Samuel kaua itekiuajyo ipan imauan Saúl
12
Kemaj Samuel okijtoj imixpan nochimej on israelitas: —Nemejuamej yonenkitakej ika nejua yonikchiu nochi tlen onennechtlajtlanilijkej niman yonemechtlalilij sen rey. 2 Nikan nenkipiyaj in rey yejuan mechyekanas. Nejua, ye niueuentsin niman nochi notson yoistayak, niman notelpochuan nikan nemij nemouan. Nejua onemechyekan desde nitelpochtli katka niman hasta aman. 3 Aman nikan ninemi: Tla oniknoyaxkatij sen uakax noso sen poloko* yejuan teyaxka, noso tla yakaj onikajkayau, noso oniktlajyouiltij, noso tla onikselij ichtakatlaxtlauijli, uelis nenechteixpanuiskej ixpan toTEKO niman ixpan on rey yejuan yejua yokitlalij, niman nejua niktlaxtlauas tlen nikteuikilia.
4 Kemaj yejuamej okinankilijkej:
—Xkaman otitechkajkayau, nion xkaman otitechtlajyouiltij, nion xkaman otitechchiuilij itlaj xkuajli.
5 Niman Samuel okijtoj:
—ToTEKO niman on rey yejuan yejua okitlalij, yejuamej testigos ika xitlaj* onenmechchiuilij yejuan xkuajli.
Ijkin okinanilijkej:
—Melauak yejuamej testigos!
6 Samuel no okijlij nochi tlakatl:
—ToTEKO okichiu para itechkopa Moisés niman Aarón okinkixtijkej nemoachtojtajuan ipan on tlajli Egipto. 7 Xkakikan, nemechtlajtlajtouilis ixpan toTEKO on tlen yejua kuajli okichiu nemopampa niman impampa nemoachtojtajuan. 8 Ijkuak Jacob niman iuejkakoneuan oyajkej Egipto niman on egipcios kintlajyoluiltiayaj, nemoachtojtajuan onoueyikatsajtsilijkej niman toTEKO okintitlanilij Moisés niman Aarón, para ma kinkixtikan ompa ne, niman ijki okinuajuikakej nikan ipan in tlajli. 9 Pero yejuamej okelkajkej iminTEKO Dios, niman yejua okintemaktilij inmak Sísara on tlayekankej itech isoldados Jabín, imak on rey Hasor, inmak on filisteos, niman imak on rey de Moab yejuan okinuijsokkej on israelitas. 10 Pero kemaj yejuamej onoyolkuitijkej ixpan toTEKO, pampa otlajtlakojkej ijkuak okitlalkauijkej, para okinmauistilikej on ídolos kampa okixneskayotijkej on dios Baal niman Astarté. Niman okitlajtlanilijkej ma kinmanaui inmak intlauelikniuan, niman okijlijkej ika san yejua kimauistiliskej.
11 "Kemaj toTEKO omechtitlanilij Jerobaal, Barac, Jefté niman Samuel para ma mechmanauikan inmak nemotlauelikniuan. Niman ijki nemejuamej ouel nemoyolika onennenkej. 12 Pero ijkuak nemejuamej onenkitakej Nahas, iminrey on amonitas, ika yaya mechonuijsokis, onenechtlajtlanilijkej ma nemechtlalili sen rey yejuan mechyekanas, maski nemorey katka sano nemoTEKO Dios. 13 Pero nikan nenkipiyaj in rey yejuan nemejuamej onenkitlapejpenijkej. ToTEKO yomechmakak on rey yejuan onenkitlajtlanilijkej. 14 Aman nemejuamej noneki nenkitlakaitaskej toTEKO, nenkimauistiliskej niman nenkitlakamatiskej itlanauatiluan. Maka san nenkajauilmatiskej. Tla nemejuamej niman on rey yejuan mechyekanas, ijkon nennemiskej ken nemoTEKO Dios kineki, ijki kuajli nemopan nochiuas. 15 Pero tla xnenkitlakamatij, niman xnenkichiuaj itlanauatiluan, yejua mechcastigaros nemejuamej iuan nemorey ken okincastigaroj nemoachtojtajuan.
16 "Aman tej, xtlamachakan niman nenkitaskej on milagro yejuan toTEKO kichiuas nemixpan. 17 Nemejuamej nenkimatstokej ika ipan in tonaltin ijkuak kipixkaj trigo, xkiaui. Pero nejua niktlajtlanilis toTEKO ma kuajtitlani tlakomonajli niman kiautli, para ijki nenkimatiskej ika toTEKO sanoyej xkuelita ika onentlajtlankej sen rey."
18 Kemaj Samuel onueyikatsajtsilij itech toTEKO, niman yejua nimantsin okuajtitlan tlakomonajli niman kiautli. Niman nochimej on tlakamej sanoyej okimakaskej toTEKO niman Samuel. 19 Kemaj nochimej okijlijkej Samuel:
—Xtlajtlanili moTEKO Dios topampa para maka timikiskej. Sanoyej titlajtlakolejkej, niman más otitlajtlakojkej ijkuak otiktlajtlankej sen rey.
20 Samuel okiminnankilij:
—Maka xmojmojtikan. Melauak nemejuamej yonenkichijkej sanoyej xkuajli, pero aman maka xtlalkauikan toTEKO. Yej, xtekipanokan ika nochi nenmoyojlo. 21 Maka xkintokakan on yejuan xmelauak dioses pampa yejuamej xuelij tepaleuiyaj, nion temakixtiaj. Yejuamej xnejli dioses. 22 Para maka kipolos tlakaitalistli itokatsin toTEKO, yejua xmechtlalkauis. Yejua kineki para nenitlapejpeniluan yeskej. 23 Niman maka nitlajtlakos itech toTEKO tla xok nikchiua oración nemopampa. Yej kemaj, nemechititis kenijki nemouikaskej kuajli niman melajki. 24 Nemejuamej san xtlakaitakan toTEKO, niman xmauistilikan melauak ika nochi nemoyojlo. Xkelnamikikan kenijki yejua sanoyej yomechpaleuij. 25 Pero tla sanken* nenkichiuaj tlen xkuajli nemejuamej niman nemorey nempopoliuiskej.