On israelitas onouijsokkej iminuan on filisteos
13
Saúl ye kipiyaya 30 xipan ijkuak opeu tekiuajti ken rey itech Israel. Niman ijkuak ye kuikaya keski xipan ika tekiti, 2 okintlapejpenij 3 mil soldados israelitas. 2 mil onokajkej iuan Saúl ne Micmas niman ipan on itepeyoj Betel, niman on okse se mil soldados onokajkej iuan Jonatán ne Gabaa ipan iueyitlalpan Benjamín. Niman on oksekimej soldados okinnauatij Saúl ma nokuepakan iminchan. 3 Jonatán okinuijsok on soldados filisteos yejuan nemiyaj ne Gabaa niman on oksekimej filisteos okimatkej. Kemaj Saúl otlanauatij ma kimpitsakan on tlapitsaltin ipan nochi on país para kinmachistiskej on israelitas.4 Nochimej on israelitas okimatkej ika Saúl okinuisok on soldados filisteos yejuan nemiyaj ne Gabaa. Yejua ika on filisteos sanoyej kintlauelitayaj on israelitas. Kemaj on soldados israelitas onosentlalijkej iuan Saúl ne Gilgal.
5 On filisteos no onosentlalijkej para kinuijsokiskej on israelitas. Kipiyayaj 3 mil carretas de guerra, 6 mil soldados yejuan yayaj ipan caballos, niman on yejuan san nejnentiayaj sanoyej miyekej katkaj kenon xajli itempan mar. Kemaj oyajkej ne Micmas, onochachantijkej kampaka ikisayan tonaltsintli kampa itoka Bet-avén.
6 On israelitas kimatiyaj ika kintlaniskej, pampa on filisteos yejuan kinuijsokiyaj sanoyej miyekej katkaj. Yejua ika, oniyanatoj ipan teostomej, niman kampa onkatkaj temej uejueyimej, ipan tlajtlaltsayankan niman ipan tlaltekontin. 7 Miyekej israelitas okipanokej on río Jordán, oyajkej ipan iueyitlalpan Gad niman ipan iueyitlalpan Galaad. Pero Saúl sanken* onokau ne Gilgal, niman nochi isoldados kitokayaj ikan miyek nemotijli, hasta kuekuetlakayaj. 8 Saúl ompa okichix chikome tonajli ijkon ken Samuel yokijlijka. Pero Samuel hasta aman xejkoya ne Gilgal, niman on tlakamej opeu nochajchayauaj. 9 Kemaj Saúl ijkin otlanauatij:
—Xnechinuajuikilikan on yolkej para on uentli yejuan tlatlas niman on uentli de yoltlalilistli.
Niman sano yejua okiuentlalij on uentli yejuan tlatla.
10 Ijkuak Saúl kemach otlan kiuentlalia on uentli yejuan tlatla, oyejkotets Samuel. Kemaj Saúl okinamikito niman okitlajpaloj. 11 Pero Samuel okijlij:
—¿Tline ijkon otikonchiu?.
Saúl okinankilij:
—Ijkuak onikitak ika on tlakamej yopeu nochajchayauaj niman tejua xtejkoya ken otikijtojka, niman ika on filisteos yonosentlalijkaj ne Micmas, 12 oniknemilij ika yejuamej uajtemoskej para nechajuijsokiskej nikan Gilgal, niman nechajsiskiaj ijkuak xe ninoueyikatsajtsilia itech toTEKO. Yejua ika, sano nejua onikuentlalij on uentli yejuan tlatla.
13 Niman Samuel okinankilij:
—On tlen otikchiu sen ueyi tontojyotl. Tla tiktlakamatiskia on tlanauatijli yejuan toTEKO omitsmakaka, yejua mitskauiliskia tejua niman mouejkakoneuan nochipa nenreyes yeskiaj ipan in tlajli de Israel. 14 Pero aman xok nochipa tirey yes ipan ipaís de Israel. ToTEKO kitejtemos sen tlakatl yejuan yejua kuelitas, niman kalaktis rey itech itlapejpeniluan, pampa tejua xotiktlakamat on tlen toTEKO omitsnauitij.
15 Kemaj Samuel okis ne Gilgal niman oyaj Gabaa kampa iueyitlalpan Benjamín.
Saúl okimpou isoldados yejuan iuan yayaj niman katkaj 600 tlakamej. 16 Saúl, iuan Jonatán on itelpoch, niman on soldados yejuan yayaj iminuan onokajkej Gabaa ipan iueyitlalpan Benjamín, chika on filisteos uej onochachantijkej ne Micmas. 17 Ipan icampamento, on soldados filisteos okiskej yexkantipan. Se oyaj kampaka Ofra ipan on iueyitlalpan Sual. 18 Okse oyaj kampaka Bet-horón. Niman on ika yeyi oyaj itechka on tepetsintli yejuan ijkak ipan on ixtlauatl Zeboim yejuan ajsi itech on xalpatlajkan.
19 Ipan nochi iueyitlalpan Israel, xnemiya nion se teposchijchijketl, pampa on filisteos ijkin kinemiliayaj para ijkon on israelitas xueliskej kinochijchiuiliskej iminespadas noso iminlanzas. 20 Yejua ika, nochimej on israelitas yayaj intech on flisteos para kitentiskej imintepos yejuan ika tlaxoponiaj*, iminasadón, iminhacha noso imimpico. 21 Ijkuak kintentiliayaj imintepos yejuan ika tlaxoponiaj*, noso iminazadón, kitlaxtlauayaj chikueyi gramo plata tomin. Niman para kintentiliayaj iminhacha noso inteposchijkol yejuan kipiya yeyi itlan yakapitstikej, kitlaxtlauayaj naui gramo plata tomin. 22 Yejua ika, nochimej on israelitas yejuan yayaj iuan Saúl niman iuan Jonatán on tonajli ijkuak otlauijsokitoj xitlaj* kiktiyaj espada noso lanza. Pero Saúl iuan Jonatán uej kemaj kiktiyaj. 23 Chika ijkon nochiuaya, sekimej on filisteos oyajkej ne Micmas.