On filisteos okitekuilijkej iyekcaja toTEKO
4
Ipan on tonaltin on filisteos onosentlalijkej para kinuijsokiskej on israelitas, niman on israelitas no onosentlalijkej para kinmixnamiskej on filisteos. On israelitas onoseuijkej ne Eben-ezer niman on filisteos uej onoseuijkej ne Afec. 2 Kemaj on filisteos okinuijsokkej on israelitas, niman okintlankej pampa sanoyej temojtij ken okinuijsokkej. Okimiktijkej kanaj 4 mil israelitas. 3 Ijkuak on soldados israelitas oyajkej ipan imincampamento, on uejueyixtokej tlayekankej israelitas, onotlajtoltijkej: "¿Tline aman okitekauilij toTEKO ma techtlanikan on filisteos? ¡Tiauij ne Silo tikonkuij iyekcaja toTEKO para yejua ma uiya touan, niman ma techyekana niman ma techmanaui intech totlauelikniuan!"4 Kemaj on israelitas okintitlankej sekimej tlakamej ne Silo para okuitoj on yekcaja kampa toTEKO yejuan kipiya nochi poder, kipiya itrono intsajlan on querubines*. Ofni niman Finees, on omemej itelpochuan Elí, no iminuan yayaj on yejuan kiktiyaj iyekcaja Dios. 5 Ijkuak okaxitijkej iyekcaja toTEKO ipan on campamento on israelitas sanoyej chikauak opakatsajtsikej hasta otlaluiuixkak.
6 Ijkuak on filisteos okakkej ken chikauak tsajtsilo, onotlajtoltijkej: "¿Tlinon nochiua ne intech on hebreos*? ¿Manin tline sanoyej tsajtsi?" Pero ijkuak okimatkej ika on israelitas yokiktikej ipan incampamento on iyekcaja toTEKO, 7 on filisteos sanoyej onomojtijkej niman okijtojkej: "Dios youajlaj ipan incampamento on israelitas! ¡Lástima de tejuamej pampa hasta aman xkaman itlaj topan nochiuaya kenin! 8 ¡Lástima de tejuamej! ¿Akinon uelis techmanauis para maka tiuetsiskej imak on Dios yejuan nochi ueli kichiua? On Dios sano yejua yejuan okintlajyouiltij on egipcios ipan on xalpatlajkan ikan tlajtlamach* plagas. 9 ¡Aman tej, xmokojtilikan soldados filisteos niman xtlauijsokikan ken xkaman nentlauijsokiyaj para maka nenesclavos yeskej intech on israelitas ijkon ken yejuamej toesclavos katkaj!"
10 Kemaj on filisteos okinuijsokej on israelitas niman okintlankej. Niman on oksekimej israelitas ontlatlaksakej para inchan. Sanoyej temojtij ken miyek israelita omik. Kanaj 30 mill soldados omikkej. 11 On filisteos okinoyaxkatijkej iyekcaja toTEKO Dios, niman okinmiktijkej Ofni niman Finees, on omemej itelpochuan Elí.
12 Pero sen soldado yejuan kisaya itech itribu* Benjamín ouel ocholojteu ipan on nouijsokilistli, niman sanoyej onotlaloj hasta Silo niman oajsik sano ipan on tonajli. Yejua sa tlakentsajtsayaktikatka niman yokinotemilijka tlajli ipan itsontekon. 13 Ijkuak oajsik ne Silo, Elí yeuatikatka ipan isillón, niman sa ontlachixtikatka ipan ojtli, pampa sa komatstikatka iyekcaja toTEKO. 14 Ijkuak Elí okak ika chikauak tsajtsilo, okitlajtoltij:
—¿Tlinon kijtosneki ika sanoyej tsajtsiua?
Kemaj on tlakatl okisijkatlajtlajtouilij Elí nochi on tlen onochiu. 15 Ijkuakon Elí kipiyaya 98 xipan niman xok kuajli tlachaya. 16 On tlakatl okijlij Elí:
—Oniuajcholojteu ipan on tlauijsokilistli.
Kemaj Elí okitlajtoltij:
—¿Tlinon onochiu ipan on tlauijsokilistli, nokoneu?
17 Yejua okinankilij:
—On israelitas ochojcholojkej intech on filisteos, niman miyekej okinmiktijkej. No okinmiktijkej on omemej motelpochuan Ofni niman Finees. Niman iyekcaja toTEKO okuikej on filisteos.
18 Ijkuak on tlakatl okijtoj ika yokuikej iyekcaja Dios, Elí oajketstiaj itechika on tsakuijlotl. Niman pampa yeueuentsin katka niman yetik, okechtepostek niman omik. Elí okinyekan on israelitas 40 xipan.
19 Isiuamon Elí yejuan isiuau katka Finees koneuaj katka, niman tlanisiuiyaya para kitlakatilis ikoneu. Ijkuak okak ika iyekcaja Dios yokuikej on filisteos, niman ika imontaj niman iueuentsin* yomikej, nimantsin opeu temojtij nokokoua para tlanemitis. Kemaj otlakat ikonetsin. 20 On siuamej yejuan okipaleuijkej para onen ikonetsin, ijkuak okitakej ika ye miktikaj, okijlijkej: "Maka xmomojti, pampa yotikontlakatilij sen tlakakonetl." Pero yejua xokinnankilij nion xokinkak. 21-22 Niman on konetsintli okitokayotij Icabod yejuan kijtosneki: "Itlakaitalis toTEKO xok onkaj touan." Ijkon okitokayotij pampa okimat ika itlakaitalis toTEKO xok onkatka iminuan on israelitas pampa yokuikaj iyekcaja Dios niman ika imontaj niman iueuentsin* yomikkej.