Asa niman Ben-adad okichijkej sen pacto
16
Pero ijkuak Asa kuikaya 36 xipan ika tlamandarouaya ken rey, Baasa on rey de Israel, oyaj okinuijsokito on israelitas de Judá. Yejua opeu kikuektlalia on ueyikalpan Ramá para maka yakaj kisas noso kalakis ipan on iueyitlalpan Judá, kampa on rey Asa tlamandaroua. 2 Kemaj Asa okixtij on oro niman on plata yejuan yejtikatkaj ipan iueyitiopan toTEKO niman ipan ipalacio on rey, niman okititlanilij Ben-adad, on rey de Siria, yejuan chantiya ne Damasco. Niman ijkin otlanauatij ma kijlikan: 3 “Ma tikchiuakan sen pacto tejua niman nejua ken okichijkej totajuan. Nikan nimitsontitlanilia oro niman plata para xxotoni on pacto yejuan tikpiya iuan Baasa, on rey de Israel, para ijkon makasa ma nechuijsoki.”4 Niman Ben-adad onokalaktij on tlen okijlij on rey Asa, niman okintitlan isoldadojtlayekankauan para ma kinuijsokitij on uejueyikalpanmej de ne Israel. Niman okinoyaxkatijkej on ueyikalpan Ijón, Dan, Abel-maim, niman nochimej on uejueyikalpanmej yejuan onkatkaj ipan iueyitlalpan Neftalí yejuan kintekitiltiayaj para keuayaj tlajtlamach tlakuajli. 5 Ijkuak Baasa okimat tlinon nochijtikatka, okajkau nochi on itekiu, niman xok okitepanyeualtsaku on ueyikalpan Ramá. 6 Kemaj on rey Asa okinuikak nochimej on israelitas yejuan chanejkej ne Judá, ipan on ueyikalpan Ramá, para okinkuito on temej niman on kojtin yejuan Baasa kintekitiltiaya para kichijchiuaya on tepanchinantli. Niman ika on temej niman on kojtin, okitepanyeualtsaku on ueyikalpan Geba niman Mizpa.
7 Ipan on tiempo, on tiotlajtojketl Hanani oyaj okitlajpaloto Asa, on rey de Judá, niman ijkin okijlito: “Isoldados on rey de Siria yocholojkej momak, pampa tejua xotiktlajtlanilij itlapaleuil moTEKO Dios. Yej otiktlajtlanilij itlapaleuil on rey de Siria. 8 ¿Tlen xtikelnamiki ika on etiopes niman on libios no temojtij ken tojlamej katkaj? Niman maski yejuamej kimpiyayaj sanoyej miyek caballos niman carretas de guerra, toTEKO omitsinmaktilij pampa otiktlajtlanilij ma mitspaleui. 9 ToTEKO kitstikaj nochi tlen nochiua ipan in tlaltikpaktli, niman kinkojtilia on yejuan itech kitlaliaj nochi inyojlo. ¡Niman in tlen tejua yotikchiu, sen tontojyotl! Yejua ika, desde aman para nochipa tikpiyas más guerras.”
10 Niman Asa sanoyej okualan iuan on tiotlajtojketl, hasta otlanauatij ma kitsakuakan ipan cárcel. No ijki, ipan on tiempo sanoyej okintlajyouiltij sekimej chanejkej ipan on ueyikalpan.
Asa omik
11 On okseki tlajtlamach tlen okichiu Asa, desde ipeuyan hasta itlamiyan, tlajkuilolnestikaj ipan on amamoxtli kampa tlajkuilolnestikaj iminnemilis on reyes de Judá niman de Israel. 12 Ijkuak Asa kuikaya 39 xipan ika tlamandarouaya ken rey, opeu sanoyej kualo ipan ikxiuan. Pero ijkuak okualok, xokinots toTEKO para ma kipajti. Yej san okintejtemoj on tepajtijkej. 13 Omik ijkuak kuikaya 41 xipan ika tlamandarouaya ken rey, 14 niman okitôkakej ipan on tlalkontli yejuan otlanauatijka ma kichijchiuakan ipan on ueyikalpan itoka Iueyikalpan David. Okitekakej ipan sen tlajtlapechtli yejuan tentikatka ikan miyek ajuiyalistli niman okseki miyek tlajtlamach tlen ajuiyak. Kemaj okitlikuiltijkej sen ueyi tlitl para okitlakaitakej on rey.