Asa otlamandaroj ken rey ne Judá
(1 R 15.8-12)
14
Ijkuak Abiam omik, okitôkakej ipan on ueyikalpan itoka Iueyikalpan David. Kemaj Asa, ikoneu, kej yejua okalak rey. Ijkuak yejua rey katka, majtlaktli xipan xokipix guerra iuan yakaj.2 Asa okichiu nochi tlen kuajli niman melajki ixpan toTEKO Dios. 3 Okinxoxotonij intlaixpanuan on oksekimej dioses, niman no okinxoxotonij on pipitikej tiopamej kampa kimauistiliayaj ídolos. Okintetlajtlapan on temej yejuan kinmauistiliayaj, niman okintsojtsontek on kojtin yejuan kimpiyayaj ixneskayouan on diosa Asera. 4 No ijki, on israelitas de ne Judá, okiminnauatij para ma nouikakan itech toTEKO, iminDios iminuejkatajuan, niman ma kintlakamatikan ileyes niman itlanatiluan. 5 Ipan nochimej on uejueyikalpanmej de ne Judá, okinmejkuanij on pipitikej tiopanmej niman on tlaixpantin kampa kitlatiaj kopajli yejuan onkatkaj ipan tepetsitsimej. Niman ijkuak yejua rey katka, xokipix guerra iuan yakaj.
6 Ipan on tiempo, on país de Israel xkipiyaya guerra iuan yakaj, pampa Dios kipaleuiyaya. Yejua ika, Asa okintepanyeualtsaku on uejueyikalpanmej ne Judá. 7 Asa ijkin okinmijlij on israelitas de ne Judá: “Ma tikintepanyeualtsakuakan in uejueyikalpanmej, niman iminyeualkan ma tikinchijchiuakan torres niman tsakuijlomej ikan inteposuan yejuan ika notsakuaj, pampa in país tejuamej toyaxka. Tejuamej otikchikej nochi tlen toTEKO Dios okinek; yejua ika, yejua techpaleuiya para maka ma tikpiyakan tlauejli iminuan tonisiuchanejkauan.” Ijkon tej, on tekitl yejuan okichijkej, nochi kuajli okis.
8 Asa, kimpiyaya 300 mil soldados yejuan kisayaj itech itribu* Judá. Niman on soldados kipiyayaj iminescudos niman iminlanzas. Niman no kimpiyaya 280 mil soldados yejuan kisayaj itech itribu Benjamín, yejuan no kipiyayaj iminescudos niman arcojtlaminaltin. Nochimej yejuamej katkaj soldados yejuan xmojkej. 9 Zera, sen tlakatl de etiopía, oyaj okuijsokito Asa iuan isoldados. Zera sanoyej miyek soldado okuikak niman 300 carretas de guerra, niman oajsik hasta on ueyikalpan Maresa. 10 Kemaj Asa iuan isoldados okiskej para okiminchatoj ipan on ixtlauatl itoka Sefata, nisiu Maresa 11 Niman Asa onoueyikatsajtsilij itech toTEKO Dios, niman okijlij: “NoTEKO, san tejua ueli tikinmpaleuiya on yejuan xkimpiya poder intech on yejuan kimpiya poder. Yejua ika tej, nimitstlajtlanilia, ¡xtechpaleui toTEKO niman toDios, pampa motech tiktlaliaj toyojlo, niman ikan motokatsin yotiualajkej nikan para tikinmixnamikiskej on miyekej soldados! Tejua toTEKO, tejua titoDios. Xteititi ika xakaj uelis mitsixnamikis”
12 Niman toTEKO okimpaleuij Asa iuan on soldados de Judá para ma kintlanikan on etiopes, niman on etiopes ocholojtejkej. 13 Niman Asa iuan isoldados okintojtokakej hasta on ueyikalpan Gerar, niman ompa nochimej okinmiktijkej. Nochimej omikkej ixpan toTEKO niman imixpan isoldados toTEKO. Niman Asa iuan isoldados okinoyaxkatijkej on miyek tlajtlamach de imintlauelikniuan. 14 Kemaj, on soldados de Judá no okinuijsokkej nochimej on uejueyikalpanmej yejuan onokej iyeualkan Gerar, pampa okitakej ika okimakaskej toTEKO. Niman okinkuilijkej nochi iminriquezas yejuan kipiyayaj. 15 No ijki, on soldados de Judá oyajkej kampa nemiyaj on tlajpixkej iminuan iminyolkauan. Niman sanoyej miyek borrego niman camellos okinuikakej. Kemaj onokuepkej Jerusalén.