Sen tiotlajtojketl de Judá okajuak Jeroboam
13
Ijkuak Jeroboam kitlatijtikatka kopajli ipan on tlaixpan* yejuan okichijchiu ne Betel, ompa oajsitets sen tiotlajtojketl yejuan oualeu Judá yejuan toTEKO okuajtitlan. 2 Niman toTEKO okinauatij on tiotlajtojketl, ijkin xkajua chikauak on tlaixpan*: “Tlaixpan, tlaixpan*, toTEKO ijkin yokijtoj: ‘ Itech iuejkakoneu* David tlakatis sen tlakakonetl, yejuan itoka yes Josías. Niman yejua kinmiktis mopan on tiopixkej yejuan mopan kitlatiaj kopajli, on tiopixkej yejuan tekitij ipan on tiopantsitsimej kampa kinmauistiliaj on ídolos. Niman mopan, kintlatiskej omiyotlakamej’.”3 Sano ipan on tonajli, on tiotlajtojketl okitemakak sen señal para okiteititij ika melauak nochiuas on tlen yokijtoj. Niman ijkin okijtoj: “In yejua on señal: On tlaixpan* tlajtlapanis, niman on tlikonextli yejuan onkaj ipan, chajchayauis.”
4 Ijkuak on rey Jeroboam okak kenijki on tiotlajtojketl okajuak on tlaixpan* yejuan onkatka ne Betel, okejkuanijtiaj ima itech on tlaixpan* niman okonmajpiluij on tiotlajtojketl niman okijtoj: “¡Xkajsikan!” Pero ima okuepitsiu, niman xok ouel okejkuanij. 5 Niman ijkuakon ouajtetlajtlapan on tlaixpan* niman on tlikonextli yejuan ipan onkatka ochajchayau. Melauak onochiu ken toTEKO okijto nochiuas itechkopa on tiotlajtojketl. 6 Kemaj on rey okijlij on tiotlajtojketl:
—Nimitsyemankatlajtlanilia, xchiua oración nopampa. Xtlajtlanili moTEKO Dios para ma pajti noma.
Kemaj on tiotlajtojketl okiknotlajtlanilij toTEKO para ma kipajti ima on rey. Kemaj ima on rey opajtik, niman kuajli onokau ken achtoj kipiyaya. 7 Kemaj on rey okijlij on tiotlajtojketl:
—Tiauij nochan para titlakuas, niman nimitsmakas sen tlayokolijli.
8 Pero on tiotlajtojketl ikinankilij on rey:
—Maski tinechmakaskia tlajkotipan on tlen onkaj ipan mopalacio, xniaskia mouan. Niman nikan xnitlakuas nion xniatlis, 9 pampa ijki yonechnauatij noTEKO. Onechijlij: ‘Maka itlaj tikuas ompa nion maka tatlis, nion maka timokuepas sano ipan on ojtli yejuan ipan otiaj.’
10 Niman on tiotlajtojketl oyaj ipan okse ojtli, para xok onokuep sano ipan on ojtli yejuan ipan oyaj ijkuak oyaj Betel.
11 Ipan on tonaltin, ne Betel chantiya sen tiotlajtojketl ueuentsin. Niman ikoneuan okitlajtlajtouilitoj nochi tlen on tiotlajtojketl de Judá okichiu on tonajli ne Betel. No ijki, okitlajtlajtouilijkej imintataj on tlen on tiotlajtojketl okijlij on rey. 12 Kemaj imintataj okintlajtoltij:
—¿Katlejua ojtli okajsik?
Niman ikoneuan okititijkej on ojtli yejuan ipan oyaj on tiotlajtojketl de Judá. 13 Kemaj on tajtli okinmijlij on ikoneuan:
—Xnechsillajtilikan nopoloko.
Yejuamej okichijkej on tlen okinminauatij. Kemaj on tiotlajtojketl ueuentsin otlejkok ipan ipoloko*, 14 niman okuitlapanuij on tiotlajtojketl de Judá. Kemaj okinextito yeuatikaj tlatsintlan de sen auakojtli, niman okitlajtoltij:
—¿Tejua tión tiotlajtojketl yejuan oualeu Judá?
Yejua okinankilij
—Tiauij nochan, tontlakuas nouan.
16 Pero on tiotlajtojketl de Judá okinankilij:
—Ka, xuelis nias mouan mochan. Nikan xuelis nitlakuas nion xuelis niatlis, 17 pampa noTEKO onechnauatij maka nitlakuas nion maka niatlis nion maka ninokuepas sano ipan on ojtli yejuan ipan oniuajlaj. 18 Pero on tiotlajtojketl ueuentsin okijlij:
—Nejua no nitiotlajtojketl ken tejua, niman toTEKO okuajtitlan sen ángel para onechnauatiko ma nimitsuika nochan, niman ma nimitsmaka tlakuajli niman atl.
On tiotlajtojketl de Judá xkimatiya ika on tiotlajtojketl ueuentsin kajkayajtikatka, 19 niman iuan oyaj ichan. Otlakuaj niman oatlik.
20 Niman chika tlakuajtikatkaj, toTEKO okinots on tiotlajtojketl ueuentsin. 21 Kemaj on tiotlajtojketl ueuentsin, ijkin chikauak okijlij on tiotlajtojketl de Judá:
ToTEKO ijkin onechijlij:
—Pampa xotiktlakamat itlanauatiluan, 22 yej otimokuep para otitlakuako niman otatliko kampa omitsnauatij maka tikchiuas, aman ijkuak timikis, xmitstokaskej kampa toktokej moachtojtajuan.
23 Ijkuak on tiotlajtojketl de Judá otlan tlakua niman atli, on tiotlajtojketl ueuentsin okisiyajtilij sen poloko, 24 niman on tiotlajtojketl de Judá oyaj. Pero ipan iojui okinamik sen león niman okimiktij. Niman on mikatsintli tiotlajtojketl onokau tlajkaltok ipan ojtli, niman on poloko* iuan on león onokajkej itech on mikatsintli. 25 Kemaj opanokej keskimej tlakamej, niman okitakej tlajkaltok on mikatsintli ipan ojtli, niman okitakej ika on león ompa kitlajtlatstikatkaj. Niman ijkuak oajsikej ipan on ueyikalpan kampa chantiya on tiotlajtojketl ueuentsin, okitetlajtlajtouilijkej on tlen okitakej.
26 Ijkuak on tiotlajtojketl ueuentsin okimat tlinon yonochiu, okijtoj: “On yejua on tiotlajtojketl yejuan xokitlakamat itlanauatij toTEKO. Yejua ika toTEKO okitemaktilij itech sen león yejuan aman yokimiktij niman yokitlankojkoton, ijkon ken toTEKO okijlijka nochiuas.”
27 Kemaj on tiotlajtojketl ueuentsin okinmijlij ikoneuan ma kisiyajtilikan sen poloko, niman yejuamej okichijkej. 28 Kemaj oyaj okitato on mikatsintli, niman okinextito tlajkaltok ipan ojtli. Niman itech on mikatsintli ompa nemiya on poloko* niman on león. On león xokikuaj on mikatsintli, nion xokitlankojkoton on poloko. 29 Kemaj on tiotlajtojketl ueuentsin okuiteu imikatlalnakayo on tiotlajtojketl de Judá niman okitlejkoltij ipan on poloko. Kemaj okuikak ipan iueyikalpan para onajman ipampa, niman okitôkak. 30 Okitôkak kampa kintoka yejuan ifamilias. Kemaj, yejua niman ikoneuan okichokilijkej. Ijkin kijtouayaj: ¡Ay noknijtsin!
31 Sakin, ijkuak yokitôkak, okinmijlij ikoneuan:
—Ijkuak nejua nimikis, xnechtôkakan sano ipan on tlalkontli kampa yoniktôkak on tiotlajtojketl de Judá. Xtlalikan noomiyouan itech yejua iomiyouan. 32 Ijkon xchiuakan pampa melauak nochiuas on tlen toTEKO okinauatij ma kijto ijkuak okajauak on tlaixpan* ne Betel, niman ijkuak okinmajuak on tiopantsitsimej yejuan onkaj ipan on tepetsitsimej kampa kinmauistiliaj on ídolos ipan iueyitlalpan Samaria.
33 Niman maski ijkin onochiu, Jeroboam xokitlalkauij on tlen xkuajli. Yej sanken* okintlapejpenij tiopixkej intech on tlakamej para okintlalij ma tekitikan ipan on tiopantsitsimej. San akinon yejuan kinekiya kalaktiaya tiopixki, Jeroboam kimakaya tekiuajyotl para ma tekiti ipan on tiopantsitsimej. 34 Niman pampa Jeroboam okichiu in tlajtlakojli, iuejkakoneuan ouetskej ipan ueyi tlajtlakojli. Yejua ika nochimej iuejkakoneuan omikkej niman ijkon opoliu intekiuajyo ken reyes ipan in tlaltikpaktli.