡ToTEKO, iDios Israel nimitstlajtlanilia xnechijli!
Niman toTEKO okinankilij:
—Kemaj, uajlas.
12 Niman David oksejpa okitlajtoltij toTEKO:
—¿Techtemakaskej in chanajkej ipan in ueyikalpan Keila, itech Saúl nejua niman on tlakamej yejuan nikinyekana?
Niman toTEKO okinankilij:
—Kemaj, mechtemakaskej.
13 Kemaj David niman on tlakamej yejuan kinyekanaya okiskej ipan on ueyikalpan, niman sa kanika oyajkej. Katkaj kanaj 600 tlakamej. Niman ijkuak Saúl okimat ika David yocholojteu ipan on ueyikalpan Keila, xok itlaj okichiu para kontas.
David ipan on xalpatlajkan
14 David onochantij ipan sekimej tekaltin yejuan onkatkaj ipan on tepemej ipan on xalpatlajkan Zif. Niman maski Saúl mojmostla kitejtemouaya David, Dios xokimaktilij. 15 David nomojtiaya, pampa Saúl kitejtemojtinemiya para kimiktis. Yejua ika, onokau ne kampa itoka Hores ipan on xalpatlajkan Zif.
16 Se tonajli Jonatán, ikoneu Saúl, oyaj ne Hores. Okitato David para okiyoleuato ma kitlali iyojlo itech Dios. 17 Niman okijlij:
—Maka xmomojti, pampa Saúl notataj xuelis mitsnextis. Tejua tirey yes ipan in tlajli Israel, niman nejua no niueyixtias motech. Saúl notataj, ye kimatstikaj nochi in.
18 Kemaj on omemej okichijkej sen pacto* niman toTEKO okitlalijkej ken testigo. Kemaj Jonatán onokuep ichan niman David onokau ne Hores. 19 Pero on chanejkej ipan on ueyikalpan Zif oyajkej ne Gabaa okitatoj Saúl niman okijlijkej:
—David niyantikaj nikan toueyitlalpan ipan semej on tekaltin yejuan onkaj Hores ipan on tepetl Haquila yejuan nokaua kampaka sur ipan on xalpatlajkan. 20 Yejua ika, ijkuak tiknekis tiuajlas, xuajla, niman tejuamej timitsmaktiliskej.
21 Saúl okinnakilij:
—¡ToTEKO ma mechtiochiua pampa onennechiknelijkej! 22 Aman, xuiyan niman xtlajtlanikan tla melauak nemi kampaka okitakej niman xtlajtlanikan akinon okitak, pampa nechijliaj ika yejua sanoyej kimati kenijki tlakajkayaua. 23 Kuajli xkitakan kampa nijiyana, niman xuajlakan xnechijlikij. Niman kemaj nejua nias nemouan. Tla melauak nemi ipan on región, nejua kuajli niktejtemos intsajlan nochimej iueyifamilias Judá.
24 On chanejkej ipan on ueyikalpan Zif ononauatijkej iuan Saúl niman onokuepkej ipan iminueyikalpan. Chika ijkuakon David niman on tlakamej yejuan kinyekanaya ye nemiyaj ipan on xalpatlajkan Maón, ipan on ixtlauatl yejuan onkaj kampaka sur ipan on xalpatlajkan. 25 Saúl iuan isoldados oyajkej okitejtemotoj. Ijkuak David okilijkej ika Saúl yoyaj okitejtemoto, otemok itech on teostotl yejuan onkaj ipan on xalpatlajkan Maón. Niman ijkuak Saúl okimat kanika oyaj David, no oyaj ipan on xalpatlajkan Maón para okitejtemoto. 26 Saúl iuan isoldados yayaj inakastlan on tepetl, niman David iuan on tlakamej yejuan kinyekanaya yayaj okse inakastlan on tepetl. Yejuamej isiutiayaj para kitlalkauiskiaj Saúl. Niman ijkuak Saúl niman isoldados yokiyejyeualojkaj David iuan on tlakamej yejuan kinyekanaya niman ye kinmajsiskiaj, 27 oajsitets sen tlakatl, niman okijli Saúl:
—¡Xmokuepa amanaman pampa on filisteos yokalakkej ipan totlalpan!