Esdras
Ciro okinkauilij on israelitas ma nokuepakan Israel
1
Ipan on achtoj xipan ijkuak Ciro rey katka ipan on país Persia, toTEKO okiyoleu on rey Ciro para ma kitlali sen tlanauatijli, niman ma kititlani nochiuiyan kampa tlamandaroua. On rey Ciro okinmakak itlajtokauan on itlanauatiluan ikan tlakuilojli para ma kiktikan niman ma kiteijlikan. Ijkon onochiu para otsoman itiotlajtol toTEKO yejuan okijtojka on tiotlajtojketl Jeremías. Niman on tlanauatijli ijkin kijtouaya: 2 “Ciro rey de Persia ijkin tlanauatia: ‘On Dios iluikakchanej* yonechmakak nochi on reinos ipan in tlaltikpaktli, niman nechnauatia ma nikchijchiuili sen ueyitiopan ipan on ueyi kalpan Jerusalén, ne ipan iueyitlalpan Judá. 3 Ijkon tej, san akinon yejuan teuan nopoua intech on israelitas itlapejpeniluan Dios, ma Dios kipaleui. Niman ma uiya Jerusalén ne Judá, niman teuan ma kichijchiuati iueyitiopan Dios, iminDios on israelitas yejuan nemi ne Jerusalén. 4 Nochimej yejuan israelitas noso xisraelitas, san kanon kampa chantij ika onkaj kimakaskej tlajtlamach* on yejuan yaskej Jerusalén. Ma kinmakakan plata, oro, tlajtlamach* yejuan notekitiltis, uakaxtin niman tlanechikojli para on ueyitiopan yejuan kichijchiuaskej ne Jerusalén.’ ” On israelitas onokuepkej Jerusalén
5 Kemaj, on tlayekankej ipan on familias yejuan kisaj itech itribu* Judá niman Benjamín onotlatlajtlalilijkej para yaskej ne Jerusalén. No ijki, on tiopixkej niman on Levitas, niman nochimej on yejuan Dios okinyoleu, oyajkej para okichijchiuatoj iueyitiopan toTEKO. 6 Niman nochimej innisiuchanejkauan okimpaleuijkej ikan plata, oro niman on tlajtlamach* yejuan notekitiltis. No okinmakakej uakaxtin niman tlatlamach yejuan patioj, niman okseki miyek tlatlamach tlanechikojli. 7 No ijki, on rey Ciro okinkuepilij nochi on tlatlamach yejuan kitekitiltiayaj ipan iueyitiopan ToTEKO ne Jerusalén yejuan on rey Nabucodonosor okinkuikaj niman okimiktika ipan intiopan iídolos. 8 On rey Ciro okinauatij Mitrídates, itominyejyejkau, ma kipoua on tlajtlamach*, niman kemaj ma kimaka Sesbasar, on gobernador de Judá. 9 On tlajtlamach* yejuan okipojkej katka:
30 tazas ueueyimej de oro,
1,000 tazas uejueyimej de plata,
29 cuchillos,
10 30 tazas de oro,
410 tazas de plata, niman
1,000 tlajtlamach* okseki.
11 Nochi on tlajtlamach* de oro niman de plata katka 5,400. Nochi yejuan in okimiktik Sesbasar ne Jerusalén ijkuak okis Babilonia iminuan on oksekimej israelitas yejuan okinkauilijkej ma nokuepakan iminchan.