On filisteos okauatoj iyekcaja toTEKO
6
Pampa iyekcaja toTEKO ye onkatka chikome metstli ipan imintlal on filisteos, 2 on filisteos okinnotskej on tiopixkej niman on yejuan tetlatejtemouiliaj para okintlajtoltijkej tlinon kichiuaskej. Niman ijkin okintlajtoltijkej:tikchiuaskej ika iyekcaja iminDios on israelitas? Xtechijlikan kenijki uelis tikonkauaskej intech on israelitas.3 Yejuamej okinmijlijkej:
—Tla nenkonkauaskej iyekcaja iminDios on israelitas, maka xtitlanikan san ijki. Yej xtemakakan sen uentli para nenkitlaxtlauiliskej Dios on tlen xkuajli onenkichijkej. Kemaj nemejuamej nempajtiskej niman ijki nenkimatiskej tline omechcastigaroj.
4 Niman on filisteos otetlajtoltijkej:
—¿Tlinon uentli uelis tiktemakaskej para tiktlaxtlauaskej on tlen xkuajli otikchijkej?
On tiopixkej niman on yejuan tetlatejtemouiliaj okiminankijlijkej:
—Pampa nemij makuiltimej filisteos tlayekankej, xchijchiuakan makuijli ixneskayomej ikan oro yejuan nesiskej kenon kokolistli yejuan onochiu bolas ipan imintlajtlakayo, niman makuijli ixneskayomej ikan oro yejuan nesiskej ken kemichimej pampa nemejuamej niman nemotlayekankauan sano yejua ika nentlajyouiyaj. 5 Ijkon tej, xchijchiuakan on ixneskayomej de on kokolistli yejuan onochiu bolas ipan imintlalnakakyo niman on kemichimej yejuan kixpolojtokej in país, niman xkueyilikan iminDios on israelitas. Manin ijki xok mechtlajyouiltis, nion xok kintlajyouiltis nemodioses nion nemotlal. 6 Maka nemoyoltechikauaskej ken okichijkej on egipcios niman iminrey. Yejuamej onoyoltechikajkej pero ijkuak iminDios on israelitas sanoyej yokintlajyouiltij, okinkauilijkej okiskej on israelitas. 7 Xtlanauatikan ma kichijchiuakan sen carreta yenkuik, niman xkintlapejpenikan ome vacas yejuan kipiyaj iminkoneuan yejuan sanken* chichij* niman xekaman kinyokojtiaj. Kemaj, xkinyokojtikan on vacas, niman on carreta xsalokan impan on vacas para kitilantiaskej. Pero iminkoneuan xkintsakuakan para maka kintokaskej. 8 Kemaj xtlalikan iyekcaja toTEKO ipan on carreta. Niman inakastlan xtlalikan okse caja ika on tlajtlamach* de oro yejuan nenkitlaliaj ken uentli para nenkitlaxtlauaskej nemotlajtlakol. Kemaj xkinmakauakan on vacas iuan on carreta para ma uiyan iminseltimej kampa kinekiskej. 9 Pero noneki xkintakan, tla kitokaj on ojtli yejuan ajsi ipan on ueyikalpan Bet-semes ipan imintlal on israelitas. Ijkon tikmatiskej ika iminDios on israelitas yejua otechtlajyouiltij. Pero tla xompaka yauij, tikmatiskej ika san otechajsik in kokolistli.
10 On tlakamej ijki okichijkej. Okuajuikakej ome vaca yejuan tlaskaltiaj*, niman on iminkoneuan okintsakukej. Kemaj on vacas okinsalojkej ipan on carreta para okitilantiajkej. 11 Kemaj okitlalijkej iyekcaja toTEKO ipan on carreta, niman itech okitlalijkej on caja yejuan kipiya on kemichimej de oro niman on ixneskayomej de oro yejuan tlajtlachaj kenon temojti kokolistli yejuan onochiu bolas ipan imtlalnakayo. 12 Kemaj on vacas okajsikej on ojtli yejuan yau Bet-semes, niman oyajkej san se melajki. Niman tsajtsitiayaj pero xonokuepkej, nion xokajkej inojui, nion xonopojpolojkej. Niman on makuiltimej tlayekankej filisteos okintôkakej on vacas hasta kampa ontlami imintlal niman kampa peua on tlajli Bet-semes.
13 On chanejkej ne Bet-semes kipixkayaj trigo ipan sen ixtlauatl. Ijkuak ontlachixkej niman okitakej iyekcaja toTEKO, sanoyej opakkej. 14-15 Ijkuak on carreta oajsik ipan on campo de Josué ne Bet-semes, onoteltij ompa kampa onkatka sen ueyi tetl. Kemaj on levitas okitemoltijkej iyekcaja Dios iuan on caja yejuan kipiyaya on tlajtlamach* de oro. Nochi okitlalijkej ipan on ueyi tetl. Kemaj oksekimej tlakamej de on ueyikalpan Bet-semes okitsojtsontekej on carreta, niman ika on kojtli* okintlatijkej on vacas ken sen uentli yejuan nochi tlatla para toTEKO. On tonajli on chanejkej ne Bet-semes okimakakej toTEKO uentin yejuan nochi tlatla niman okseki uentin. 16 Ijkuak on makuiltimej tlayekankej filisteos okitakej nochi on tlen okichijkej on israelitas, onokuepkej sano ipan on tonajli ipan inueyikalpan ne Ecrón.
17 On filisteos okimakakej toTEKO on makuijli ixneskayomej de on bolas de oro ken tlaxtlauijli para okitlaxtlajkej imintlajtlakol. Se okitemakak on ueyikalpan Asdod, se de Gaza, se de Ascalón, se de Gat, niman se de Ecrón. 18 Niman on makuiltimej kemichimej de oro katkaj no ichkich kenon makuijli uejueyikalpanmej filisteos de on makuijli tlayekankej. Kimpouayaj on uejueyikalpanmej yejuan kuajli yeualtsakutokej ikan tepantli iminuan on kalpanmej pipitikej yejuan xyeualtsakutokej. On ueyi tetl yejuan ipan okitlalijkej iyekcaja toTEKO sanken* onkaj ipan on campo de Josué ipan on kalpan Bet-semes.
19 Pero toTEKO okichiu para ma mikikan 70 tlakamej ipan on ueyikalpan Bet-semes pampa ontlachixkej ijtik iyekcaja. Niman nochimej on chanejkej ipan on ueyikalpan ochokakej impampa on yejuan omikkej. 20 Kemaj on chanejkej ne Bet-semes okijtojkej: "¿Akinon uelis nemis ixpan toTEKO, itech on Dios yejuan sanoyej yektli? ¿Kanon uelis tiktitlaniskej in iyekcaja Dios?" 21 Kemaj okintitlajkej tlakamej ipan on ueyikalpan Quiriat-jearim para ijkin ma kijmijlitij on yejuan ompa chanejkej: "On filisteos yomechkuepilijkej iyekcaja toTEKO. Aman tej, xuajlakan niman xkiktikan."