Asa otlanauatij para nochipa ma kitekipanokan toTEKO
(1 R 15.13-15)
15
On tiotlajtojketl Azarías, ikoneu Obed, yejuan ipan onkatka iespíritu Dios, 2 oyaj okinamikito Asa niman ijkin okijlij: “¡Tejua Asa, niman nochimej on israelitas de itribu* Judá niman Benjamín, xnechkakikan! ToTEKO nemis nemouan tla nemejuamej nennemij iuan. Tla nemejuamej nenkitejtemouaj, nenkinextiskej, pero tla nenkitlalkauiyaj, yejua no mechtlalkauis. 3 On israelitas, ouejkau ika xnemiyaj iuan on yejuan melauak Dios, nion sen tiopixki xkipiyayaj yejuan kiminmachtiskia ileyes Dios. 4 Pero ijkuak sanoyej tlajyouiyayaj niman okitejtemojkej toTEKO, Dios de Israel okinextijkej, niman yejua okimpaleuij. 5 Ipan on tiempo, xakaj iyolika nemiya, yej nochipa onkatka nemojtijli nochiuiyan ipan on países. 6 On tlakamej de on naciones niman de on uejueyikalpanmej, sanoyej nomiktiayaj, pampa toTEKO kintlajyouiltiaya ikan miyek tlajtlamach problemas. 7 Pero nemejuamej xmoyolchikauakan, niman maka xmoyolmajxalokan, pampa nochi on tlen nenkichiuaj, toTEKO mechtlaxtlauijlis.”8 Ijkuak Asa okak tlen okijlij on tiotlajtojketl, onoyolchikau, niman okinxoxotonij on tetlajyelojkej ídolos yejuan onkatkaj ipan nochi iueyitlalpan Judá niman Benjamín, niman no, yejuan okatkaj ipan on uejueyikalpanmej yejuan yokiminnoyaxkatijka, yejuan onkatkaj ipan itepeyoj Efraín. No ijki, okuejkuektlalij itlaixpan toTEKO yejuan onkatka itech ikalixpan on iueyitiopan toTEKO. 9 Sakin, okinsentlalij nochimej on israelitas de itribu Judá niman Benjamín. Niman no inuan okinsentlalij on yejuan oksekan ualeuayaj, yejuan kisayaj itech itribu Efraín, Manasés niman Simeón. Nochimej in israelitas yopanokaj itech Asa pampa okitakej ika toTEKO, yejuan iDios, iuan nemiya.
10 Onosentlalijkej ne Jerusalén ipan on ika yeyi metstli, ijkuak Asa kuikaya majtlaktli uan makuijli xipan ika tlamandarouaya ken rey. 11 Niman ipan on tonajli okiuentlalilijkej toTEKO, 700 uakaxtin niman 7 mil borregos yejuan okinkuilijkaj imintlauelikniuan. 12 Kemaj, ixpan toTEKO okiprometerojkej ika nochipa kitokaskej toTEKO, iminDios inachtojtajuan, niman okijtojkej ika kitokaskej ikan nochi iminyojlo. 13 Niman no okiprometerojkej ika san akinon, ueyi noso konetl, tlakatl noso siuatl, yejuan xkinekis kitokas toTEKO Dios de Israel, ika onkaj kimiktiskej. 14 Ikan chikauak tlajtojli onotlajtolmakakej ikan itokatsin toTEKO ika kejeuaskej on pacto, niman yejuamej otsajtsikej niman okimpitskej on tlapitsaltin. 15 Nochimej on chanejkej ne Judá sanoyej opakkej ipampa on tlajtolmakalistli yejuan okichijkej, pampa okichijkej ikan nochi iminyojlo. Niman ikan miyek pakilistli okitejtemojkej toTEKO niman okinextijkej. Niman toTEKO okimpaleuij para maka ma kipiyakan tlauejli iminuan oksekimej países.
16 No ijki, on rey Asa otlanauatij para Maaca, iauelaj, makasa ma kuitikan "Tonantsin Reina" pampa on iauelaj otlanauatijka ma kichijchiuakan sen ixneskayo on diosa Asera ipan sen kojtli. Asa okitsojtsontek on kojtli pipitik yejuan okipix on ixneskayotl niman okitlatij itech on ayajtok Cedrón. 17 Niman maski ne Israel xokinxoxotonijkej on pipitikej tiopamej kampa kimauistiliaj ídolos ipan on tepetsitsimej, Asa nochipa onouikak itech toTEKO. 18 Niman ipan iueyitiopan Dios, okitlalij nochi on oro niman on plata yejuan yejua niman itataj yokiyaxkatijkaj toTEKO. 19 Niman ijkuak Asa otlamandaroj, xkaman oonyak guerra hasta ijkuak kuikaya 35 xipan ika tlamandarouaya.