Jonatán kipaleuiya David
20
David ocholojteu ne Naiot de Ramá, niman oyaj kampa nemiya Jonatán, niman ijkin okijlij:—¿Tlinon onikchiu? ¿Tlen tlajtlakojli nikpiya? ¿Tlinon xkuajli onikchiuilij motataj ika kineki nechmiktis?
2 Niman Jonatán okinankilij:
—¡Maka Dios kineki mitsmiktis! Tejua tikmatstikaj ika ijkuak notataj kineki itlaj kichiuas, tla ueyi kijtosneki, noso xueyi kijtosneki achtoj nechijlia. ¿Tline nechiyanilis on tlen kineki kichiuas? ¡Xuelis ijkon kichiuas!
3 Pero David oksejpa okijlij Jonatán:
—Motataj kimatstikaj ika tejua kuajli timouika nouan. Yejua ika, xkineki mitsijlis para maka timajmanas. Pero nimitstlajtolmaka ixpan Dios ika xuejkajtika nimikis.
4 Niman Jonatán okitlajtoltij David:
—¿Kenijki uelis nimitspaleuis?
5 David okinankilij Jonatán:
—Xkita, mostla peuas on iluitl de on yenkuik metstli. Niman ika onkaj ninotlalis nitlakuas iuan on rey. Pero xnechkauili mostla ma niniyanati ipan neka ipan campo niman ompa ninokauas hasta uiptla tiotlak. 6 Niman tla motataj noka tlajtlani, xkijli: “Onechtlajtlanilij ma nikauili ma uiya ipan iueyikalpan ne Belén pampa nochimej ifamilia nosentlaliaj ompa para iluichiuaskej ika on uentli yejuan notemaka cada xipan." 7 Tla motataj kijtos: “kuajli”, kijtosneki ika xitlaj* nechchiuilis, pero tla kualani, tikmatis ika kineki nechmiktis. 8 Aman tej, nimitstlajtlanilia xnechikneli* pampa nejua nimotekitkau niman yotitotlajtolmakakej ixpan toTEKO ika titotlajsojtlaskej*. Aman tej, tla nejua nikpiya tlajtlakojli, sano tejua xnechmikti pampa xnoneki tinechuikas ixpan motataj.
9 Pero Jonatán okinankilij:
—¡Maka ijkon xnemili! Tla nejua nikmati ika notataj kineki itlaj mitschiuilis, nejua nimitsijlis.
10 Kemaj David okitlajtoltij Jonatán:
—¿Akinon nechmachistis tla motataj mitsnankilia ikan tlauejli?
11 Niman Jonatán okinankilij:
—Xuajla nouan, tiauij neka mijlaj.
—Nimitstlajtolmaka ixpan toTEKO, on iminDios israelitas ika mostla noso uiptla kanaj mayanin niknotsas notataj para nikmatis tlinon kinemilia kichiuas. Tla kuajli kinemilia de tejua, nimitsmachistis. 13 Pero tla notataj kineki mitschiuilis itlaj xkuajli, toTEKO ma nechmaka ueyi castigo tla xnimitsmachistia niman xnimitspaleuiya para uelis ticholos. ¡Niman toTEKO ma mitspaleui ken okipaleuij notataj! 14 Tla ijkuakon sanken* ninemi, nimitstlajtlanilia xnechikneli* ijkon ken toTEKO omitsiknelij*. 15 Niman tla onimik, nimitstlajtlanilia xkikneli nofamilia. ToTEKO ma kintlajtlakolmaka motlauelikniuan niman ma tlami kimpopolo nochimej.
16 Ijkon tej, Jonatán okichiu sen pacto* iuan David, niman okijlij:
—Ma Dios kincastigaro on yejuan mitstlauelitaj.
17 Niman ika on tetlajsojtlalistli* yejuan Jonatán kipiyaliaya David, Jonatán oksejpa okichiualtij David ma kitlatolmaka ika itokatsin Dios, pampa sanoyej kitlajsojtlaya* ken yejua notlajsojtla.
18 Kemaj Jonatán okijlij David:
—Mostla onyas iluitl de on yenkuik metstli, niman pampa xakaj yeuatias kampa tejua timotlalia, notataj kitas ika xtak. 19 Niman uajuiptla más nesis ika xnikan tinemi. Yejua ika, xuiya kampa otimiyanka on okse tonajli, niman xmokaua ne kampa tepayolijtikaj miyek tetl itoka Ezel. 20 Nejua xnitlamotlas mejlaki, yej okse lado ikan yeyi tlaminaltin ken itlaj nikonmotlaskia. 21 Kemaj nikijlis notlakeual: "Xuiya xkintejtemoti on tlaminaltin." Tla nikijlia: "On tlaminaltin achi más nanika oxinkej. Xkintejtemoki niman xkinkui", uelis tiuajkisas moyolika pampa tikmatis ika xitlaj* mopan nochiuas. Nimitsmaka notlajtol ixpan toTEKO. 22 Pero tla nikijlia notlakeual: “On tlaminaltin achi más neka oxinitoj”, noneki ticholoteuas amanaman pampa toTEKO kineki xuiya. 23 Niman xkelnamiki, toTEKO yejua nokaua testigo para nochipa ipan in promesa yejuan yotikchijkej.
24 Ijkon tej, David oyaj oniyanato ipan mijlaj. Ijkuak oajsik on iluitl de on yenkuik metstli, on rey onotlalij para tlakuas. 25 Onotlalij itechika tepantli kampa nochipa notlalia, niman kampa Jonatán nochipa onotlalij ixpan, niman Abner onotlalij inakastlan Saúl, pero kampa notlaliaya David, xakaj onotlalij. 26 Ipan on tonajli Saúl xitlaj* okijtoj pampa okinemilij David okichiu itlaj xchipauak niman nemiya xchipauak ixpan Dios. 27 Pero uajmostla, ijkuak ika ome tonajli yaya on iluitl, oksejpa xakaj onoltlalij kampa notlaliaya David. Kemaj Saúl okitlajtoltij Jonatán, ikoneu:
—¿Tline xouajlaj ikoneu Isaí ipan in tlakuajli yaloua nion aman?
28 Niman Jonatán okinankilij:
—David oisijkayasnek Belén, niman onechtlajtlanilij ma nikauili ma uiya. 29 Onechtlajtlanilij ma nikauili ma uiya pampa ifamilia kitemakaskej sen uentli ipan iueyikalpan, niman ikniu okuajtekuitlan para ma uiya. No onechijlij ika komintlajpalos ifamilia. Yejua ika tej, xonotlalij tlakuas mouan tejua rey.
30 Kemaj Saúl sanoyej okualan iuan Jonatán niman okijlij:
—¡Tekoneu itech xkuajli nantli! ¿Tlen tikuitia xnikmati ika on ikoneu Isaí sanoyej kuajli iuan timouika para mopinauis niman ipinauis monanaj? 31 Chika yejua nemi ipan in tlajli, xkaman tirey yes ipan in país. Aman tej, xtlanauati ma kitejtemotij, niman xnechajuikili pampa ika onkaj mikis.
32 Pero Jonatán okinankilij:
—¿Tline ika onkaj mikis? ¿Tlen tlinon xkuajli okichiu?
33 Kemaj Saúl okontilan ilanza para ika kitsopiniskia Jonatán. Yejua ijkon okajsikamat ika itataj melauak kinekiya kimiktis David. 34 Kemaj Jonatán ikan itlauel xok otlakuaj ipan on ika ome tonajli de on iluitl, pampa sanoyej najmanaya ipampa David niman ika itataj teixpan okuijuikaltij. 35 Uajmostla Jonatán oyaj ipan mijlaj ijkon ken yonokajka iuan David para notaskej. Okuikak sen itlakeual yejuan konetl, 36 niman ijkin okinauatij:
—Xmotlalo xkintejtemoti on tlaminaltin yejuan ika nitlamotlas.
On tlakeualkonetl onotlaloj, chika Jonatán tlamotlaya ika on tlaminajli para uejka ma uetsiti de itech on konetl. 37 Niman ijkuak itlakeual oajsik kampa ouetsito on tlaminajli, Jonatán sanoyej chikauak okitsajtsilij itlakeual:
—¡On tlaminajli onkaj más neka!
38 Niman Jonatán oksejpa más okitsajtsilij itlakeual:
—Xisiui, xmotlalo, maka xomotelti.
Itlakeual Jonatán okinsentlalij on tlaminaltin, niman okiktilij Jonatán. 39 Pero xitlaj* okajsikamat, pampa Jonatán niman David san yejuamej kimatiyaj tlinon kijtosneki on tlen kichiuayaj. 40 Kemaj Jonatán okimakak itlakeual on iarco niman on tlaminaltin, niman okinauatij ma kinmikti ipan on ueyikalpan.
41 Ijkuak itlakeual oyaj, David ouajkis ikuitlapan on teolochojlia. Niman ijkuak oajsik ixpan Jonatán, onotlakuantelkets niman onopachoj yexpa hasta ipan tlajli. Kemaj onotenkuajkejb ipan iminxayak niman ochokakej san sekan, pero David más ouejkau choka. 42 Kemaj Jonatán okijlij David:
—Xuiya moyolika, pampa on tlajtolmakalistli yejuan yotikchijkej san sekan, otikchijkej ika itokatsin toTEKO. Yejua testigo yes para nochipa ika tikchiuaskej on tlen otitotlajtolmakakej ika itokatsin Dios, tejua niman nejua, niman mouejkakoneuan niman nouejkakoneuan.
Kemaj David opeu nejnemi, niman Jonatán onokuep ipan on ueyikalpan.