David cholojteua itech Saúl
21
David oyaj ipan on ueyikalpan Nob para okitato on tiopixki Ahimelec, ijkuak Ahimelec okinamikito okimojkaitak niman okijlij:—¿Tline tiuajlau moselti niman xakaj uajlau mouan?
2 David okinankilij:
—On rey onechajtitlan pero onechijlij maka yakaj ma nikijli tline oniuajlaj. Niman on tlakamej yejuan nikinyekana, ye kimatstokej kanon titosentlaliskej. 3 Aman tej, nikneki tlakuajli, xnechmaka makuijli pan noso tlen uelis tikpiyas.
4 Pero on tiopixki okijlij:
—On pan yejuan nikpiya xsan katlejua pan. Yej san nikpiya on pan yejuan tlatiochijtli. Pero nimitsmakas tla mosoldados xonotekakej kemach iminuan siuamej.
5 Niman David okinankilij:
—Tejuamej xkaman titotekaj iminuan siuamej ijkuak ye tiaskej ipan nouijsokilistli. Niman maski aman san otechajtitlankej ipan sen tekitl ikatlakajtli, nosoldados ye chipajkej nemiyaj ixpan Dios. Yejua ika tej, amantsin chipauak nemij.
6 Kemaj on tiopixki okimakak on pan tlatiochijtli yejuan kiteititia ika toTEKO touan nemi, pampa xkipiyaya okse, yej san kipiyaya on yejuan kitlaliaj ixpan toTEKO, on yejuan sano ipan on tonajli, okipatlakej para kitlaliskej okseki yejuan yenkuik. 7 Ipan on tonajli ompa nemiya sen itekitkau Saúl pampa nonekiya nokauas ipan on tabernáculo para kichiuas on tlen okiprometerouilij toTEKO. On tlakatl sen edomita katka, niman itoka katka Doeg. Yejua tlayekanki katka itech itlajpixkauan Saúl.
8 David okitlajtoltij Ahimelec:
—¿Xtikpiya sen lanza noso sen espada nikan? Xitlaj onikuajkiteu, nion sen espada, nion on oksekimej noteposuan, pampa nonekiya nikisas amanaman ipan itekiu on rey.
9 On tiopixki okinankilij:
—Kemaj, nikpiya nikan iespada Goliat, on filisteo yejuan otikmiktij ipan on ixtlauatl Ela. Onkaj ikuitlapan on efod* tejkuixtikaj ika sen capa. Uelis tikiktis tla tikneki. Okseki tepostin xnikpiya.
David okinankilij:
—Tla iespada Goliat, sanoyej kuajli. Xnechmaka.
David oyaj ueyikalpan Gat
10 Ipan on tonajli David sanken* nijiyantinemiya de Saúl, niman oyaj itech Aquís, rey de on ueyikalpan Gat. 11 Niman itlapaleuijkauan Aquís okilijkej:
—¡Ah, tlakaj in yej David yejuan rey ipan ipaís! ¡In yejua on kiteneuayaj on siuamej ijkuak nokuikatiayaj niman nijtotijtiayaj.
Mil tlakamej okinmiktij Saúl, niman majtlaktli mil okinmiktij David!