Samuel okitlalij Saúl ken rey
9
Nemiya sen tlakatl ipan itribu* Benjamín yejuan itoka katka Cis. Yejua sanoyej kitlakaitayaj. Cis tekoneu katka itech Abiel, niman texuiu katka itech Zeror. Niman Zeror tekoneu katka itech Becorat, niman texuiu katka itech Afía. 2 Cis kipiyaya sen ikoneu yejuan itoka katka Saúl. Saúl katka sen telpochtli kualtesin. Xnemiya okse israelita yejuan kualtetsin katka ken yejua, niman ueyitlakatl katka, nochimej kimpanauiyaya.3 Se tonajli isiuapolokouan Cis opolijkej. Yejua ika okijlij Saúl, itelpoch:
—Xkuika semej on tlakeualtin niman xuiyan xkintejtemotij on siuapolokomej*.
4 Kemaj Saúl niman itekitkau oyajkej okipanauijkej on región yejuan itepeyoj Efraín, niman opanokej ipan on iueyitlalpan Salisa, pero xokinminextij on siuapolokomej*. No opanokej ipan iueyitlalpan Saalim niman ipan iueyitlalpan Benjamín, niman no xokinminextijkej. 5 Ijkuak oajsikej ipan on iueyitlalpan Zuf, Saúl okijlij itlakeual yejuan kuikaya:
—Ma titokuepakan itech notataj pampa manin yopeu más techajmatstikaj tejuamej, xken on siuapolokomej*.
6 On itlakeual okinankilij:
—Ipan in ueyikalpan nemi sen tiotlajtojketl yejuan nochimej kitlakaitaj, pampa nochi tlen kijtoua nochiua. Tiauij tikontaj niman yejua uelis techijlis katlejua ojtli tikajsiskej para tikinnextiskej on siuapolokomej*.
7 Saúl okinankilij:
—Tiauij tej. Pero, ¿Tlinon tikiktiliskej on tlakatl? Xok tikpiyaj tlakuajli, xtipiyaj tlinon tikmakaskej on tiotlajtojketl.
8 On itlakeual okinankilij:
—Nikpiya sentetl tomin de plata. Yejua tikmakaskej on tiotlajtojketl para ma techijli katlejua ojtli tiktokaskej para tikinnextiskej on siuapolokomej*.
9 (Ye uejkaui ijkuak sen israelita kinekiya itlaj kitlajtoltis Dios, ijkin kijtouaya: "Tiauij tikontaj on tetlatejtemouilijketl,” pampa on yejuan aman kixmatij ken tiotlajtojketl, achtoj kixmatiyaj ken tetlatejtemouilijketl.) 10 Saúl okijtoj:
—Kuajli, tiauij.
Kemaj on omemej oyajkej ipan on ueyikalpan kampa chantiya on tiotlajtojketl. 11 Ijkuak tlejkotiayaj para yayaj ipan on ueyikalpan, okinnamikej sekimej ichpokamej yejuan onatlakuiskiaj, niman okintlajtoltijkej:
—¿Tlen nikan in kampa uelis tiknextiskej on tetlatejtemouilijketl?
12 Niman yejuamej otlanankilijkej:
—Kemaj, sa achijtsin mechpoloua para nemajsiskej kampa nemi. Xisiuikan para ipan nemajsiskej pampa amantsin yeyau kampa tlauenchiualo. Yejua ika, ouajlaj aman ipan in ueyikalpan. 13 Ijkuak ompa nemajsiskej, nimantsin xtejtemokan chika xe yau ne kampa tlauenchiualo pampa ye tlakualos. On tlakamej xtlakuaskej tla yejua xe ajsi pampa yejua kitiochiuas on uentli. Niman kemaj ijkuak yokitiochiu, tlakuaskej nochimej on yejuan okinnotskej para ma tlakuatij. Yejua ika, xajtetsikan para nenkinextiskej.
14 Yejuamej oksejpa opeu tlejkotiuij para oyajkej ipan on ueyikalpan. Niman ijkuak ompa ajsitiayaj, Samuel ye uajkistiaya para yaya kampa tlauentlalis.
15 Achtoj ijkuak poliuiya se tonajli ika ompa ajsiskia Saúl, toTEKO ijkin yokijlijka Samuel: 16 "Mostla mayanin nimitstitlanilis sen tlakatl yejuan ualeua ipan iueyitlalpan Benjamín. Yejua tikuatekis ikan aceite para rey yes intech nokoneuan israelitas, niman yejua kinmanauis intech on filisteos. Nejua sanoyej nikinmiknelia* notlapejpeniluan pampa intlayouilis yoyejkok hasta notech.”
17 Ijkuak Samuel okitak Saúl, toTEKO okijlij: "Ompa on nemi on tlakatl yejuan onimitsijlij. In yejua kinyekanas notlapejpeniluan."
18 Niman ijkuak Saúl ye nemiya ikalakiyan on ueyikalpan, okinisiuij Samuel niman okijlij:
—¿Uelis tinechijlis kanon ichan on tetlatejtemouilijketl?
19 Samuel okinankilij:
—Nejua nitetlatejtemouilijketl. Xuiya nouan kampa tlauentlaliua, niman titlakuaskej ompa. Niman mostla kualkan nimitsnankilis nochi tlen tiknekis tinechtlajtoltis, niman kemaj tias. 20 Maka xkominmatstia on siuapolokomej* yejuan kipiya yeyi tonajli ika opolijkej, pampa ye kuajli yokinminextijkej. Niman maka xkominmatstia pampa aman, nochi on ricojyotl yejuan inyaxka on israelitas, tejua moyaxka* yes niman mofamilia.
21 Niman Saúl okinankilij:
—Pero nejua niualeua itech itribu* Benjamín, on tribu* yejuan más pitentsin de nochi tribus de Israel. Niman ipan nofamilia semi xtimiyekej yejuan tikisaj itech itribu* Benjamin. ¿Tline ijkon tinechijlia?
22 Kemaj Samuel okuikak Saúl iuan itlakeual, niman okinkalaktij ipan on kajli kampa tlakualo. Kemaj okintlalij imixpan on tenotskej kampa notlaliaj on yejuan más uejueyixtokej. Ompa nemiyaj kanaj 30 tlakamej. 23 Kemaj Samuel ijkin okijlij on yejuan tlakualchiua:
—Xkuajki on nakatl yejuan onimitsmakak niman onimitsijlij onkuaj tiktlalis.
24 On tlakualchijketl isijkapan okuito sen imetskojyo becerro niman okitlalij ixpan Saúl. Niman kemaj Samuel ijkin okijlij Saúl:
—Nikan onkaj on yejuan onikejka para tejua. Xmotlamaka niman xtlakua, pampa in yejua onimitskauilij para tikuas aman ijkuak onikinnots in chanejkej.
Ijkon tej, Saúl otlakuaj iuan Samuel ipan on tonajli. 25 Niman okiskej ne kampa tlauentlaliua, niman otemokoj ipan on ueyikalpan. Kemaj okitlalijkej sen tlapechtli para Saúl, tlapani ipan on kajli, 26 niman Saúl ompa okoch. Uajmostla san ouajtlanes Samuel okonnots Saúl ne tlapani ipan on kajli, niman okijlij:
—Xmokuiteua, pampa ye uelis tias.
Saúl onokuiteu, kemaj okisato ipan ojtli iuan Samuel. 27 Niman ijkuak uajtemotiayaj ikaltenko on ueyikalpan, Samuel okijlij Saúl:
—Xnauati on motlakeual ma yakatstiu, niman tejua xmokaua achijtsin pampa noneki nimitsijlis on tlen ToTEKO Dios onechijlij.