On yejuan ken kitaj David iuan onosentlalitoj
22
David ocholoj ipan on ueyikalpan Gat niman oniyanato ipan on tekajli yejuan onkaj ne Adulam. Ijkuak okimatkej, ikniuan niman nochimej ifamilia oyajkej para iuan onosentlalitoj. 2 No iuan onosentlalijkej nochimej on yejuan tlajyouiyayaj, nochimej on yejuan teuikiliayaj, niman nochimej on yejuan ximinyolika nemiyaj. Niman David onochiu imintlayekankau. On yejuan iuan kistinemiyaj katkaj kanaj 400 tlakamej.3 David okis ompa niman oyaj Mizpa ne Moab, niman okijlij on rey de Moab:
—Nimitstlajtlanilia nemouan ma nokauakan notataj niman nonanaj hasta ma nikmati tlinon kichiuas Dios nouan.
4 Niman ijki David okinuikak itajuan itech on rey de Moab, niman yejuamej ochantikej iuan on rey nochi on tonaltin ijkuak David nemiya ipan on ueyi tekajli. 5 Kemaj Gad on tiotlajtojketl okijlij David:
—Maka xmokaua nikan ipan in tekajli. Nimantsin xkisa, niman xuiya ipan iueyitlalpan Judá.
Ijki tej, David oyaj niman oajsik ipan on kojyo yejuan onkaj ne Haret.
Saúl okinmiktij on tiopixkej chanejkej ipan on ueyikalpan Nob
6 Kemaj, ijkuak Saúl yeuatikatka itsintlan sen auakojtli ne Gabaa, okijlijkej ika David iuan on tlakamej yejuan kinyekana yokinminnextijkej. Ompa kimapixtikatka ilanza niman on itlapaleuijkauan ompa kiyeualojtikatkaj. 7 Kemaj okinmijlij on tlapaleuijkej:
—Xnechkakikan Benjaminitas. ¿Nenkinemiliaj ika David, ikoneu Isaí, mechmakas tlaltin niman uvasyoj? ¿Niman nenkinemiliaj ika nemochimej* mechtlalis uejueyitlayekankej intech isoldados? 8 Nochimej nemejuamej nenkinekij makasa nejua ma nirey, pampa xakaj onechijlij ika nokoneu Jonatán okichiu sen pacto* iuan ikoneu Isaí. Niman xakaj notenmati nopampa, pampa xakaj onechijlij ika nokoneu yokiyolchikau notlakeual David ma nechpijpixtinemi para nechmiktis.
9 Kemaj Doeg on edomita, yejuan nemiya iminuan on itlapaleuijkauan Saúl, ijkin otenankilij:
—Nejua onikitak David ijkuak oyaj Nob okitato Ahimelec, ikoneu Ahitob. 10 Niman on tiopixki Ahimelec okichiu oración ipampa David niman okimakak tlakuajli, niman no okimakak iespada Goliat, on filisteo.
11 Kemaj on rey okitekuitlan on tiopixki Ahimelec, niman nochimej on tiopixkej yejuan nemiyaj Nob yejuan ifamilia katkaj. Ijkuak nochimej oajsikej ixpan on rey, 12 Saúl okijlij Ahimelec:
—Xnechkaki kuajli, Ahimelec, ikoneu Ahitob.
Ahimelic okijtoj:
—Kemaj, nimitskaki noteko.
13 Kemaj Saúl okitlajtoltij:
—¿Tline iuan tiksepanmati ikoneu Isaí para makasa nejua ma nirey? Tejua otikmakak David pan niman espada, niman otikchiu oración ipampa para makasa ipan ma nechita niman nechpijpixtinemi ken aman kichiua para nechmiktis.
14 Kemaj Ahimelec okinankilij on rey:
—Xakaj nion se on uejueyixtokej tlayekankej sanoyej yotekit kuajli ken momon David. Yejua no ueyi tlayekanketl itech mosoldados ikatlakajtli yejuan mitsmanauiyaj, niman nochimej ipan mopalacio sanoyej kitlakaitaj. 15 ¿Tlen kanaj kemach ye ika nikchiua oración ipampa?!Ka! Yejua ika tej, maka xnechtlajtlakolti nejua nimotekitkau. Nion maka xkintlajtlakolti ifamilia notataj, pampa xnikmati nion achijtsin tlinon tinechijlijtikaj.
16 Pero on rey okijlij:
—¡Ahimelec, tejua niman nochimej ifamilia motataj nenmikiskej!
17 Kemaj on rey okinnauatij isoldados yejuan ikatlakajtin kimanauiyaj:
—Xkinmiktikan in itiopixkauan toTEKO pampa yejuamej no nemij iuan David. Maski yejuamej kimatstikatkaj ika nijiyantinemi, xonechmachistijkej.
Pero on soldados xokinekej itlaj okinchiuilijkej itiopixkauan toTEKO. 18 Kemaj kej, okinauatij Doeg on edomita:
—¡Tejua xkinmikti!
Niman Doeg okinmiktij. Ipan on tonajli okinmiktij 85 tiopixkej, nochimej kitlalijtikatkaj on efod* yejuan imintiopixkatlaken. 19 Kemaj oyaj Nob, yejuan inminueyikalpan on tiopixkej. Niman ika iespada ompa okinmimiktij tlakamej, siuamej, kokonej maski yejuan kemach otlakatkaj. No okinmiktij uakaxtin, polokomej* niman borregos. 20 Pero se ikoneu Ahimelec, yejuan itoka Abiatar, ouel ocholojteu, niman oyaj kampa nemiya David. 21 Abiatar ompa okijlij David ika Saúl okimiktij nochimej itiopixkauan toTEKO. 22 Niman David okinankilij: