Saúl okintlan on amonitas
11
Nahas, rey de Amon, oyaj Jabes ipan iueyitlalpan Galaad para kuijsokis sen ueyikalpan de Israel. Pero on chanejkej ompa Jabes okijlijkej:—Ma tikchiuakan sen pacto* de yolseuilistli mouan niman tejuamej titochiuaskej moesclavos.
2 Niman Nahas on amonita okiminnankilij:
—Kuajli, nikchiuas sen pacto* de yolseuilistli nemouan, pero san tla nenkimokauiliskej ma nenmechkixtili sen nemoyekmaixtololoj cada se nemejuamej, para ijkon nikimpinajtis on israelitas.
3 Kemaj on uejueyixtokej tlayekankej ipan on kalpan Jabes ijkin okinankilijkej:
—Xtechcha chikomej tonajli para tikintitlaniskej on tenojnotskej ipan nochi iminueyitlalpan on israelitas niman tla xakaj uajlau para techpaleuis titotemakaskej motech.
4 On tenojnotskej oajsikej ipan on ueyikalpan Gabaa kampa chantiya Saúl. Ijkuak okinmachistijkej nochimej on chanejkej, ken okijtoj Nahas on rey amonita, nochimej opeu sanoyej chokaj. 5 Ijkuak Saúl yejkotikatka de ipan campo ikan iuakaxuan, otetlajtoltij:
—¿Tlinon impan nochiua in chanejkej? ¿Tline sanoyej chokaj?
Kemaj okitlajtlajtouilijkej tlinon okinmijlikoj on tlakamej de Jabes. 6 Ijkuak Saúl ijkon okak, iespíritu Dios ouajlaj ipan ikan ueyi poder, niman sanoyej okualan. 7 Kemaj okimiktij ome uakax niman okintetek, niman okinmakak on tenojnotskej para okijiktikej nochiuiyan ipan on iueyitlalpan Israel. Niman okinmijlij ijkin ma teijlijtiakan: "Ijkin kiminchiuiliskej iminuakaxuan on yejuan xkinekiskej yaskej iuan Saúl niman Samuel".
Niman ijkuak on tlakamej ijkon okakkej, sanoyej onomojtijkej ika on tlin toTEKO kinchiuilis tla xyaskej inuan, niman san seknek oyajkej niman onosentlalitoj iminuan. 8 Ijkuak Saúl okimpou on tlakamej ne Bezec, katkaj 300 mil tlakamej de Israel niman 30 mil de Judá. 9 Kemaj ijkin okinmijlij on tenojnotskej yejuan oualejkej Jabes:
—Xuiyan niman xkinmijlikan on chanejkej ne Jabes ika mostla tlakualispan tikominmanauiskej.
On tenojnotskej oyajkej niman ijki okinmijlitoj on chanejkej ne Jabes, niman yejuamej sanoyej opakkej. 10 Niman ijkin okinankilijkej Nahas:
—Mostla titotemakaskej motech para xchiua touan tlinon tejua tiknekis.
11 Uajmostla Saúl okinsentlalij isoldados yexkantipan, niman ijkuak xe tlanesi, okalakkej ipan imincampamento on imintlauelikniuan. Niman okinuisokkej on amonitas hasta otlakualispantiak. Niman on yejuan xokinmiktijkej, ontlaktlaksakej niman onochajchayajkej* nion semej xonokajkej san sekan. 12 Kemaj sekimej tlakamej okijlijkej Samuel:
—¿Kanon nemij on yejuan xkineltokayaj ika Saúl ueliskia yes torey? ¡Xtechinmaktilikan on tlakamej ma tikinmiktikan!
13 Pero Saúl okijtoj:
—Ipan in tonajli xakaj mikis pampa aman toTEKO yokimakixtij Israel.
14 Niman Samuel okinmijlij nochimej:
—Tiauij ne Gilgal para tikteneuaskej ika Saúl yejua melauak torey.
15 Ijkon tej, nochimej oyajkej ne Gilgal, niman ompa ixpan toTEKO, Saúl okitenejkej ken rey. Kemaj toTEKO okimakakej uentli de yoltlalilistli, niman Saúl iuan nochimej on israelitas sanoyej opakkej.