Saúl kineki kimiktis David
19
Saúl okinauatij Jonatán, ikoneu, niman nochimej on tlayekankej para ma kimiktikan David. Pero Jonatán ika sanoyej kitlasojtlaya David, 2 okimachistito, niman ijkin okijlij:—Notataj Saúl mitsmiktisneki. Yejua ika mostla kualkan, xmiyana kampa xakaj mitsitas. 3 Nejua nias iuan notataj ne ipan campo kampa tejua tinemis, niman niknojnotsas de tejua. Ijkuak nikakis ken kijtos, nejua nimitsonijlis.
4 Jonatán okinots Saúl, itataj, para ipan otlajtoj David, niman ijkin okijlij:
—Tejua ueyixtikaj rey, Xkuajli tikneki tikchiuilis motekitkau David pampa yejua xitlaj* kichiua tlen xkuajli motechika tejua, yej sanoyej yomitspaleuij. 5 David xonomojtij maski ueliskia kimiktiskiaj, ijkuak yejua okixnamik niman okimiktij Goliat, niman toTEKO ijki okinmanauij on israelitas. Tejua otikitak niman otipak. ¿Man aman tline tikneki tikmiktis David, maski xitlaj* mitschiuilia?
6 Ijkuak Saúl okak on tlen okijlij Jonatán ikoneu, ijkin onotlajtolmakak ika itokatsin Dios:
—Ninotlajtolmaka ixpan toTEKO ika David xmikis.
7 Kemaj Jonatán okonots David niman okijlij nochi tlen okijtojkej. Sakin okuikak itech Saúl niman David okitekipanoj Saúl ken achtoj ye tekitiya.
8 Sakin oksejpa oonyak on nouijsokilistli niman David okis okinuijsokito on filisteos, niman sanoyej temojtij ken okinuijsok. Yejua ika yejuamej ontlatlaksakej. 9 Pero ipan okse tonajli, sen xkuajli espíritu yejuan toTEKO okuajtitlanilij Saúl oksejpa ipan ouajla, ijkuak yeuatikatka ipan ipalacio. Yejua kipixtikatka ilanza ipan ima chika David tlatsotsonaya. 10 Kemaj Saúl okinek kitlalaktis David ikan ilanza ipan tepantli. Pero David okinokixtilij niman ilanza Saúl otlalak ipan on tepantli. Niman sano ipan on tlayoua David ocholojteu. 11 Kemaj Saúl amanaman okinnauatij isoldados ma uiyan ichan David para ma kipijpiyatij niman uajmostla, ma kimiktikan. Pero Mical, isiuau David, okimat niman okijlij:
—Tla tejua xticholoua in yeuajli, mostla mitsmiktiskej.
12 Amanamantsin Mical okitemoltij David ipan sen ventana, niman ijki ouel ocholojteu. 13 Kemaj Mical okonisijkatilan sen ídolo niman okitekak ipan on tlapechtli. Ikuatsontlan okitlalilij sen xinepajli tlachijchijtli ikan itsojmiyo chivo. Kemaj okitlapachoj ika sen sábana. 14 Ijkuak Saúl okinnauatij isoldados para ma kajsikan David, Mical okinmijlij kitl David kualo niman xuelis nokuiteuas. 15 Pero Saúl oksejpa okintitlan isoldados para ma kitejtemotij David, niman okinmijlij:
—¡Maski ikan itlapech xnechajuikilikan para nikmiktis!
16 On isoldados Saúl okalakej ichan David, pero ipan itlapech san okinextijkej on ídolo ikan ixinepal de itsojmiyo chivo. 17 Kemaj Saúl okijlij Mical:
—¿Tline otinechkajkayau niman otikauilij ma cholojteua notlauelikniu?
Mical okinankilij:
—Pampa yejua onechijlij nechmiktis tla xnikauilis ma cholo.
18 Ijkon tej, David ouel ocholojteu. Kemaj oyaj okitato Samuel ipan on ueyikalpan Ramá, niman okitlajtlajtouilij nochi on tlen Saúl okichiuilij. Kemaj David niman Samuel oyajkej ochantitoj Naiot. 19 Niman ijkuak Saúl okimat ika David nemiya Naiot de Ramá, 20 okintitlan isoldados para ma kajsikan. Ijkuak isoldados Saúl oajsikej, okintakej miyekej tiotlajtojkej yejuan tiotlajtojtikatkaj, niman Samuel yejua kinyekanaya. Niman amanaman iEspíritu Dios ouajlaj impan on soldados yejuan Saúl okintitlan, niman yejuamej no opeu tiotlajtouaj.
21 Ijkuak Saúl okimat, okintitlan oksekimej soldados, pero yejuamej no opejkej tiotlajtouaj. Kemaj Saúl okintitlan ika yexpa oksekimej soldados, niman yejuamej no ijki iminpan onochiu. 22 Kemaj Saúl no oyaj ipan on ojtli para yejkos ne ipan on ueyikalpan Ramá. Niman ijkuak oajsik itech sen amejli yejuan onkaj ne Secú, otetlajtoltij kanon nemi Samuel niman David. Niman okijlijkej ika nemij Naiot de Ramá. 23 Niman Saúl oyaj ompa, pero iEspíritu Dios no ipan ouajlaj niman yejua no opeu tiotlajtoua niman ijki otiotlajtojtiaj hasta oajsik Naiot de Ramá. 24 Kemaj Saúl onotlakenkixtij niman tsotsolijtikatka nochi tonajli niman nochi yeuajli, niman ijki tiotlajtojtikatka ixpan Samuel. Yejua ika ompa opeu on tlajtojli: "¿Tla ijkon, Saúl no teuan tiotlajtojketl?"