Josafat otlamandaroj ken rey ne Judá
17
Kemaj Josafat, ikoneu Asa, kej yejua okalak rey. Yejua okichiu para Judá más kipiyas poder para nomanauis itech Israel. 2 Okintlalij soldados para ma tlacuidarokan ipan nochimej on uejueyikalpanmej yejuan tepanyeualtsakutikatkaj ipan nochi iueyitlalpan Judá niman tlajtlaluis kampa chajchantiua ne Judá. Niman no okintlalij soldados, ipan on uejueyikalpanmej yejuan onkatkaj ipan iueyitlalpan Efraín, yejuan Asa itataj, yokiminnoyaxkatijka.3 ToTEKO okitiochiu Josafat, pampa no ijki onouikak ken yeuejkaui achtoj onouikak David, iuejkatataj. Yejua xkaman okinmauistilij ixneskayouan on dios Baal, 4 yej san kimauistiliaya iDios itataj. Okitlakamat itlanauatiluan toTEKO niman xonouikak ken nouikayaj on israelitas. 5 Yejua ika, toTEKO okipaleuij Josafat para otlamandaroj ken rey. Nochimej on chanejkej ne Judá tlamach kitlayokoliayaj, niman sanoyej oricojtiak niman sanoyej kitlakaitayaj. 6 Ikan nochi iyojlo okitokak iojui toTEKO. Niman ne Judá okinxoxotonij on pipitikej tiopamej kampa kinmauistiliyaj ídolos yejuan onkatkaj ipan tepetsitsimej, niman no okinxoxotonij ixneskayouan on diosa Asera.
7 Ijkuak Josafat kuikaya yeyi xipan ika tlamandarouaya ken rey, okintitlan itlapaleuijkauan para ma temachtitij ipan on uejueyikalpanmej ne Judá. On itlapaleuijkauan yejuamej in katkaj: Ben-hail, Abdías, Zacarías, Natanael niman Micaías. 8 Iminuan yejuamej oyajkej in levitas: Semaías, Netanías, Zebadías, Asael, Semiramot, Jonatán, Adonías, Tobías niman Tobadonías. No ijki, iminuan oyajkej on tiopixkej: Elisama niman Joram. 9 Yejuamej tej, okiktikej on amamoxtli kampa tlajkuilolnestikaj ileyes toTEKO para ma kinmachtikan on chanejkej ne Judá. Oyajkej nochiuiyan ipan on uejueyikalpanmej para okinmachtijkej on yejuan ompa chanejkej.
10 Nochimej on reyes de on países yejuan kiyejyeualojtikatkaj on ueyitlalpan Judá, sanoyej kimakajsiyaj toTEKO. Yejua ika, xkaman okinemilijkej kuijsokiskej Josafat. 11 Yej sekimej on filisteos tlamach kontlayokoliayaj Josafat, niman no kiktiliayaj plata para ika kitlaxtlauiliayaj impuestos. Niman on árabes uej okiktilijkej 7 mil 700 borregos niman 7 mil 700 chivos.
12 Ijkon tej, Josafat okajsitiaj más poder. Ne Judá okinchijchiu kaltin kampa tlacuidarouaj soldados, niman no okinchijchiu uejueyikalpanmej yejuan okipixkej tepantli kampa keuayaj tlakuajli imanian Judá. 13 Niman okipix okseki miyek tlajtlamach ipan on uejueyikalpanmej de ne Judá. No ijki, ne Jerusalén kimpiyaya soldados yejuan yoixtojtonkej niman nion xmojkej katkaj. 14 In yejua on uejueyisoldadostlayekankej niman on tribu* kampa kisayaj:
Nemiyaj yeyi uejueyisoldadostlayekankej yejuan kisaj itech itribu* Juda: On achtoj ueyisoldadojtlayekanki katka Adna yejuan kinyekanaya 300 mil soldados. 15 On ika ome ueyisoldadojtlayekanki katka Johanán yejuan kinyekanaya 280 mil soldados. 16 On ika yeyi ueyisoldadojtlayekanki katka Amasías, ikoneu Zicri. Yejua kinyekanaya 200 mil soldados. (Yejua san okinek ipan iyojlo para kitekipanos toTEKO.)
17 Nemiyaj ome uejueyisoldadostlayekankej yejuan kisayaj itech itribu* Benjamin: On achtoj ueyisoldadojtlayekanki katka Eliada yejuan xmojki, niman kinyekanaya 200 mil soldados yejuan kipiyayaj arcos niman escudos. 18 On ika ome ueyisoldadojtlayekanki katka Jozabad yejuan kinyekanaya 180 mil soldados yejuan uelij tlauijsokij ipan guerra.
19 In soldados yejuamej nemiyaj itech on rey Josafat, ne Jerusalén. Aparte kimpiyaya oksekimej soldados yejuan okintlalij ipan on uejueyikalpanmej yejuan kuajli tepanyeualtsakutikatkaj ipan nochi iueyitlalpan Judá.