Nehemías
Nehemías okichiu oración impampa on israelitas
1
In yejua onochiu ipan inemilis Nehemías, ikoneu Hacalías.Ipan on metstli itoka Quisleu, ijkuak Artajerjes kuikaya sempoajli xipan ika tlamandarouaya ken rey, nejua Nehemías ninemiya ipan on ueyikalpan Susa kampa chanti on rey. 2 Niman ijkuakon, ompa oajsik nokniu Hananí iuan keskimej tlakamej yejuan iuan oualejkej ne Judá, niman onikintlajtoltij kenijki tlaonkaj ne Jerusalén niman kenijki nemij on Judéos yejuan onomanauijkej para xokinuajuikakej ipan in país Babilonia. 3 Niman yejuamej ijkin onechnankilijkej: “On yejuan onomanauijkej para xokinuikakej ne Babilonia niman onokajkej ipan on ueyitlalpan Judá, sanoyej temojtij ken tlajyouiyaj niman sanoyej inka uetskaj. Niman on ueyikalpan Jerusalén okixoxotonilijkej itepanchinan yejuan ika yeualtsakutikatka, niman itsakuijlouan okintlatijkej.”
4 Ijkuak ijkon onechijlijkej, oninotlalij niman opeu nichoka. Niman keski tonajli sanoyej oninajman, oninosau niman onijkchiu oración ixpan Dios yejuan nemi ne iluikak. 5 Ijkin onikijlij toTEKO: “NoTEKO Dios akin tinemi ne iluikak, tejua yejuan tiueyixtikaj niman nochi tlakatl mitsmakajsi, yejuan tikchiua nochi tlen tikprometeroua niman xtikintlalkauiya on yejuan mitstlajsojtlaj niman kintlakamatij motlanauatiluan; 6 nimitsiknotlajtlanilia xnechita niman xkaki nooración yejuan nikchiua mixpan ipan nochi tonajli niman ipan nochi yeuajli impampa motekitkauan, on israelitas. Melauak tejuamej yejuan tiisraelitas otichijkej tlen xkuajli yejuan tejua mitskualania. Hasta nofamilias niman nejua yotitlajtlakojkej! 7 Sanoyej xkuajli ken yotitouikakej mixpan. Xotikintlakamatkej moleyes niman okseki tlanauatiltin yejuan otitechinmakak itechkopa motekitkau Moisés. 8 Xkelnamiki ika otikijlij Moisés, tla tejuamej titlajtlakouaj, titechchajchayauas imanian in tlaltikpaktli. 9 Pero tla titokuepaj motech niman tikintlakamatij motlanauatiluan niman kuajli ijkon titouikaj, maski tichajchayajtiaskiaj hasta kampa tlantikaj in tlaltikpaktli, oksejpa titechhuikas ne kampa tlayekkan, kampa otiktlapejpenij para ompa timitsyekteneuaskej.
10 "Tejuamej timotekitkauan niman timotlapejpeniluan, yejuan otitechkixtij Egipto ikan mofuerza niman ikan moueyipoder. 11 Nimitsiknotlajtlanilia tej, noTEKO, xkaki nooración niman xkaki tlinon mitsiknotlajtlaniliaj motekitkauan yejuan kipiyaj paktli para mitsmauistiliskej. No ijki, nimitstlajtlanilia xnechpaleui para nochi kuajli ma kisa tlen nikchiuas, niman xchiua para on rey ma nechkaki niman ma nechikneli ijkuak niktlajtlanilis sen ueyi favor.”
Ipan on tonaltin nejua nikmakaya ivino on rey Artajerjes.