7
Kemaj on chanejkej ipan on ueyikalpan Quiriat-jearim oyajkej okiktikej on iyekcaja toTEKO ichan Abinadab yejuan chantiya ipan sen tepetsintli. Kemaj Eleazar itelpoch Abinadab, okixpantilijkej Dios para yejua ma cuidaro on yekcaja.
Samuel yejua tlayekanki intech on israelitas
2 Opanok kanaj sempoajli xipan desde ijkuak iyekcaja toTEKO okajkej ipan on ueyikalpan Quiriat-jearim. Niman on israelitas nochimej opeu najmanaj niman okitsajtsilijkej Dios para ma kimpaleui. 3 Yejua ika Samuel okinmijlij nochimej on israelitas: "Tla nemejuamej melauak nenkinekij nemokuepaskej ika nochi nemoyojlo itech toTEKO, tla ijkon, xkinkauakan nemodioses niman xkinkauakan on ídolos kampa ixnestikaj on diosa Astarté. Xtekipanokan toTEKO niman san yejua xmauistilikan, niman yejua mechmanauis intech on filisteos."
4 Kemaj on israelitas okinkixtijkej nochimej on ídolos kampa ixnestikatkaj Baal niman Astarté, niman okitekipanojkej san toTEKO. 5 Sakin, Samuel okinmijlij on israelitas: "Xmosentlalikan nenmochimej ne Mizpa, niman nejua ompa nikchiuas oración nemopampa."
6 On israelitas onosentlalijkej ne Mizpa, niman ompa okixtijkej atl niman okitoyajkej ipan tlajli ken se uentli para toTEKO. On tonajli onosaukej niman ijkin onoyolkuitijkej: "Sanoyej yotitlajtlakojkej ixpan toTEKO." Niman ompa Samuel onochiu intlayekankau on israelitas.
7 Ijkuak on filisteos okimatkej ika on israelitas yonosentlalijkej ne Mizpa, on tlayekankej filisteos oyajkej para kominuijsokiskej. Ijkuak on israelitas okimatkej, sanoyej onomojtijkej, 8 niman okijlitoj Samuel: "Maka xmotelti ika tikchiua oración topampa itech toTEKO Dios para ma techmanaui intech on filisteos."
On israelitas okintlankej on filisteos ne Eben-ézer
9 Kemaj Samuel okimakak toTEKO sen borreguito yejuan sanken* chichi* ken sen uentli yejuan nochi tlatla. Niman okitlajtlanilij toTEKO ma kimpaleui on israelitas. Niman toTEKO okinankilij. 10 Chika Samuel kimakatikatka toTEKO on uentli yejuan nochi tlatla, on filisteos okinnisiuijkej on israelitas para kinuijsokiskej, pero toTEKO okichiu para chikauak ma tlakokomoka impan on filisteos niman okinmomojtij, hasta otlamachilispolijkej niman ontlatlaksakej. Ijki, on israelitas ouel okintlankej on filisteos. 11 On israelitas nimantsin okiskej ne Mizpa, okintojtokakej niman okinuijsokej on filisteos hasta tlatsintlan ipan on pitentsin kalpan Bet-car. 12 Kemaj Samuel okonkuik sen tetl, niman okitelkets entre Mizpa niman Sen. On tetl okitokayotij Eben-ezer yejuan kijtosneki: "Hasta aman toTEKO yotechpaleuij."
13 On filisteos okintlankej, niman toTEKO xokinkauilij oksejpa okinoyaxkatijkej imintlal on israelitas chika nemiya Samuel. 14 On uejueyikalpanmej yejuan on filisteos okinkuilijkaj on israelitas, desde Ecrón hasta Gat, oksejpa okinoyaxkatijkej on israelitas. Ijkon tej, okinkuilijkej oksejpa on filisteos inueyitlalpan. No ijki oonyak seuilistli intech on israelitas inuan on amorreos.
15 Samuel otlayekan ken juez nochi inemilis intech on israelitas. 16 Niman cada xipan yaya Betel, Gilgal niman Mizpa para kuajli kinyekanaya ken tekiuaj. 17 Kemaj nochipa nokuepaya Ramá kampa kipiyaya ichan, niman desde ompa no teyolkuitiaya on israelitas. Niman ompa okichijchiuilij toTEKO sen tlaixpan*. allí juzgaba a Israel RV