Samuel okikuaasaitijuij Saúl para yes rey intech on israelitas
10
Kemaj Samuel okontilan on kampa keuaj aceite, niman okitekak achijtsin ipan itsontekon Saúl, okitenkuaj ipan ixayak, niman okijlij:—ToTEKO mitstiochiua aman para tirey yes de Israel. Tejua tikyekanas niman tikmanauis itech itlauelikniuan. Niman in yejua señal para tikmatis ika toTEKO yomitskalaktij ken rey ipan ikoneuan. 2 Aman ijkuak tias, tikintas omemej tlakamej nisiu itech itlalkon Raquel ne Selsa, ipan on iueyitlalpan Benjamín. Yejuamej mitsijliskej ika yoneskej on siuapolokomej* yejuan tikintejtemouaya. Niman mechijliskej ika motataj xok konmimatstikaj on siuapolokomej*. Aman yej mitsonmatstikaj niman notlajtoltia kenijki kichiuas para mitsnextis. 3 Más sakin* ijkuak tajsis itech on auakojtli yejuan onkaj ne Tabor, mitsajnamikiskej yeyimej tlakamej yejuan yauij Betel para konmauistiliskej Dios. Se kuika yeyi chivo, okse kikti yeyi pan niman on okse kikti sen kuetlaxtekomatl ikan vino. 4 Yejuamej mitstlajpaloskej niman kinekiskej mitsmakaskej ome pan. Tejua xkinselili. 5 Kemaj tajsis ne Gabaa de Dios kampa nemij soldados filisteos. Ijkuak tikalakis ipan on ueyikalpan, tikinnamikis sekimej tiotlajtojkej yejuan uajtiotlajtojtiuij. Yejuamej ualeuaskej ne kampa tlauenchiualo. Inyakapan uajlaskej on tlakamej yejuan uajtlatsotsontiuij ikan salterios, panderos, flautas niman arpas. 6 Kemaj ikan ueyi poder, iespíritu toTEKO uajlas niman kalakis mopan niman titiotlajtos, ken yejuamej, niman timochiuas ken tíokse tlakatl yeskia. 7 Ijkuak mopan nochiuas yejua in, xchiua tlinon tikita kuajli yes, pampa Dios mitspaleuis. 8 Niman kemaj tejua xuiya tlayakapan hasta Gilgal. Más sakin* ompa mouan ninosentlalis para tiktemakaskej uentli yejuan nochi tlatlas niman uentli yejuan de yoltlalilistli. Ompa xnechcha chikome tonajli hasta ijkuak najsis, niman nimitsijlis tlinon noneki tikchiuas.
9 Nimantsin ijkuak Saúl okinauatij Samuel ika yeyau, Dios okipatilij iyojlo. Niman sano ipan on tonajli, onochiu nochi on señales ken okijlijkej nochiuas. 10 Ijkuak Saúl niman itlakeual oajsikej ne Gabaa, on tiotlajtojkej yejuan tiotlajtouayaj okinamikitoj. Kemaj iespíritu Dios ouajlaj ipan Saúl ikan ueyi poder, niman yejua opeu tlajtoua ken tiotlajtojketl iminuan on oksekimej tiotlajtojkej. 11 Nochimej on yejuan kixmatiyaj desde konetl, ijkuak okitakej ika tiotlajtojtiu iminuan on tiotlajtojkej, ijkin notlajtoltiayaj: “¿Tlinon ipan onochiu ikoneu Cis? ¿Saúl no sen tiotlajtojketl?”
12 Niman sen tlakatl yejuan ompa chanej* okijtoj:
—¿Niman akinon imintataj on tiotlajtojkej?
Ijkin opeu kijtouaj on tlajtojli: ¿Saúl no inuan nopoua on tiotlajtojkej?
13 Ijkuak Saúl otlan tlajtoua ken tiotlajtojketl, oyaj kampa tlauenchiualo. 14 Itioj okitlajtoltij Saúl niman itlakeual:
—¿Kanon onenyajkaj?
Niman Saúl okinankilij:
—Otikintejtemotoj on siuapolokomej* niman xnesiyaj. Yejua ika, otiajkej otikitatoj on tiotlajtojketl Samuel para otikmatkej kanon nemiyaj.
15 Kemaj itioj Saúl okitlajtoltij:
—¿Tlinon omechijlij Samuel? Xnechtlajtlajtouili.
16 Kemaj Saúl okijlij:
—Otechijlij ika on siuapolokomej* yonenkiminnextijkaj.
Pero Saúl xitlaj* okijlij itioj ika yokalaktijkej para rey. 17 Sakin Samuel okinsentlalij nochimej on israelitas para kimauistiliskej toTEKO ne Mizpa, 18 niman ompa okinmijlij:
—ToTEKO, iDios Israel, ijkin kijtoua, "Nejua onemechkixtij ipan on tlajli Egipto nemejuamej israelitas, niman onemechmanauij inmak on egipcios niman inmak nochimej on reyes yejuan mechtlajyouiltiayaj." 19 Pero aman nemejuamej nenkichichiuaj nemoTEKO Dios yejuan yomechmanauij ipan nochi pajsoloualistli niman tlajyouilistli. Niman nenkichichiuaj pampa onenkitlajtlanilijkej ma mechtlalili sen rey para mechyekanas. Aman tej, xuajlakan ixpan toTEKO por tribus niman por ueyifamilias.
20 Kemaj Samuel okinnauatij nochimej on tribus* de Israel para ma kinisiuikan. Niman ijkuak okichiu suertes, on suerte ouets itech itribu Benjamín. 21 Kemaj okinmijlij itribu Benjamín, para ma nonisiuikan, niman on suerte ouets itech iueyifamilia Matri. Kemaj on suerte ouets itech Saúl, ikoneu Cis, pero ijkuak okitejtemojkej Saúl, xokinexitkej. 22 Kemaj oksejpa okitlajtoltijkej toTEKO, para kimatiskej tla Saúl ompa nemi. Niman toTEKO okinmijlij ika Saúl ompa nemi; niman oniyan kampa onkaj tlajtlamach* tlamamajli. 23 Niman kemaj onotlajtlalojkej* okixtitoj kampa niyantikatka. Niman ijkuak Saúl oajsik ixpan on israelitas, ones ika más ueyi tlakatl de nochimej. 24 Kemaj Samuel okinmijlij nochimej:
—¿Yonenkitakej yejuan toTEKO yokitlajpenenij para rey? ¡Xnemi nion se israelita ken yejua!
Niman nochimej on israelitas okijtojkej chikauak:
—¡Ma ueyixtia on rey!
25 Kemaj Samuel okinkakistilij on israelitas nochi on tlajtlamach yejuan sen rey ika onkaj kichiuas, niman okijkuiloj ipan sen amamoxtli*. Kemaj okeuatoj ipan itabernáculo toTEKO. 26 Sakin, Samuel okiminnauatij nochimej ma nokuepakan iminchanj. Niman Saúl no oyaj ichan ne Gabaa. Niman toTEKO okinyoleu keskimej tlakamej yejuan xmojkej para iuan oyajkej. 27 Pero sekimej xkuajkualtin tlakamej ijkin tlamach okiteneuilijkej:
—¿Saman in, yejua techmakixtis?"
Ijkon tej, okichichijkej niman xokimakakej tetlayokolijli para okitlakaitakej. Pero Saúl onochiu ken xkimatiskia.