On yekcaja okiktikej ipan imintlal on filisteos
5
On filisteos okitekuilijkej on iyekcaja Dios ne Eben-ezer niman okiktikej hasta ipan on kalpan itoka Asdod. 2 Kemaj okalaktijkej ipan itiopan on dios Dagón, niman okitlalijkej inakastlan on dios. 3 Uajmostla kualkan, on chanejkej ne Asdod oyajkej ne imintiopan niman okinextitoj on dios Dagón ixakamantlajkaltok ipan tlajli ixpan iyekcaja toTEKO. Kemaj oketstejkej niman okitlalijkej sa no ompa kampa onkatka. 4 Pero uajmostla oksejpa oyajkej, on chanejkej Asdod, niman oksejpa okitakej on dios Dagón ixakamantlajkaltok ipan tlajli ixpan iyekcaja toTEKO. Itsontekon niman on ome ima nochi postektoyaj niman xintoyaj ikiauatempan on tiopan. Itlakayo sa yejua onokau. 5 (Yejua ika hasta aman, ijkuak on itiopixkauan Dagón niman nochi tlakatl yejuan kalaki ipan on tiopan ne ipan on kalpan Asdod, xcholouaj kampa ouets itlakayo on Dagón.)6 Kemaj toTEKO sanoyej temojtij okincastigaroj nochimej on tlakamej ipan on kalpan Asdod niman nochi on inueyitlalpan. Okintlajyouiltij temojti ikan kokolistli yejuan onochiu bolas ipan intlalnakayo. 7 Niman ijkuak on chanejkej ipan on kalpan Asdod okitakej nochi on tlen nochijtikaj, okijtojkej: "On iyekcaja iminDios on israelitas xuelis nokauas nikan totech pampa Dios sanoyej techtlajyouiltia niman no kitlajyouiltia todios Dagón."
8 Yejua ika, okintekuitlankej nochimej on tlayekankej filisteos para ma nosentlalikan iminuan yejuamej, niman okintlajtoltijkej:
—¿Tlinon tikchiuaskej ika iyekcaja iminDios on israelitas?
Niman yejuamej otenankilijkej:
—Xkiktikan ipan on ueyikalpan Gat.
Ijkon tej, on filisteos okiktikej iyekcaja Dios ne Gat. 9 Pero ijkuak on yekcaja okiktikej ipan on ueyikalpan, toTEKO okuajkik sen nemojtijli ipan on ueyikalpan. Niman okincastigaroj on chanejkej Gat, desde yejuan más konetl hasta yejuan más ueuentsin ika on temojti kokolistli yejuan onochiu bolas ipan intlalnakayo. 10 Kemaj on filisteos okiktikej iyekcaja Dios ipan on ueyikalpan Ecrón. Pero ijkuak ompa okaxitijkej on yekcaja, nochimej on chanejkej ipan on ueyikalpan otsajtsikej niman okijtojkej: "¡Yotechajkuilijkej iyekcaja iminDios on israelitas para ma techmikti tinochimej!"
11 Kemaj on chanejkej ipan on ueyikalpan okintekuitlankej nochimej on tlayekankej filisteos, niman okinmijlijkej: "Xkiktikan iyekcaja iminDios on israelitas niman xkauatij kampa onenkitekuilijkej para maka timikiskej tinochimej."
12 On yejuan xomikkej sanoyej tlajyouiyayaj pampa nochimej yokinmajsika on temojti kokolistli yejuan onochiu bolas ipan intlalnakayo. Niman inchokilis yoajsik hasta ipan iluikak.