On israelitas kinekij sen rey
8
Ijkuak Samuel oueuentsintiak, okintlalij itelpochuan ken teyolkuitijkej para yejuamej kinyekanaskej on israelitas. 2 On itelpoch yejuan iyenkuiyou itoka katka Joel, niman yejuan ika ome itoka katka Abías. Yejuamej tekitiyaj ken teyolkuitijkej ipan on kalpan Beerseba. 3 Pero xonouikakej kuajli ken imintataj. Yej san, kinekiyaj ricojtiskej. Niman kichtakaseliayaj tomin para tlakajkayauayaj. Yejuamej xitlaj* okichijkej ikan kuajli iminyojlo. 4 Kemaj onosentlalijkej nochimej on uejueyixtokej israelitas niman oyajkej okitatoj Samuel ipan on kalpan Ramá. 5 Niman okijlijkej: “Tejua ye tiueuentsin, niman motelpochuan xnouikaj ken tejua. Yejua ika, tejuamej tiknekij xtlali sen rey para ma techyekana ken nochimej naciones kipiyaj."6 Samuel xokuelitak ika okijlijkej ma kitlali sen rey yejuan kinyekanas. Yejua ika okinots toTEKO ikan sen oración. 7 Pero toTEKO okinankilij: "Xchiua on tlen yejuamej mitstlajtlaniliaj pampa xtejua mitschichiuaj, yej nechchichiuaj nejua pampa xkinekij nejua ma nikinyekana ken iminrey. 8 Desde on tonajli ijkuak onikinkixtij ne Egipto hasta aman, nejua no ijki onechchiuilijkej ken aman tejua mitschiuilijtokej. Onechtlalkauijkej para okinmauistilijkej oksekimej dioses. 9 Xchiua tej, on tlen yejuamej mitstlajtlaniliaj, pero achtoj xkinchikajkaijli on tlen noneki kiselia sen rey, niman kenijki tlayekana."
—In yejua mechchiuilis on rey yejuan mechyekanas: Mechinkuilis nemotelpochuan para kimpiyas ken soldados, sekimej tekitiskej ipan carretas de guerra, sekimej tekitiskej ipan caballos ijkuak ontlauijsokiskej, niman sekimej kimpiyas para notlaloskej ixpan icarreta para kimanauiskej. 12 Sekimej kintlalis para tlayekanaskej itech se mil soldados, niman sekimej kintlalis para tlayekanaskej intech 50 soldados. Niman sekimej kinchiualtis kixoponiliskej itlal niman kipixkiliskej itlatok. Oksekimej kinchijchiuaskej armastin, niman nochi on tlajtlamach* yejuan kitekitiltiskej ipan on carretas de guerra. 13 No mechinkuilis nemochpochuan para ajuiyakachiuaskej, para tlakualchiuaskej niman para panchiuaskej. 14 No ijki mechinkuilis on yejuan más kuajli tlaltin, niman mechkuilis nemouvasyoj niman nemoolivojyoj para kinmakas itekitkauan yejuan más uejueyixtokej. 15 No mechkixtilis majtlaltli por ciento itech nemotrigo niman nemouvas. Niman nochi on matlaktli por ciento kinmaktilis on itlapaleuijkauan niman itekitkauan. 16 No mechkuilis nemotekitkauan, tlakamej niman siuamej, niman mechinkuilis nemouakaxuan niman nemopolokouan yejuan más kuajkualtin para kintekitiltis ipan yejua itekiu. 17 No mechkixtilis majtlaktli por ciento nemoyolkauan. Hasta nemejuamej nemokauaskej esclavos yejua itech. 18 Niman ijkuak nenkijtoskej ika xok nenkinekij on rey yejuan aman nentlajtlanij, toTEKO xkinekis mechkakis.
19 Pero on israelitas xokinekej okakkej maski ijkon okinmijlij Samuel. Yej okijtojkej:
—¡Maski ma ijki! Tejuamej tiknekij sen rey, 20 para no ijki tinemiskej kenon oksekimej naciones, niman para yejua techmandaros niman techyekanas ipan nouijsokilistli.
21 Ijkuak Samuel yokak nochi on tlen okijtojkej on israelitas, sano ijki nochi okijlij toTEKO, 22 niman toTEKO okinankilij:
—Xchiua on tlen yejuamej tlajtlanij niman xkintlalili sen rey.
Kemaj Samuel okinnauatij para cada se ma nokuepa ipan iueyikalpan.